3
1 Cahaa cata, napuv zaw nama navaapa ri kha a ngie tie ung. Iema chekha ca Khazing bie kha ama zang li kie zaw ma bie kaakha hmuo ri a hu li pata ama napuvnung awtuvzyazaa khata zangtuv a pacuo sa'a yi.
2 Tahematapakieca a pathepa hne pa-uvsathyi aa tlapa nama hringzya kha ama hmung nakawta a cuo.
3 Niema namaa panginapa ca ale luo taata hmung khupa nama suo a phiena zya, siyy hne ngu namaa tue zya, hne caw namaa tue zya lie zaw kha cuo li pata,
4 Khazing hmielie a muosungpa hne chung luo taata a panginapa, a puvthe paripa nangnena hne diena pathiypalung phya khata cuo hriy se.
5 Capacana hluo ningta Khazing a nguopuopa a pathepa canung zaw ta ama navaapa ri a ngie pata amaa pangi tawna zya ta a cuo.
6 Sarah ca Abraham ri kha a ngie te ama kha abyipa a ta. Niema zaw phana tue ung cate ciyna khaahmuo nama hnyi li kieca Sarah sacanung zaw tana nama cuo.
7 Cahaa ngiethie cata niema, navaapa zaw, nama napuvnung hne nama aw tiyta, niema laata a thaadya viepa ama cuopa hne iema zaw muosungpa hringna rucutuv ama cuopa kha pachang pata pa-uvsathyi tie ung, cacuokieca nama thlaachuona kha khaapa tahmuo ca pakhuo'a vayi.
8 A hnangcawce ta i ri khingpa ca nama bangkhuo ta, nama palung a lu se, kawpacuona a hnyi ung, pakha hne pakha a due ungla, nangnena hne rawcanawna hnyi tie ung.
9 Pha lina kha pha lina ta a thung kha ung, biechiepa kha biechiepa ta a vielie kha ung; cuorasala thluechiy pina ta a thung hriy tie ung.
10 Tahematapakieca,
A nuosa pata hring khing te,
ningcuo phapa a hmung khingpa ca,
biechie ri kha a cadang yi sala,
hanghiena bie zaw ri kha yi se
11 hmangpha lipa kha cahriy yi sala
hmangphapa kha tue yi se;
diena kha huv sala hmung a zue se.
12 Tahematapakieca Abyipa ta
a dangpa tie ca a ming khata ve yite,
ama thlaachuona kha a thyipa yi.
Cuorasala pha lina a tuepa tie ca
aa pali se yi.
13 Phana tue a khingpa na cuo kieca ahungma ruvnaana caa pi aa?
14 Cuorasala hmangpha na tue patana te-angna na hmung tapa kieca thluechiypa tana na cuo. Aca pachiy zaw yi ta ciy kha ung, nama kharue zaw haa kha se.
15 Cuorasala nama pathiypalung chunglie Khrih kha Abyi ta hnyi ungla ciyzaa tie ung. Nama hnyipa anguopuona kawlie ta caa hiehriypa pakhakha ama aw tiyta nama palie khu paluo riypata a ting pacie pata aw tie ung.
16 Nama palie tiyta nangnena hne pa-uvsathyina hneta palie tie ung. Nama chiephathleduona kha a pathe pata chi tie ung. Cakiedyina Khrih chunglie nama tuepa zyazaa phapa kawlie ta niema kha ca hue yite nama thuo caa pachipa tie kha ama nang a zaa aa.
17 Te-angna hingna Khazing khingpa ta a cuo tapata a cuo kieca, hmangpha lipa tuena kawlie ta te-angpa laa taca hmangpha tuena kawlie ta te-angpa a pha vie.
18 Tahematapakieca Khrih hrahring zaw kha suena cuota yikha ta aa dena te ta a thiy, niemanote 3:18 Hluo vie caa-uv lieca kiema* a ta. kha Khazing'a luo a chiy riypata a dangpa ca a dang lipa zaw cuota a thiy. Ama ca saapa lie a thiy raalaa pata, thlaapa lieca pahring pakhaa pata a cuo.
19 Capa thlaapa cata thaw a tlapa thlaapa tie kha phung a va chang yi.
20 Capa thaw a tlapa thlaapa tie ca Noah ta tiypalaw a sa ning kha Khazing ta palung pasiysa pata a huo raalaa pa yi ta a ri a ngie lipa tie ta ama cuo. Capa lieca cawsaa a cawta, ama bangkhuo ta pacari dyi na tiy chung taakhata khuopa a zaa cuo yi.
21 Capa cata a paluosalupa tiynawna ta ata hing niema kha aca khuo yi. Tiynawna ca nama pangpa lie a pyalyipa pasiyna ta cuo vyi, cuorasala Zingsuv Khrih thupakhaana thueta a phapa chiephathleduona kha Khazing'a luo a hiena tana a cuo.
22 Zingsuv Khrih ca vuoruo luo kie te, a paa cacuo luo kuo ta a tu te, avuoming nawhnyina hne cahrana bangkhuo kha a uv diy yi.