3
Jentail Ming'a Luo Paul Rehriena
1 Cata a cuo nakawtana kama Paul ca niema Jentail ming cuota Khrih Zingsuv ming ta thaw a tlapa i cuo.
2 Khazing ta niema cuota hingpa re hrie riypa hing a vihnyina thueta ina pipa tana a cuo tapa kha nama pachang diy thluo tli aa.
3 Khazing ta tuokhaatama biephu hmuo pata a bieparuv kha ina pachang sa tapa a cunglie a cawta i cape mangtli.
4 Capa i capepa ca nama ri kieca Khrih bieparuv i pachangna kaw kha nama pachang aa.
5 Ahluo ta ca hing bieparuv hing cawsaa kha za pachang sa vayi. Cuorasala ata hing ca a pathepa ama lucuotuv tie hne profet tie'a lie kha Thlaapa ta a phu mangtli.
6 Capa bieparuv ca: Thuophaabie thueta Jentail ming ca Judah ming hneta ru a cu hnepa, pangkha chunglie chebuo, hne Khrih Zingsuv thueta tuepa biekuona thluechiy a hmung ra riypatana ama cuo.
7 Thuophaabie rehrietuv i cuopa ca Khazing vihnyina lasaw cuote, Khazing ta a cahrana ta a hriepa re lie hing vihnyina ta ina pipa tana a cuo.
8 Kama ca mingpathepa tie hrawlie a cawcepa laata a caw viepa i cuo raalaa pata Khrih hnyirungna a chuo khu lipa thuophaabie ca Jentail ming'a luo ri riypata vihnyina ta ina pi.
9 Hmangting a satuv Khazing chunglie chuo hluvpuv za nupa bieparuv kha cawsaa bangkhuo pahmung sa riypata a cuo.
10 Cata a tuepa ca vuoruo lie a awpa uvtuv tie hne nawhnyituv tie ta Khazing singna phangting zawdya kha Khrihsaabuv thueta ama vya pachangna riypata a cuo.
11 Capaca, chuozaa ta a zaa tingpa haakhata Khazing ta ima Byipaapa Khrih Zingsuv thueta a patlingsapa tana a cuo.
12 Ama thue hne ama ma zangna thueta Khazing'a luo kha riephasapa hne a nguosa pata a ngie khuna ma hnyi.
13 Cacuonakawta niema cuota i angpa ruvnaana nakaw hingta nama palung chuo kha se tapata thlaa i chuo; niema cuota phana selaw tana a cuo.
14 Hingpa kawlie hingta ma Paanote 3:14 Hluo vie caa-uv lieca ma Byipaapa Zingsuv Khrih Paa* a ta. hmielie pakhuv pane pata thlaa i chuo.
15 Ama ca vuoruo hne alyi lie a awpa ingchungkhue bangkhuo ta ama ming ama lanapa hruo tana a cuo.
16 Abyipa ca rungnaa lesyina hne a bipa haata, nama chung luo cawsaa cuona kha a Thlaapa ta thaazuo aca pi riypa yita thlaa i chuo.
17 Niema ca duena chunglie ta a hruo thlapa hne bangpa nama cuopa haata nama zangna thueta Khrih ca nama pathiypalung lie aw mangsue.
18 Mingpathepa tie hne khata Khrih duena a ku zya hne a syi zya, aa suo zya hne aa thuv zya pachang khunapa nama hnyi riypata thlaa i chuo.
19 Cakhutaata pachangna laata a tling viepa Khrih duena kha pachang'a ung cate Khazing tluotlingna hneta nama bi riypata thlaa i chuo.
20 Ma chunglie a cahrana ta re a hrietuv taca maa hie thepa hne ma rue thepa laata hmuo ale ta hmang a tue khu.
21 Khazing ca khrihsaabuv chunglie, Khrih Zingsuv thueta chuozaa taa chuozaa te a ming rungnaa pata aw mangsue. Amen.