4
Khrih Pangpa Lie Pangkha Cuona
1 Cacuonakawta, Abyipa rehriena kawlie thaw a tlapa kama ta, Khazing ta aca una yi hne aa phuvpa hringzya kha hnyi tie ung tapata paa ica kie yi.
2 Rawcanawna hne palungnena hne palungsyina ta pakha hne pakha kha duena chunglie ta a ngiethe tie ung.
3 Diena chunglie sawpakhawpa thlaapa chunglie pangkha cuona kha nama pahmang khuna riypata nama cuo khuna chung ta a zue tie ung.
4 Niema ca aca ku tiy yi ta a ruechuona suokha chung luo kha kupa nama cuopa haata, pangpa suokha dyi aw te Thlaapa suokha dyina a aw.
5 Abyi pakha, zangna suokha, tiynawna suokha dyina a aw.
6 Khazing pakha dyi aw te cawsaa bangkhuo Paa, hmangting bangkhuo cunglie Byi, hmangting bangkhuo chunglie rehrie te hmangting bangkhuo chunglie a awpa tana a cuo.
7 Cuorasala kiema pakha cyicuo hing Khrih ta malie a pipa lasaw zi haakhata vihnyina pipa tana ma cuo.
8 Cacuonakawta, Caapathepa ta,
"Abyipa ca a suona luo kha a kie tiyta
patuvpa sii a hluvsa kha kiekhyi yite;
A cawsaa kha lasaw a pi yi," a ta.
9 ("A suo luo kie te," a ta tiyta, a ri khingpa khaapatama a cuo? Abyipa ca aa nepa alyi luo na a za cung tanapa ta cuo vama?
10 A raw luo zaa cungpa khana hmangting bangkhuo patling sa diy riypata avuo laata a suo viena luo kha a kie.)
11 Abyipa ta malie a pipa lasaw ca: chekha kha lucuotuv, chekha kha profet, chekha kha thuophaabie phutuv, chekha kha pastor hne chekha kha saya ta cuote,
12 mingpathepa tie ta Khazing re kha hrie the'a yite Khrih pangpa kha ama sathaw na riypata a cuo.
13 Caca zangna hne Khazing Saacapaa pachangna lie kha suvkha ta a tawpakhaw diy pata Khrih a cuona zaa khata a puvtlingpa ma cuo na riypata a cuo.
14 Kiema ca a zyatepa tie dungna hne pacuvna, tiylaw hne thliychie haata a tapa chunglie duvkhing ta pazu bungthawpa, haatiyta haata cuo kha ungsiy.
15 Cuorasala, biehmisipa kha duena ta ri ung sala, ma luv ta a cuopa Khrih chunglie kha a kuoting ta lethaw ungsiy.
16 Luv a cuopa Khrih rawlie ca pangpa chebuo bangkhuo ca thariytha-uo hne cakhiycabuo bangkhuo khata aa rawsa pata pazue diy yite pangkha ta ama cuo. Pangpa chebuo bangkhuo ta iema hrie riypa re kha a phasa pata ama hrie tiyta pangpa suokha yalya khata duena chunglie a lethaw.
17 Abyipa ming ta a cusa pata bie ica cung yi: Zanglituv tie ama awpa haata nama aw riypa cuo va tli. Iema ruenapa ca a hripa tana a cuo.
18 Ama pathiypalung kha a zing. Ama pachang li nakaw hne ama palung a cuo tuv nakawta Khazing pipa hringna taakhata amaa hla.
19 Nangzaa pachang li pata hne a cadangna hne a angna hnyi nguocuo li pata, mang a ngie lipa suena phangting kha ama tue.
20 Khrih phungluo namaa cuvpa ca cahaa cata cuo vyi.
21 Zingsuv chunglie a awpa biehmisipa haakhata, pacuvpa cuo ung cate a kaw kha nama thyi hmisi mangtli.
22 Hietliena ta dung te a parapa nama hringna hlungpa kha thuse riypata pacuvpa tana nama cuo.
23 Nama pathiypalung hne nama ruena lie kha sathaapa nama cuo riypatana a cuo.
24 A hmisipa a dangna hne pathena lie Khazing hmingsuo a lu pata sapa hringna thaa kha a hryi tie ung.
25 Cacuonakawta, hanghiena bie ri kha tie ung. Ma ingpaa tie kha biehmisipa chang kaluo ungsiy. Tahematapakieca chungkhue cawsaa tana ma cuo ung.
26 Na hi hmuo haa ra sala sue tuena te ta cuo kha se. Na hihaa cangta ning patla sa kha.
27 Setaa kha cuo pi kha.
28 A paruvthepa ta paruv kha tie se. Riethyivuosuopa tie zaw a bya khu riypata ama kuv hrahring ta a dangna hne re hrie yi sala viehlue hriy yi se.
29 Nama pakaa taata biechiepa pya kha se. Cuorasala a thyipa tie kha thlahnena a pi riypa hne amaa huna lie a sathawpanote 4:29 Hluo vie caa-uv lieca ama zangna a sathawpa* a ta. a cuo riypata biephapa dyi kha ri tie ung.
30 Khuona ning thue cuota nama caakhena ta a cuopa Khazing Thlaapa Pathe kha a ngie pachi kha ung.
31 Huena, hihaana, bie a ina, bie a pachiena hne pathiypalung pha lipa bangkhuo kha thaw diy tie ung.
32 Zingsuv thueta Khazing ta acaa ngiethenote 4:32 Hluo vie caa-uv lieca malie a ngiethepa haata* a ta. pahaa yi khata nangnena hnyi ungla pakha hne pakha kha a due ungla a ngiethe tie ung.