3
1 Khazing ta khatluv tama malie a due tapa hing pacuo tie ung. Khazing saata tapata kupa ma cuo; ma cuo hmisi saw. Chuelyi ta kiema malie a pachang li pahing Khazing kha a pachang li nakawtana a cuo.
2 Duepa zaw, ata hing kiema ca Khazing saata ta ma cuo ung; Hmie luo khaama ma lu aa tapa ca pachang valie puv. Ma pachangpa ca: Khrih aa luo thueta, kiema ca ama kha lu'a pate a cuona dadang haakhata ma hmung aa.
3 Ama'a lieta capa anguopuona a hnyipa bangkhuo ca Khrih a pathepa haakhata iema hne iema kha amaa pathe sa ra.
4 Suena a tuepa bangkhuo ca Khazing phungbie a parapa tana ama cuo; suena ca Khazing phungbie parana khatana a cuo.
5 Khrih ca cawsaa suena pathe sa riypatana a vaw tapa kha pachang ung cate, ama'a lieca suena aw vyi tapa kha nama pachang.
6 Khrih chunglie a awpa ahungtahmuo suena tue va tli yi; suena a tuepazuepa ahunghmuota Khrih kha a hmungpa hne a pachangpa aw vayi.
7 I saata zaw, ahunghmuo a padung sa kha ung. Khrih ca aa dangpa a cuopa haakhata aa dangpa hmang a tuepa bangkhuo ca aa dangpa ama cuo.
8 Suena a tuepa bangkhuo ca Setaa saata ta ama cuo; tahematapakieca Setaa ca a hruothu baataata suena a tuepa tana a cuo. Khazing Saacapaa aa luona ca Setaa rehriena para riypatana a cuo.
9 Khazing'a taata a puvpa ca suena kha tue vayi, tahematapakieca Khazing saciy kha ama chunglie aw te, sue khu vayi, tahematapakieca Khazing'a taata a puvpa ama cuo nakawtana a cuo.
10 Khazing saata a cuopa hne Setaa saata a cuopa ca cahaa cata a hnang yite; hmangphapa a tue lipa bangkhuo ca Khazing'a taata cuo vayi, a uvnu a due lipa zaw cuo ra vayi.
11 A hruothu taata nama za thyipa bie ca: pakha hne pakha a due ungla tapata a cuo.
12 Setaa'a taata a vawpa Kain, a nuta a thiepa haata ma cuo riypata cuo vyi. Khaapanakawma a nuta ca a thie? Tahematapakieca a hmang tuepa kha a dang li pata a nuta hmang tuepa kha a dang nakawta a cuo.
13 Uvnu hne sieta zawnote 3:13 Gk Uvnu zaw chuelyi ta aca hue tiy yi ta nama kharue haa kha se.
14 Tahematapakieca pakha hne pakha maa due nakawta thiyna taata hringna luo ma caluo tli tapa kha ma pachang ung.
15 A uvnu hne a sieta a huepa bangkhuo ca lie a nawpa tana ama cuo, lie a nawpa ca chuozaa hringna hnyi vayi tapa kha nama pachang.
16 Abyipa ta kiema cuota a hringna a pi nakawta duena tapa kha ma pachang. Kiema zaw pakha hne pakha cuota ma hringna maa pi riypatana a cuo.
17 Pakhakha ca hnyirungsa te a uvnu a cuo li kie a sieta zaw ama siy a pasasa pakha a hmung thluo pata aa bya khing li kie yi ca Khazing duena ca a chunglie tuokhaatama a aw the aa?
18 I saata zaw, ryi hne kaa dyi ta cuo li pata biehmisipa hne tuena ta a due'a ungpuv.
19 Cahaa cata kiema ca biehmisipa taata ma cuopa kha pachang'a pate, ma pathiypalung ta sue malie a phaw kyry ta kiema ca biehmisipa taata ma cuopa kha a pachang'a pate ama hmielie ma hnaa a nguo aa.
20 Tahematapakieca Khazing ca ma pathiypalung laata lesyi vie te hmangting bangkhuo kha a pachang.
21 I duepa zaw, ma pathiypalung na sue malie a phaw va tapa kieca; Khazing hmielie riephana ma hnyi.
22 Tahematapakieca a nawbie kha ziy pate ama palung ma patluo nakawta ma hiepa bangkhuo kha ma hmung.
23 Abyipa nawbie ca, ama bie malie a pipa haata, a Saacapaa Zingsuv Khrih kha zang pata pakha hne pakha a due riypa khatana a cuo.
24 A nawbie a ziypa bangkhuo ca ama chunglie aw yite ama zaw iema chunglie a aw. Canakaw cata kiema chunglie ama a awpa kha malie a pipa a Thlaapa thueta ma pachang.