9
1 Zingsuv ming ta a hmisipa na i ri. Hang va ang tapa ca i chiephathleduona ta Thlaapa Pathe thueta a pacu sa.
2 I pathiypalung chunglie ngiechina lepuv hne pasana i hnyi.
3 Tahematapakieca i cawsaa,note 9:3 Gk I uvnu saapa lieta i phangkha ta a cuopa tie cuota a cuo kieca, kama hing chiesa pata Khrih'a taata chepa cuo riypa kha hmuota i khing.
4 Iema ca Israel ming ta cuo yite, saata ta pacuosapa, rungnaana a pipa, biekuona a pipa, phungbie a pipa, biena a pahnyi sapa, hne biekuona a hmungpa tie ta ama cuo.
5 Hluoning mingpa tie'a taata pathlapa cuo yite, iema'a taacata Messiahnote 9:5 Or Khrih ca thiy hne saa ta pathlapa a cuo. Ama ca Khazing cuote, hmangting bangkhuo cunglie a awpa a cuo nakawta chuozaa pathuo sa pata cuo mangsue. Amen.
6 Cata a cuo tiyta Khazing bie kha tling vyi tanata cuo vyi. Tahematapakieca Israel ming bangkhuo kha Israel ta cuo hmisi lipa yi ta,
7 Abraham saata zaw bangkhuo kha ama bangkhuo ta Abraham ciypathla ta cuo diy vayi. Cuorasala, "Isak chung taata a puvpa tie hingna na samingsahlaa ta ripa a cuo'a yi," a ta.
8 A ri khingpa ca, cawsaa thiysaa cakhawpa ta sapa ca Khazing saata ta cuo vayi, cuorasala biekuona ta a puvpa saata zaw khana ciy hne hruo ta ripa a cuo yi.
9 Tahematapakieca biekuona ta hinghaahingta a ri, "Capa cuo ning ca Kama kha za kaa'a ang te Sarah ta saacapaa kha a hnyi aa," a ta.
10 Cadyi ca cuo vyi; Rebekka ta a navaapa pakha dyipa ma mingpa Isak taata nu a phya ning yi kha capa hne cata aa lusapa hmang a cunglie a tlung.
11 Ama za puv hluo, a chie a pha khaahmuo ama tue the hluo baataa khata, Khazing ta a tingpa atlawna ca
12 tuehriena thueta cuo li pata kupa cuona thueta aa pazue na riypata, Rebekka kha, "A uvthyipa hing a syipa rehrietuv tana a cuo aa," tapata changpa a cuo.
13 Caapathepa lie aa capepa ca,
"Jakob kha due ang te,
Esau ca i hue," a ta.
14 Cacuokie tuokhaama ma ta aa? Khazing ca a dang vyi ma ta'a ma? Ta khu changchiy'a va puv.
15 Tahematapakieca, Moses kyihuo khata,
"Nang i due khingpa tie kha nangdue'a yi ang te,
Kaw i pacuo khingpa tie kha kaw i pacuo'a yi," a ta.
16 Cacuonakawta hmangting bang-khuo hing cawsaa khingna hne temaana taata cuo li pata nang malie a duetuv Khazing thue tana a cuo.
17 Tahematapakieca Caapathepa ta Faro kha, "I ming kha chuelyi bangkhuo ta u khyipa a cuo riypata i cahrana kha na cunglie paluo riypa atingna hneta icaa tlawpa tana a cuo," a ta.
18 Cacuonakawta nang a due khingpa tie kha nang due yite, ama palung a cahra sa khingpa tie kha ama palung a cahra sa yi.
19 Cakhutaa, niema ta, "Cacuokie, khaapanakawma Khazing ta sue malie a phaw the? A khingna ca ahungma a du khu?" nama ta aa.
20 Cuorasala nama Khazing bie a i tuv cawsaapa hing ahung tama na cuo? Sapa hne vypa a cuopa ta satuv hne vytuv kha, "Khaapanakawma hinghaahingta ina tue ciy? a ta the'a ma?
21 Bi vytuv ca acyi kha a khingta tue khuna naw hnyi vama? Acyi hlungkha chung taata bi suokha kha a sungnaa vie ta hmuo riypa hne a hrangpa bi suokha kha hmuo cakhaw riypata sana naw a hnyi cuo vama?
22 A hihaana kha paluo khing te a cahrana a paluo sa khingpa Khazing ta para riypata sapa hne hihaana a ang riypa tie kha palung pasiysa pata a ang law kie yi ca,
23-24 a nangduena a hmung riypa tie, Judah ming dyi cuo li pata Jentail ming kiema zaw yalya chung taata a rungnaana cuota tingpaciena hne a kupa tie ta a hnyirungna hne a rungnaana ama pachang riypata ca ang hryly li pata a aw'a ma?
25 Hosea chunglie ta a za ri sasawpa ca,
"I cawsaa ta a cuo lipa tie kha 'I cawsaa,' ta'a yi ang te,
I due li nung kha 'I duesa nung,' i ta aa," a ta.
26 "'I cawsaa ta cuo va ungciy,' i ta napa hmang lie caci kha,
A hringpa Khazing saata tapata kupa ama cuo aa," a ta.
27 Israel ming kaw hne a patuv pata Isaiah ta, "Israel ca mingluv ta riyliy viehnang zaa ta hluv ra mang yi sala, a cawta dyina khuo pata a cuo'a yi.
28 Tahematapakieca Abyipa ta chuelyi lie a biechina kha a catlisa pata hne a siesa pata a patling sa aa.
29 Isaiah ta a za ri paciepa ca,
"Alesyipa Abyipa ta kiema kha
malie nguo buo li pata aw sala,
Sodom haahingta cuo'a tli pate,
Gomorrah haa hing tana tuepa ma cuo aa," a ta.
30 Cacuokie, tuokhaatama ma ta aa? Jentail ming adangna a huv lipa tie khata adangna hmung yite, caca zangna thueta ama hmungpa a dangna tana a cuo.
31 Cuorasala, Israel ming, phungbie kha a patuv pata adangna a huvpa tie ta ca phungbie kha patling khu vayi.
32 Khaapanakawma ama patling khu va? Tahematapakieca zangna ta huv lipa yi ta tuehriena ta ama huv nakawtana a cuo. A pachiyna alung lie kha a pachiy yite amaa lie.
33 Caapathepa ta,
Mang tie ung,
Cawsaa zaw a pachiy pata
a liena riypa alung kha,
amaa liena riypata Kama ta Zion lie i chi,
A zangpa bangkhuo ca nangzaana a taw'a vayi," a ta.