4
1 Cacuonakawta Khrih ca a pangpa ta a za te-ang nakawta niema zaw cahaa cata ang khu riypata a ting pacie pata aw tie ung. Tahematapakieca saapa ta a te-angpa ca suena hneta aa che tli.
2 Caca hing chuelyi lie a ngaapa nama hringna hing cawsaa khingna haa cuo li pata Khazing khingna haata nama hring khuna riypatana a cuo.
3 Jentail ming ta ama tue khingpa hmang ta a cuopa saapa anuona, saapa khingna, sahmaa pariyna, khi-u pata anuona, khingta ningdangna, duv aa chiypa kuvtuezuv biena zaw kha ade-akhaw pata nama tue ra mangtli.
4 Niema ta kha haapaapa a luekhungpa anuopaana lie kha namaa te khyi li tli nakawta ama kharue haa te nama thuo aca pachi yi.
5 Cuorasala a thiypa hne a hringpa tie kha bie ripa riypata a ting pacie pata a awpa Khazing hmielie kha ama bie ca ripa pata ama cuo aa.
6 Cacuonakaw catana a thiypa tie'a luo zaw kha thuophaabie ca phu pata a cuo. Caca cawsaa bangkhuo kha bie ripa pata ama cuo pahaata iema zaw saapa lieca bie ripa pata ama cuo raalaa pata thlaapa lie ca Khazing haata ma hringna riypata a cuo.
7 Hmangting bangkhuo a chuona riypa cuo a ngie tli. Cacuonakawta thlaa nama chuo khuna riypata a cadangna hnyi ungla singvaasa pata aw tie ung.
8 Capa zaw khutaa cata, pakha hne pakha kha a due pari tie ung, tahematapakieca duena ca suena hluvpuv khana a buvkhung.
9 A ciepuo li pata pakha hne pakha kha ing a patlung sa tie ung.
10 Khazing lasaw phangphang mangchiykingkaatuv pha nama cuo pahaata ama'a taata nama hmungpa lasaw kha pakha cyicuo phana cuota hmuo tie ung.
11 Khazing ca Zingsuv Khrih thueta hmangting bangkhuo lie a rungnaa the na riypata phung a ripa ta Khazing bie hrahring kha ri sala, a re a hrietuv ta Khazing ta a pipa thaazuo ta hrie se. Rungnaana hne cahrana ca chuozaa ta chuozaa te ama huo cuo mangsue. Amen.
12 Duepa zaw, niema pasupaliy riypata niema hrawlie a tlapa riethyina myi cunglie kha hmang a tlung buo lipa na kiema'a lie a tlung tapata nama kharue haa kha se.
13 Cuorasala a rungnaana aa luo tiyta alawna hne palung tluo pata nama khi-u the riypata Khrih te-angna a hrawpa haakhata a law tie ung.
14 Zingsuv ming kawlie ta thuochi nama phya kieca, thluechiypa tana nama cuo, tahematapakieca rungnaananote 4:14 Hluo vie caa-uv lieca rungnaana hne cahrana thlaapa* a ta. thlaapa, Khazing thlaapa na nama cunglie ta a aw.note 4:14 Hluo vie caa-uv lieca Iema kuo luo taata ca ama ca biena luota chiesapa cuote, cuorasala nama kuo luo taata ca pa rungnaa sapa tana a cuo* tapa a bechiypuo kalie.
15 Cuorasala niema pakha hinghmuo lienawna, paruvna, pha lina tuena kawlie hne cawsaa riethyi pina kawlie taca te-ang kha ung.
16 Cadyiseca khrihsaa cuona kawlie tana nama te-ang tapata a cuo kieca nama ngie chi kha se.
17 Tahematapakieca Khazing chungkhue tie taata patha pata bie rina cuo ca a vya tlung tli; capacana kiema'a taata a patha tapata a cuo kieca, Khazing thuophaabie kha siysaa a ri lipa tie ama chuona ca khaapama a lu aa?
18 Caapathepa ta,
"Aa dangpa tie khuo riypa khahmuo
a ruv pata a cuo kieca,
A suepa tie hne Khazing a pachang lipa tie
changchiy ca tuokhaama a cuo aa?"
19 Cacuonakawta, Khazing khingna haata a te-angpa tie ca phana ama tuepuo nguoluo pa khata zangtluo aa tlapa Satuv Khazing'a luo kha a pi karue yi se.