2
1 I saa zaw, hingpa caa niema'a luo i vya capepa hing suena nama tue li na riypatana a cuo. Cuorasala pakhakha ta suena nama tue kieca Paa hmielie malie a rikuotuv, aa dangpa Zingsuv Khrih ma hnyi.
2 Ama ca kiema suena cuo dyi ta cuo li pata chuelyi suena bangkhuo cuota suemuo thungna riypata hriykhungrina tana a cuo.
3 A nawbie khana ma ziy tapa kieca ama ma pachangnapa kha maa pasie aa.
4 "Ama kha i pachang," a ta raalaa pata a nawbie a ziy lipa ca a hanghiepa ta cuote, cahaapaapa cawsaa chunglie ca biehmisipa aw vyi.
5 Cuorasala a bie kha a ziypa ca Khazing duena kha a chunglie ta a bi. Cahaacatana Khazing chunglie ma awpa kha maa pacie aa.
6 Khazing chungliena i hring a tapa ca Khrih a hringzya haa khatana a hring aa.
7 Duepa zaw, niema'a luo ivya capepa hing nawbie thaapa ta cuo vyi, cuorasala a hruothu taata nama za hnyipa nawbie hlungpa khatana a cuo. Capa nawbie hlungpa ca nama za thyi ciepa khatana a cuo.
8 Cadyiseca, ata niema'a luo ivya capepa hingca Khrih'a lie hne niema'a lieta aa hmuopa nawbie thaapa tana a cuo, tahematapakieca zingna ca khung tli te khena hmisipa ca a khe mangtli.
9 Cawsaa pakhakha ta khena chungliena i aw a ta pata a uvnu hne sieta zawnote 2:9 Gk Uvnu kha a hue kalie kie yi ca zingna chungliena a aw kalie.
10 A uvnu hne a sieta a duepa ca khena chunglie a awpa cuote, cahaapa cawsaa ca a chunglie luo a pachiyna riypa aw vyi.
11 Cuorasala a uvnu kha a huepa pakhakha ca zingna chunglie a awpa cuote, zingna chunglie a cakuo nakawta a cakuo na riypa luo kha pachang vyi, tahematapakieca zingna khata a ming a pacue nakawta a cuo.
12 I saata zaw, niema'a luo kha caa ivya cape,
tahematapakieca a ming thueta
nama suena a ngiethepa
nama cuo nakawtana a cuo.
13 Paa tie zaw, niema'a luo kha caa ivya cape,
tahematapakieca ahungma
a hruothu baataata a aw tapa kha
niema na a pachang ungciy.
Mingnu zaw, niema'a luo kha caa ivya cape,
tahematapakieca pha lina kha
nama te nakawta a cuo.
14 I saanu zaw, niema'a luo kha caa ivya cape,
tahematapakieca Paa kha
nama pachang nakawta a cuo.
Paa tie zaw, niema'a luo kha caa ivya cape,
tahematapakieca a hruothu taata
zaa awpa kha ahungma tapa nama pachang.
Mingnu zaw, niema'a luo kha caa ivya cape,
tahematapakieca niema ca nama cahra,
Khazing bie ca niema'a lie aw te,
pha lina kha nama te.
15 Chuelyi hne a chunglie a awpa hmang kha tlechuo kha ung. Cahaapa chuelyi a tlechuopa tie chunglie ca Paa duena aw vyi.
16 Chuelyi lie a awpa saapa khingna, ming ta hmungkhingna, hnyirungna lie hruotlena tapa zaw bangkhuo hing chuelyi taata a vawpa selaw ta cuo yite Paa taata a vawpa cuo vayi.
17 Chuelyi hne chuelyi ta a khingpa zaw bangkhuo ca chuole lawmaw yite, cuorasala Khazing khingna a tuepa tie ca chuozaa ta ama hring.
18 I saanu zaw, cuo chuonapa ning ca ata ning tana a cuo! Khrih a dutuv ca a vaw nguoluo tli tapata nama thyi pahaata, Khrih a dutuv a hluvsa ca ata hing amaa vaw nguoluo tli. Cacuonakawta cuo chuonapa ca ata hing tana a cuo tapa kha ma pachang.
19 Iema ca kiema'a taata ama pya tli, cuorasala kiema cawsaa ta za cuo vayi; kiema cawsaa ta za cuo yi sala ca, kiema hne hingta ama aw thluo aa. Cuorasala kiema'a taata ama pyapa hingta pakha hmuota kiema cawsaa cuo vayi tapa kha a paluo sa.
20 Cuorasala niema ca A pathepapaa ta sathu pathuvpa ta cuo ung cate nama bangkhuo ta pachangna nama hnyi.
21 Niema'a luo caa ivya capepa hing biehmisipa nama pachang li nakaw cuo li pata nama pachang nakawta hanghiena ca biehmisipa taata cuo buo vyi tapa kha nama pachangna riypatana a cuo.
22 Ahungma a hanghiepa cata a cuo? Zingsuv ca Khrihnote 2:22 Or Messiah ta cuo vyi a tatuv cata cuo vama? Paa hne Saacapaa a thawpa ca Khrih a dutuv tana a cuo.
23 Saacapaa a thawpa ca Paa zaw kha thaw te, Saacapaa a cuhluopa ta Paa zaw kha a cuhluo.
24 A hruothu baataata nama za thyipa kha nama chunglie pa-aw sa mya ung. A hruothu baataata nama za thyipa kha nama chunglie a aw kieca, niema zaw Saacapaa hne Paa chunglie nama aw aa.
25 Ama hingna Khrih ama hrahring ta bie malienote 2:25 Hluo vie caa-uv lieca aca kuopa yi* a ta. a kuopa chuozaa hringna cata a cuo.
26 Niema dung caa nangpa tie kawlieta hingpa caa hing niema'a luo ivya cape.
27 Ama'a taata nama hmungpa thlaapa kha niema'a lie a aw nakawta ahungtahmuo pacuv a hu va ungciy. Cuorasala ama thlaapa ta hmangting kaw kha aca pacuv pahaayita hne capa aca pacuvpa yi ca hanghiena cuo li pata a hmisipa a cuo pahaata, aca pacuv pahaa yi cata ama chunglie aw tie ung.
28 I saata zaw, ama chunglie aw tie ung. Cakiedyina ama a vaw thueta anguona hnyi'a pate a hmiekunglie nangzaana hnyi li pata ma aw aa.
29 Khrih ca a dang tapa kha nama pachang kieca, adangna a tuepa bangkhuo ca Khazing'a taata a puvpa tana ama cuo tapa kha nama pachangpasie aa.