8
1 Cacuonakawta Khrih Zingsuv chunglie a hringpa tie cuota ca suephawna aw va tli.
2 Tahematapakieca Khrih Zingsuv chunglie ta a awpa Thlaapa hringna phungbie ta suena hne thiyna phungbie chung taata hya aca pazang yi.
3 Saapa thaa a ne nakawta phungbie ta a tue khu lipa kha Khazing ta a tue: ama saacapaa kha a suepa cawsaa thiysaa cuona haata suena te riypata za pathlie te suena kha saapa cuonapa lieta sue a phaw.
4 Caca saapa khingna haata cuo li pata Thlaapa khingna haata a ziypa tie hringna lieta aa dangpa tue riypa tapa phungbie a tling thena riypatana a cuo.
5 Tahematapakieca saapa khingna haata a awpa tie ca ama pathiypalung kha saapa hmang lie chi yite, cuorasala Thlaapa khingna haata a hringpa tie ca ama pathiypalung kha Thlaapa hmang lie ama chi.
6 Saapa khingna chunglie pathiypalung chipa ca thiyna cuote, cuorasala Thlaapa khingna chunglie pathiypalung chipa ca hringna hne diena tana a cuo.
7 Canakaw cata saapa khingna lie sangpa pathiypalung ca Khazing hne a carie te; Khazing phungbie kha ziy vyi _ a ziy heta ziy khu vyi.
8 Saapa khingna chunglie a awpa ta ca Khazing palung kha patluo khu vyi.
9 Cuorasala niema ca saapa khingna lie aw va ungciy; Khazing Thlaapa kha nama chunglie khy a sa nakawta Thlaapa khingna chunglie na nama aw. Khrih Thlaapa a hnyi lipa ahunghmuo ama huopa ta cuo vayi.
10 Cuorasala Khrih kha niema chunglie a aw kieca, nama pangpa ca suena nakawta thiy ra sala Thlaapa ca a dangna thueta a hring aa.
11 Zingsuv thiyna taata a pathu pakhaapa, ama Thlaapa kha niema'a lie khy a sa kieca, thiyna taata Zingsuv a pathu pakhaapapaa khata a thiy thepa nama pangpa kha niema'a lie khy a sapa Thlaapa thueta hringna aca pi'a yi.
12 Cacuonakawta, uvnu hne sieta zaw, kiema ca saapa khingna haata hring riypata, saapa lieta lyibuo a hnyipa cuo va puv.
13 Tahematapakieca, thiysaa khingna haata nama aw pata a cuo kieca nama thiy aa; cuorasala pangpa ta a tuepa suena kha Thlaapa ta nama thie kieca nama hring aa.
14 Tahematapakieca Thlaapa ta aa chiypa bangkhuo ca Khazing saata ta ama cuo.
15 Niema ca ciyna luo caa pathla pakhaapa yi, sii cuona thlaapa kha a tingpa ta cuo va ungciy, cuorasala saata ta caa pacuo sapa yi, thlaapa khana nama ting. "Abba!note 8:15 Aramaic ryi ta paa* tana ta a cuo. I Paa! nama tapa hing
16 Khazing saata ta ma cuonapa kha na capa Thlaapa ca hne kiema thlaapa ta tehte ama khuo pata a cuo.
17 A saata ta ma cuo kieca, rucutuv zaw ma cuo, Khazing rucutuv cuo pate Khrih hneta ru a cu hnepa ta ma cuo. Cata a cuo kieca ama hne rungnaana a hrawpa ma cuo riypata ama hneta ruvnaana a angpa ma cuo riypatana a cuo.
18 Ata cuo lieta ma angpa ruvnaana hing ca hmie luo ma cuota phupa ta a cuo riypa rungnaana hneta ca pakhingpuo tluo aa tlapa cuo vyi.
19 Khazing saata zaw paluopa ama cuona cuo kha sapa hmang ta a ngietie hringhruo vayi.
20 Tahematapakieca sapa hmang bangkhuo hing iema khingna ta cuo li pata Khazing ta cuose a tapa haata vievuv diy riypata khuekhuo ciepa ta a cuo.
