3
1 A chuona lieca ma aw khu li tli nakawta kiema dyi Athens khy lie kha a ngaa pata,
2 ma uvnu hne Khrih thuophaabie phuna kawlie Khazing re ma hrie hnepa Timote kha nama zangna lie a cusa pata namaa daa khuna riypa hne niema thaazuo pi riypata cuose,
3 hing hrisaathieruena nakaw hingta pakha hmuo namaa cahang li riypata niema'a luo ma vya pathlie. Hmisi ta ripa kieca hingpa hmang ang riypa hingta a tlawpa ma cuo pakha niema hrahring ta nama pachang.
4 Niema'a lie ma aw ning kha hrisaathieruena ang riypa hing maca chang pacie yi cuote, ata hing nama pachangna haata a vya tlung hmisi.
5 Capa kawlie cata i aw khu li tli nakawta nama zangna hing khaama a lu tapa pachang riypa hne pasupaliytuv hingta ca pasu ca paliy'a yite ma re hrie ciepa kha a hripa ta cuo'a kie tapata Timote kha i vya pathlie pata a cuo.
6 Cuorasala Timote ca a ru hluota lie kha niema'a taata vya chiy te nama zangna hne duena kaw thuophaa kha malie a vya phya. Kiema ta maca vuosa pahaayita duena hne malie namaa thyi paripa kha malie a chang.
7 Cacuonakawta, uvnu hne sieta zaw,note 3:7 Gk Uvnu zaw ma ngiechi ning hne hrisaathieruena ma ang ning kha nama zangna kaw ma thyipa khata thaazuo malie a pi.
8 Abyipa'a lie a cusa pata namaa daapa kaw ma thyipa ca, ma cuota, ma hringna huv tana a cuo.
9 Niema nakawta Khazing hmielie maa law. Capa bangkhuo kawlie cata ma hnyipa palungtluona kawlie hing Khazing kha tuokhaatama maa law aa?
10 Niema hne hmie a hmung pata, zangna lie nama bupa kha a bya khu riypata chung zuo ta li pata pathiypalung hmisi ta thlaa ma chuo.
11 Ma Paa Khazing ama hrahring hne ma Byipaapa Zingsuv ta niema'a luo maa vawna riypa kha luo malie a chiy thi se.
12 Kiema ta niema maca duena yi a lepa haahingta, niema pakha hne pakha namaa duena hne cawsaa bangkhuo nama duena kha Abyipa ta pale sa ra mangsue.
13 Ima Byipaapa Zingsuv ca a mingpathepa tie hne a vaw thueta, nama pathiypalung thaa kha ca patlung yi sala, ima Paa Khazing hmielie syi riy nama aw li riypata ca pathe sa yi se.