KORIN
Korin Khrisaabuv'a Luo Paul Caapaphya Suokhana
Korin Khrihsaabuv'a Luo Paul Caa paphya Yikhana hing Paul ta Korin khy lie a za padaapa khrihsaabuv lie khrihsaa tie hringzya hne zangna kaw taata a puvpa hnaahnawna hne ruvnaana kha pathluo riypa hne padie riypata capepa tana a cuo. Capa cuo ning ca Korin khy ca Grik ming khypuv ta za cuote, Rom uvna rawlie a awpa Akhaia pe khypuv ta a cuo. Sungpalina kuo luo hne singna kuo luota a ming pathuopa, hringphung kuo luo hne suena kuo luo zaw ta a ming a pathuopapaa, biena phangphang kuo luo zaw ta a ming pathuopa a cuo.
Paul ta hingpa caa a cape hnuochuo khingcepa ca khrihsaabuv lie a awpa a chena, suena, a chiyhiena kawlieta hnaahnawna, hriykhung rina saa ce hne ce li kawlieta ruena aa lu lina kaw, khrihsaabuv a mangchiyna kaw, Thlaapa Pathe lasaw kaw hne thupakhaana kaw zaw ta a cuo.
Chuehraahlyithung chunglie ta a ripa duena kaw hing Khazing ta a cawsaa zaw'a luo a pipa lasaw hrawlie a phacepa cuote hingpa caa-uv chung taahingta cawsaa ta pachang cepa suv ta a cuo aa.
Biehmaasa 1:1-9
Khrihsaabuv chunglie a chena 1:10—4:21
Canungcapaa cuona hne ingchungkhue hringzya 5:1—7:40
Khrihsaa hne zanglituv tie 8:1—11:1
Khrihsaa hringzya hne biena 11:2—14:40
Khrih thupakhaana hne zangtuv tie 15:1-58
Judea lie a awpa khrihsaa tie cuota sue pina16:1-4
Pangpa bietaana hne bie pachuosana 16:5-24
1
1 Khazing khingna thueta Khrih Zingsuv lucuotuv cuo riypata kupa kama Paul hne ma uvnupa Sosthenes ta,
2 Khazing mingpathepa cuo riypata kupa hne Khrih Zingsuv chunglie ta pathesapa Korin khy lie a awpa Khazing Khrihsaabuv tie hne, iema hne kiema Byipaapanote 1:2 Gk Iema hne kiema huopa ta a cuopa Abyipa Zingsuv Khrih a zangpa, hmangting lieta a awpa tie'a luo kha caa maca paphya yi.
3 Ma Paa Khazing hne ima Byipaapa Zingsuv Khrih'a taata vihnyina hne diena ca nama cunglie aw mangsue.
4 Khrih Zingsuv thueta aca pipa yi vihnyina kawlie kha Khazing i pathuosa pari.
5 Tahematapakieca niema ca ama thueta hmangting bangkhuo kha pipa cuo ung cate, bierina hne pachangna phangting zaw kha pipa nama cuo nakawta,
6 Khrih kawnote 1:6 Or Khrih'a luo tehte ma khuopa kha niema hrawlie a cusa pata a aw tli tana ta a cuo.
7 Cacuonakawta, ma Byipaapa Zingsuv Khrih aa luona riypa nama huona lie hing nama hmung lipa thlaapa luo lasaw suokha hmuo aw vyi.
8 Ma Byipaapa Zingsuv Khrih ning thueta suephawpa nama cuo li riypata ama ta ningchuona ning te ta thaazuo aca pi'a yi.
9 Khazing ca zangtluo aa tla; ama thueta niema ca a saacapaapa, ma Byipaapa Zingsuv Khrih hne a viesaana hnyi riypata kupa nama cuo.
10 Uvnu hne sieta zaw,note 1:10 Gk Uvnu zaw niema bangkhuo palung a lusa sala, nama hrawlie a chena aw li pata, palung lungkha phya ungla aa lupa atingna hnyi pata nama aw riypata Zingsuv Khrih ming ta paa ica kie yi.
