13
Barnabas le Saul Tengin Hah Haw
1 Antiok khua pawlpi sungah profet le zilhtu khenkhat um haw hi. Amuh cu Barnabas, Simeon ahimata mihaang tih hei sam haw, Sairin khua mi, Ngamuktu Herodnote 13:1 * Herod:* Hi Herod cu ngamuktu bawi Herod Antipas hi in, Galilee ngam uktu hi. tuah a khangcuntu Lusias, Manean le Saul haw hi.
2 Amuh cu an cangin Pathian a biak haw laihin, Hawvang Thiangtho in, “Barnabas le Saul cu ka tiikmi na bek dek tukin, a dangno umtik un,” ti hi.
3 Thungenin, an a can nung haw ten a lu hum hawah a khut haw suangin, Barnabas le Saul cu hah haw hi.
Saipras Heng Haw
4 Hawvang Thiangtho in, a hah bangin Barnabas le Saul cu Sileusia ah hawh haw a, mahlai pen Saipras tuikulhah heng haw hi.
5 Salamis khua a hen haw ten Judah mitei pumkhawm innah Pathian thu hilh haw in, a nadeh haw bawmtu tukin Johan Marka pui haw hi.
6 Saipras tuikulh kuam sungah zin pepelin Pafos khua tian heng haw hi. Mahlai ah mitzial thiam Barjesuh a tih haw mi tawk haw hi. Amah cu Judah mi hi a, profet ing tin, a tiduntu pa hi.
7 Amah cu Saipras tuikulh uktu, ngamuktu Serzias Paulas i ngualcam pa hi in, micipzet hi. Pathian thu theih a nuam hangin Barnabas le Saul cu ama lakah sam hi.
8 Mahnaven mitzial thiam Elimas in lem ma hi; Elimas tih cu a Grik min hi. Serzias Paulas cu a hilh haw mi a sang tuk ngawlin so het hi.
9 Mahten Saul, Paul tih hei in sammi pa cu Hawvang Thiangtho tuah dimin, mitzial thiampa cu a maicang pen zo in,
10 “Nang Satan capa! Thilpha hempoh a dodaltu cu nangmah ci. Mi zolnak a phunkim tuah dimin, Topa i thutak khi zolthu vocangin cangtik khawng tum ci.
11 Atu loli in Topa i khut cu na humah heng tuk a, na mitcaw in, tawkfang sung cu khua al mu thei tukma ci,” ti hi. Thakhatin Elimas i mit cu meingo hangin khuhin, amah kaitu tuk zei in vai li hi.
12 Mahti bangin a piangmi cu ngamuktu bawipa in amuh hangin thu umtu in canlawh hi; itahim titale Topa i thu a zilh haw mi cu lamdang sazet hi.
Pisidia Ngam Antiok Khua Ah
13 Paul le a ngualcamte cu hawmkuang tuah Pafos pen hawhin, Pamfilia ngam Perga khua ah heng haw hi. Mahlai pen Johan Marka in zamsanin Jerusalem ah pin hi.
14 Perga pen hawh lehleu in Pisidia ngam Antiok khua ah heng haw hi. Mahlai ah Sabbath ni-in Judah mitei pumkhawm innah hawhin, khungtum haw hi.
15 A khawmmi ten Moses laibu le profet tei ngatmi laibu sungta a sial ceng haw ten pumkhawm hotu ten, “Unaute aw, ka mipi tei ca in thapiaknak na nei nuam uh tale hilh un hi,” tin ti haw hi.
16 Paul cu dingto in, a khut zak thahin thuhilh pan hi.
“Ka phunpih Israel mi le hilai ah Pathian a bia mi Gentail mi hempoh ten ngai un hi!