21 A ruechuona a awpa ca sapa hmang bangkhuo hing thuvna siicuona taata palaw sa pata cuo'a te Khazing saata zaw rungnaana kha ama hmung ra aa.
22 Ata cuo te hingta ca sapa hmang bangkhuo hing nupazi pasapa haata amaa hrung amaa ie nguoluo tapa kha ma pa chang.
23 Sapa hmang zawdyi cuo li pata Thlaapa thyipaa taapa ta a cuopa kiema zaw hrahring hmuo ma pangpa malie a khuo riypa hne saata ta malie a tue riypa ma huopuo nguoluo pata maa hrung maa ie ra.
24 Tahematapakieca a ruechuona thueta khuopa tana ma cuo. Ma hmungpuopa a nguopuona ca a nguopuona cuo vyi. Hmung thluopa ca ahungma a nguopuo aa?
25 Cuorasala ma hmung lipa kha maa nguopuo kieca, palung pasiyna hneta capaca ma huo pata a cuo.
26 Cahaa cata Thlaapa ta ma thaadyana lie kha malie aa bya. Tuokhaatama thlaa ma chuo riypata a cuo tapa hmuo ma pachang li ning kha capa Thlaapa cata ahrungna hne pakaa ta ri khu lipa bie ta paa malie a kiepa.note 8:26 Hluo vie caa-uv lieca kiema cuota paa malie a kiepa* a ta.
27 Cawsaa pathiypalung a mangpasiepa Khazing ca Thlaapa palungphya kha a pachang; tahematapakieca Thlaapa ta Khazing khingna haakhata mingpathepa tie cuota paa a kiepa nakaw yi tana a cuo.
28 Khazing a duepa tie hne Khazing ta a tingna haata a kupa tie cuota ca hmangting zawdya hingta a phana luota a tuepale yi tapa kha ma pachang.
29 Khazing ta a pachanglupa tie ca a Saacapaa hminghmie lu riypata aa tlaw pathlyi yi, capa a Saacapaa ca uvnu a hluvpuv hrawlie a uvthyice cuo riypata a cuo.
30 A tlaw pathlyipa tie kha ama ta a ku yi, a kupa tie kha duo pacu sa yite, duo a pacu sapa tie kha rungnaana a pi yi.
31 Cakhutaata capa zaw kaw lieca tuokhaama ma ta aa? Khazing kha kiema'a luo malie aa cuo kieca ahungma malie a du khu aa?
32 A Saacapaa hmuo a khe li pata ma bangkhuo cuota malie a pi pakieca a Saacapaa hne cata a hrangpa hmang bangkhuo kha malie pi li pata a aw'a ma?
33 Khazing ta a tlawpa kha ahungma sue a phaw khu aa? Duo a pacutuvpa ca Khazing tana a cuo.
34 Ahungma sue a phaw aa? Khrih Zingsuv, thiy te a thupakhaapa, Khazing cacuo luo kuo ta a tupa na kiema cuota paa malie a kiepa pata a cuo.
35 Ahungma Khrih duena taata malie a pache khu aa? Ruvnaana ma, ngiechina ma, a cuo li kie hrisaathieruena ma, a cuo li kie cakuona ma, abuv-ase riy hnyi li pata awna ma, a cuo li kie ciy aa chiypa hmang ma, a cuo li kie zueziy ma tapa tie hingta malie a che khu'a ma?
36 Caapathepa lie a capepa ca,
Nama kawlieta ningaw ta thiepa ta ma cuo;
Thie riypata chipa tuv haatana ma cuo, tapata a cuo.
37 Malie che khu'a vyi, hing hmang bangkhuo lieta kiema ca malie a duetuv ama thueta tetuv tie laata tetuv vie tana ma cuo.
38 Tahematapakieca thiyna cuose, hringna cuose, avuoming cuose, luochiytuv tie ta cuo yi se, atalie a cuopa hmang ta cuose, a vya chiy riypa hmang ta cuose, cahrana cuose,
39 aa suopa ta cuose, aa thuvpa ta cuose, sapa hmang suokhakha ta cuose, ma Byipaapa Khrih Zingsuv chunglie Khazing duena taata malie che khu'a vyi tapa kha i pachang.