16
1 Kenkhria khrihsaabuv lie khrihsaa uvthyinote 16:1 Or Khazing rehrietuv a cuopa ma sietanung Fibi hing niema'a luo ica vya pachang sa yi.
2 Mingpathepa tie hrawlie ta a cuo riypa hmang a cuopa haata, ama kha Abyipa ming ta cuhluo ungla, niema'a taata abyana a caa hiepa yi bangkhuo kha pi tie ung. Tahematapakieca ama ca cawsaa hluvpuv hne kama cuo hrahring ta byatuv pha tana a cuo.
3 Khrih Zingsuv chunglie i re hrie hne a cuopa Prisilla hne Akuila kha nama kuv ica patuv yi.
4 Iema ca kama hringna cuota ama luv a pi nguopa tana ama cuo. Iema'a lie i palung a tluopa dyi cuo vyi, Jentail khrihsaa bangkhuo zaw ama palung a tluo hringhruo.
5 Ama ing lie a pungpa khrihsaa tie zaw nama kuv ica patuv yi. Asia ruo taata Khrih a zang taapanote 16:5 Gk thyipaa taapa ta a cuopa, i viesaa phapa Epenetas zaw na kuv ica patuv.
6 Niema hrawlie rehrie te amaa hringhruopa Mary kha na kuv ica patuv.
7 Andronikas hne Junias kha nama kuv ica patuv yi. Iema ca kama phangbuo, kama hne thaw a tla hnepa tana ama cuo. Iema ca lucuotuv tie ta ama za pachangsa pata cuo yite kama hluo ta Khrihsaa ama za cuo tli.
8 Khrih chunglie i duepa Ampliatas kha na kuv ica patuv.
9 I duepa Stakhis hne Khrih re i hrie hnepa Urbanas kha nama kuv ica patuv yi.
10 Khrih zangna lie tlechuo aa chiysapa Apelles kha na kuv ica patuv. Aristobulus ingchungkhue tie kha nama kuv ica patuv yi.
11 I phangbuo a cuopa Herodion kha na kuv ica patuv. Narsissas chungkhue tie zaw kha Abyipa ming ta nama kuv ica patuv yi.
12 Abyipa rehrietuv Trifana hne Trifosa kha nama kuv ica patuv yi. Abyipa re lie te a maasapa, i duepa Persis kha na kuv ica patuv.
13 Abyipa ta aa tlawpa Rufas hne a nung, i nung ta a cuo rapa kha nama kuv ica patuv yi.
14 Asinkhritas, Flegon, Hermes, Patrobas, Hermas hne uvnu hne sieta zaw iema hne a awpa tie bangkhuo kha nama kuv ica patuv yi.
15 Filologas, Julia, Nereus hne a sietanung, Olimpas hne iema hneta a awpa tie bangkhuo nama kuv ica patuv yi.
16 Pakha hne pakha kha a pathepa a pahnuona ta nama kuv a patuv ung. Khrih huo a cuopa khrihsaabuv na nama kuv caa patuv yi.
17 Uv nu hne sieta zaw,note 16:17 Gk uvnu a chena hne a duna a chiykhyipa tie kha a raaring ungla, nama cuhluo ciepa pacuvna a du pata a rilepa tie kha cahriy tie ung.
18 Tahematapakieca, cahaapa cawsaa zaw kha ca Abyipa Khrih rehrietuv cuo lipa yi ta iema riyvaw cuo dyi ta a hriepa tana ama cuo. Ama bie pahniepa hne malie ama pata thenapa khata cawsaa zaaruo tie kha ama dung.
19 Thuophaabie hne aa patuv pata zangtluo namaa tlana kha cawsaa bangkhuo ta ama pachang nakawta hingpa kawlie hingta i palung aca tluokhyi hringhruo yi. Hmangphapa kawlie kha singvaa ungla, hmangpha lipa suena ta acaa kaa li riypa yi ta icaa khingkhyi yi.
20 Diena Khazing ta Setaa kha nama phyipazaa rawlie chi'a te a carie patang aa. Abyipa Zingsuv Khrih vihnyina ca niema'a lie aw mangsue.
21 I rehriehne Timote ta nama kuv aca patuv yi. Cahaa cata, i phangbuo a cuopa Lusias, Jason hne Sosipater zaw ta nama kuv aca patuv yi.
22 Kama Tertias, hingpa caapaphya a capetuvpa zaw hingta Abyipa ming ta nama kuv ica patuv yi.
23 I ingtlungpa hne khrihsaabuv a pungna ing hnyituv, Gaius zaw ta nama kuv aca patuv yi. Khypuv suekingtuv Erastas hne ma uvnupa Kuartas zaw ta nama kuv aca patuv yi.
24 (Ima Byipaapa Zingsuv Khrih vihnyina ca niema bangkhuo'a lie aw mangsue. Amen.)note 16:24 Hluo vie caa-uv lieca rina 24 hing aw vyi.
25 Kama i ripa hne i phupa Zingsuv Khrih thuophaabie hne cuo syipuv chung za nupa, cuorasala ata hing phu pata a cuopa bieparuv haakhata niema thaazuo caa pi khupa ca Khazing tana a cuo.
26 Cakhutaata chuozaa a hringpa Khazing bie pina haata, zang yite a bie ama ziy the riypata, profet tie capepa caa thueta, ama ca Jentail ming bangkhuo kha pachang sa pata a cuo tli.
27 Pakha dyipa, a singpa Khazing ca Zingsuv Khrih thueta chuozaa ta a ming rungnaa pata aw mangsue! Amen.note 16:27 Hluo vie caa-uv lieca 16:25-27 hing aw vyi. Chekha taca 4:23 a cuo li kie 15:33 khutaata pazue yite chekha ta rina 24 hing rina 27 khutaata ama pazue.