17 Israel i Pathian in, a pu le pa uhte tengin Izipt ngamah a um haw laihin, miphun ngengpi ah bawl hi. Mah Pathian in Izipt ngam pen a huham ngengnak tuah a khut haw pen doksuah tulin,Ref 13:17 Suah 1:7; 12:51;
18 phillawn sungah kum sawm li sung umpihin cingkhawi hi.Ref 13:18 Mipum 14:34; Daan 1:31;
19 Kanaan ngam a ummi miphun phun salih khi siatsuah khawngin, ama miphun Israel mite cu mah ngam luahtu in bawl hi.Ref 13:19 Daan 7:1; Josh 14:1;
20 Hitih bangin thil a piangmi hi kum za li le sawm nga sung ngei hi.
“Mah nungten profet Samuel khan a hen laihngawl sung cu Thukhentu koih hi.Ref 13:20 Daan 2:16; 1Sam 3:20;
21 Mahten Israel miten kumpi ngen haw a, Pathian in kum sawm li sung a kumpi haw tukin Benjamin hinnam sung pen Kish capa Saul khi a kumpi tukin pia hi.Ref 13:21 1Sam 8:5; 10:21;
22 David i thu cu Pathian in hitih bangin ti hi: ‘Jesse capa David cu ka deihmi hi. Ka bawltik nuam hempoh cu bawl tuk hi,’ ti hi.Ref 13:22 1Sam 13:14; 16:12; Saam 89:20;
23 David casuan Jesuh cu a tepsa bangin Pathian in Israel mite nunpantu tukin bawl hi.
24 Jesuh i nadeh pat laih ngawlin, Johan in Israel mi hempoh tei lakah, a sualnak haw sikkik tukin le tuiphum tukin thuhilh hi.Ref 13:24 Mk 1:4; Lk 3:3;
25 Mahten Johan in, a nadeh a deh khawng kuanno ten mipi tei lakah, ‘Kei hi akua tin ti kam uh ci?’ tin dong hi. ‘Na ngah lih uhmi cu kei kha mang hi! Mahnaven ngai un! Amah cu keima nungten hung tuk a, kei cu a kedam khau duktu tuk hei in tak mang,’ ti hi.”Ref 13:25 Mt 3:11; Mk 1:7; Lk 3:16; Jn 1:20, 27;
26 Ka phunpih Israel mite, Abraham i casuante le hilai a Pathian a biatu Gentail mite, hi nunpatnak thuthang hi, a venghawng uh ca in piakmi hi.
27 Itahim titale Jerusalem ah a ummi mipi le a hotu haw ten Jesuh cu Nunpantu hi tih khi thei haw ma hi. Profet tei ngatsami Sabbath nisialin, a sial haw mi thu hei khi a sullam thei haw ma hi. Mahnaven Jesuh a thahnak haw in, profet tei awnkam khi kimtik haw hi.
28 Amuh ten Jesuh a thah theihnak haw tukin thu zei li haw hi.Ref 13:28 Mt 27:22-23; Mk 15:13-14; Lk 23:21-23; Jn 19:15;
29 Lai Thiangtho in, a thu le la a hilhsa mi hempoh khi a bawl khawng ceng haw ten thinglamteh hum pen khiasukin, khanah vui haw hi.Ref 13:29 Mt 27:57-61; Mk 15:42-47; Lk 23:50-56; Jn 19:38-42;
30 Mahnaven Pathian in thihnak pen tholehtikin,
31 amah tuah Galilee pen Jerusalem tian khual a zintu tei lakah ni tampi sung lang hi. Atu-in ama ai-awhin mah mite cu Israel tei lakah theihpihtu na hi haw hi.Ref 13:31 Nung 1:3;
32-33 Mah Thuthangpha cu atu-in nangmuh tei lakah pua ung hi. A pu le pa tei lakah Pathian in thutiam a, atu-in, a casuan haw keimuh tei lakah Pathian in Jesuh cu thihnak pen tholehtikin, mah a thutepmi cu kimtik hi. Mahmi cu Saam pa nihnak sungah:
‘Nangmah cu ka Capa ci,
tuni in, na Pa hi zo ing hi;’
tin um hi.Ref 13:33 Saam 2:7;
34 Jesuh cu khansungah muat tuk ngawlin tholeh tuk hi tih thu ah Pathian in hitin hilh zo toh hi.
“David lakah a thiangthomi le
muantak thupha muicu
ka tepsami cu nangmah
pia tung,” ti hi.Ref 13:34 Isa 55:3;
35 Mahti bang lengin Saam la ngantu in:
“Muanhuai zetmi na salpa cu
khansungah
muat thong tuk cu
phal tukma ci,” ti hi.Ref 13:35 Saam 16:10;
36 Itahim titale David cu ama nun sungah Pathian deihmi na cu dekbok naven, a thih ten a pu le pa tei lakah vui haw in, a taksa cu khansungah muatta hi.