11 Uvnu hne sieta zaw, Khalawi chungkhue ta niema hrawlie ahru-a-ina a awpa kha ina chang yi.
12 I ri khingpa ca niema cyicuo ta, "Kama ca Paul phuv tana i cuo," "Kama ca Apollos phuv tana i cuo," Kama ca Piter phuv tana i cuo," Kama ca Khrih a ziytuv tana i cuo," nama ta.
13 Khrih hing chetuv a cuo ma? Paul hingma nama cuota vieluo lie khepuopa a cuo? A cuo li kie Paul ming tama tiy namaa naw?
14 Krispas hne Gaius ri li pata pakha hmuo tiy ica naw li nakaw yi ta Khazing i law.
15 Tahematapakieca ahungtahmuo i ming tana tiy maa naw a ta riypa aw va ungciy.
16 (Stefanas hne a ingchungkhue zaw kha tiy i za naw ra yi; cakhutaata tiy i nawpa ama aw kalie ma tapa pachang va ang.)
17 Tahematapakieca Khrih ta tiynaw riypata na pathlie vyi. Thuophaabie phu riypata pathliepa cuo ang te, caca cawsaa bie rithena ta cuo'a vyi, tahematapakieca Khrih vieluo hing cahrana hnyi li pata a aw sue lina riypatana a cuo.
18 Vieluo lie Khrih thiyna kaw hing rana luo a chiy nguoluopa tie cuota ca ngaana bie cuote, cuorasala khuo nguoluopa kiema cuota ca Khazing cahrana tana a cuo.
19 Tahematapakieca Caapathepa ta,
"Mingsing tie singna kha para'a ang te,
A thepa tie thena kha i pavie aa," a ta.
20 Khaapaliema a singpa ca a aw? Phungbie saya ca khaapaliema a aw? Ata chuo bie i a thepa tie ca khaapaliema ama aw? Khazing ta chuelyi singna kha ngaana ta a pacuo sa tli cuo vama?
21 Tahematapakieca Khazing singna chunglie hing chuelyi hingta singna ta Khazing a pachang khu li nakawta, ma phupa ngaana bie ama tapa thuophaabie hingta a zangpa tie khuo riypa kha Khazing khingna tana a cuo.
22 Tahematapakieca Judah ming ta pahmungsana kha hie yite Grik ming ta singna kha ama tlechuo,
23 cuorasala kiema ca Khrih vieluo lie a thiyna kaw kha phu pate, capaca Judah ming cuota aliena cuote Jentail ming cuota ngaana bie ta a cuo.
24 Cuorasala Khazing kupa Judah ming hne Grik ming cuota ca Khrih ca Khazing cahrana hne Khazing singna tana a cuo.
25 Tahematapakieca Khazing ngaana ca cawsaa singna laata sing vie te, Khazing thaadyana ca cawsaa cahrana laata a thaa a ruv vie ngiethie.
26 Uvnu hne sieta zaw, Khazing ta aca kuna yi kha rue syalya tie ung. Niema hrawlie hing chuelyi taana luota a singsapa, hmang a tue khupa hne phanghruo luota aa suopa hluvsa va ungciy.
27 Cuorasala Khazing ta chuelyi lie a singpa tie nang pazaa riypata aa ngaapa tie kha a tlaw yite, a cahrapa tie nang pazaa riypata a thaa dyapa tie kha a tlaw yi.
28 Khazing ta chuelyi lie esenutaapa tie hne siysaa ri lipa tie kha a tlaw yite, a biepuvpa hmang tie kha khaapatahmuo ama cuo li riypata a biepuv lipa hmang kha aa tlaw.
29 Cacuonakawta Khazing hmielie ca ahungtahmuo a palepatie khu'a vyi.
30 Khazing ca Khrih Zingsuv thueta nama hringna hruo ta a cuo. Zingsuv ca kiema cuota Khazing taata a zuvpa singna, adangna, pathesana hne khuona ta a cuo.
31 Cacuonakawta, Caapathepa lie a capepa haata, "A pale khingpa ca Abyipa'a lie kha a pale se."