1 Uvnu hne sieta zaw,note 4:1 Gk Uvnu zaw a chuona lie ta i ri khingpa ca tuokhaata aw'a pate ma Khazing palung ma patluo aa tapa kha namaa cuv ciepa a cuo pahaata namaa zuevie hryly riypata, Abyipa Zingsuv ming ta maca pasu yi. 2 Tahematapakieca Zingsuv ming ta tuokhaatama maca pacuv yi tapa kha nama pachang. 3 Tahematapakieca, Khazing khingna ca niema pathe sa riypa kha a cuo nakawta aparuvsuena kha cahriy tie ung. 4 A pathepa hne pa-uvsathyi aa tlapa luopuv chunglie ta nama pangpa kha tuokhaatama ma uv aa tapa ca nama pachang. 5 Khazing a pachang lipa Jentail ming haata saapa khingna lie kha hring kha ung. 6 Pathiypalung hmisi ta a raaringna maca za pilupa haayita hne maca za changpa haayita, Khazing ca vieriy a thungpa a cuo nakawta, hingpa kawlie hing ahungtahmuo a uvnu hne a sieta kha dungvie kha se. 7 Tahematapakieca Khazing ca a pyalyipa luo cuo li pata pathena luo na malie a ku. 8 Cacuonakawta hingpa pacuvna a thawpa ca cawsaa nawhnyina kha a thawpa cuo li pata niema'a luo Thlaapa Pathe caa pipa yi Khazing kha a thawpa tana a cuo.

9 Nama uvnu hne sieta zaw duena kawlieta ahungtahmuo niema'a luo caa cape a hu vyi, tahematapakieca niema pakha hne pakha a due riypata Khazing pacuv ciepa tana nama cuo. 10 Cahaa cata Masidonia lie a awpa uvnu hne sieta zaw kha nama due hmisi. Cuorasala, duepa zaw,note 4:10 Gk Uvnu zaw cahaa cata tue riypa kha a zue hryly ungla tapata maca pasu yi. 11 Maca pasupa haa yi khata a dieta tah khysa kha a ting ungla, niema nama reta kha hrie ungla, niema kuvta khata nama riy a caw tie ung. 12 Cahaa cata zanglituv tie pa-uvsathyina hne mangthawna kha hmung'a ung cate ahunghmuo a buchuo a hu li pata nama aw aa.

13 Uvnu hne sieta zaw, anguopuona a hnyi lipa tie ngiechipa haata nama ngie a chi li riypata a thiypa tie kaw hne a patuv pakha pachang sa li pata ca aw khing vayipuv. 14 Zingsuv ca thiy te a thupakhaa tapa ma zang; cacuonakawta Zingsuv zang te a thiypa ca ama hneta Khazing ta a pathu pakhaa yi tapata ma zang. 15 Canakaw catana, Abyipa bie ta maca tapa yi ca, Abyipa aa vawna te ta a hring kaliepa kiema ta a thiypa tie kha hmiechue khu'a vayipuv tapata a cuo. 16 Tahematapakieca Abyipa ama hrahring kha nawpina ueryi, avuoming uvtuv ueryi hne Khazing hmyakaa ueryi zaw hne khata vuoruo taata za cung'a te, Zingsuv zangna cangta a thiypa tie kha hmietaace ta ama thupakhaa aa. 17 Cakhutaacata avuo lieta Abyipa a taw riypata kiema a hring kaliepa tie kha iema zaw hne cata amyi cungluo khiy calang pata cuo'a pate Abyipa hne chuozaa ta ma aw aa. 18 Cacuonakawta hingpa bie hingta pakha hne pakha kha thaazuo a pi tie ung.