37 Mahnaven Pathian in khan pen a thawhlehtikmi pa i humah mahtih bangin kha ma hi.
38-39 Ka phunpih Israel mite, na venghawng uhin, na theih tuk uh a kulmi cu: Jesuh minin sual ngaihdamnak thuthang cu nangmuh tei lakah phuanin um zo hi; na sualnak sung pen Moses Daan in luattik thei ma hi, mahnaven Jesuh a umtu hempoh cu sualnak sung pen luat haw hi, tih hi na theih uh kul hi.
40 Mahti bang a hih hangin ngalling un hi, a nuailam a profet tei sonmi hi nangmu humah heng kha sual tuk hi. Profet ten;
41 “Zo un hi!
Noh mi nuihcip mangte;
mangbangin na thita un!
Itahim titale tuni a
ka bawlmi hi, miten nangmu
lakah a sonciang
haw hei in, na san tuk ngawl
uhmi thil hi,
tin hilh haw,” ti hi.Ref 13:41 Hab 1:5;
42 Paul le Barnabas cu pumkhawm inn pen tul haw in, mipi ten mai Sabbath ni ten hungleh tukin le mah thuthang a hilhleh tukin zawm haw hi.
43 Mipite cu pumkhawm inn pen a pinkhek haw nungten Paul le Barnabas cu Judah mi tampi le Judah biaknakah a tummi Gentail mi tampi ten zui haw hi. Nungzuitu ten amuh tei lakah thuhilhin, Pathian hehpihnak sungah nung leleng tukin thapia haw hi.
44 Maipi Sabbath ni-in, mi tampi ten khuasung mi hempoh tih awh ngangai in, Pathian thu thei nuamin tul khawm haw hi.
45 Mahmi cu Judah miten amuh haw ten iksik haw a, Paul i thuhilhmi cu elin zawnsak haw hi.
46 Mahnaven Paul le Barnabas ten ngalhang sesemin thuhilh haw hi. “Pathian thu cu nangmu lakah hilh masak tuk cu a kulmi hi. Mahnaven noh ten deih ngawl elin kumkhua nunnak ngah tuk takin na ngaihsut uh ngawl hangin zamsan tuk ung a, Gentail mitei lakah hawh tuk ung hi.
47 Itahim titale Topa i thupiakmi cu hitih bangin hi.
‘Leihum pumpi hi
nunpat a hih theihnak tukin,
nohte cu Gentail mitei ca in
khuavaknakin
bawl zo toh ing hi,’
ti hi” tin ti haw hi.Ref 13:47 Isa 42:6; 49:6
48 Mah thu cu Gentail miten a zak haw ten lungdam mahtak haw in, Topa i Thuthangpha cu thangphat haw hi. Mahten kumkhua nunnak ca in tenmite cu thu umtu ah cang haw hi.
49 Topa i thu cu mahlai ngam hempoh ah thang hi.
50 Mahnaven Judah miten khuasung a, upa le Pathian umtu upat takmi Gentail numeite khi tokpil haw a, Paul le Barnabas cu bawlsia in, a ngamsung haw pen hawlvawk haw hi.
51 Paul le Barnabas ten a hum hawah lungkim ngawl langtiknakin, a ke haw a, leivul cu thiingta in, Ikonium ah hawh haw hi.Ref 13:51 Mt 10:14; Mk 6:11; Lk 9:5; 10:11
52 Antiok khua a thu umtute cu lungdamnak le Hawvang Thiangtho tuah dim haw hi.