14
1 Duena luo kha ziy ungla thlaapa lasaw hmung kha a zue tie ung. A hlyi vie ta profet-biephu rithena kha a zue tie ung.
2 Tahematapakieca thyiliparyi a cyipa ca cawsaa'a lie kha a cyipa cuo li pata Khazing'a lie a cyipa tana a cuo. Tahematapakieca thlaapa chunglie bie aa thuvpa kha ama ri nakawta ahungtahmuo thyi vayi.
3 Cuorasala biephu a ripa tie ca cawsaa hrangpa tie amaa sathawna riypa, thaazuo pina hne hnaa panguona ta ama ri pata a cuo.
4 Thyiliparyi a cyipa tie ca iema hne iema kha a sathaw yite profet-biephu a ripa tie ca Khrihsaabuv kha ama sathaw.
5 Niema bangkhuo thyiliparyi nama cyi riypa icaa khingkhyi raalaa pa yi ta, biephu rithena kha icaa khingkhyi vie yi. Biephu a ripa ca thyiliparyi a cyipa laata aa suo vie. Khrihsaabuv aa sathaw khu riypata pakhakha ta a ri khingna kha a palie ta li pata ca khaahmuo thlahne vyi.
6 Uvnu hne sieta zaw,note 14:6 Gk Uvnu niema'a luo kha thyiliparyi cyi pata a vaw ang sala niema kha Khazing biephu cuose, pachangna cuose, profet-biephu cuose, pacuvna cuose ica hnyi li kie yi ca khaapama a thlahne aa?
7 Hringna a hnyi lipa, tungpa chechiy ta a cuopa, ramang hne tingtuo zaw ama paring cakhawpa hne tana aa lu aa. A ue kha a siesa pata a pya li kieca khaapa ue ma ama tung tapa kha pachang khu a aw'a ma?
8 Hmyakaa a tungtuv ta rietuvna hmyakaa ue pachiy pata a siesa pata a tung li kieca ahungma rie tuv riypata a pachie pacie pata a aw aa?
9 Cahaa cata thyiliparyi nama cyipa ca a ri khingna thyi thepa a cuo li kieca khaapana ama ri tapa kha ahungma a pachang aa? Thliy chunglie bie ri cakhawpa tana a cuo aa.
10 Chuelyi cunglie hing ryi a phangphang ta aw te siyluo a hnyi lipa ryi suokha hmuo aw vyi.
11 Ryi phangkha kha a ri khingna i pachang li kieca a cyituvpa cuo khata kama ca ruohrang ming cuo ang te, a cyituvpa zaw kha kama cuota ruohrang ming tana a cuo ra.
12 Cacuonakawta thlaapa lasaw kha nama hmung khing hringhruo kieca, khrihsaabuv a sathaw riypa lasaw kha hmung a zue tie ung.
13 Cacuonakawta, thyiliparyi a cyipa pakha ca a ri khingna palie khu riypa kha thlaa a chuo se.
14 Tahematapakieca thyiliparyi ta thlaa i chuo kieca, i thlaapa ta thlaa ca a chuo raalaa pata i pathiypalung lieta thlahnena aw vyi.
15 Cacuokie khaapama i tue aa? Thlaapa ta thlaa chuo'a ang te, i pathiypalung ta zaw thlaa i chuo ra aa; thlaapa ta pathuosana hlaa sa'a ang te, pathiypalung ta zaw i sa ra aa.
16 Cacuolikie thlaapa ta thlaa na chuopa kha khaapama na ri tapa a pachang lipa ale cawsaapapaa ta na thlaachuopa kha tuokhaatama "Amen" a ta the aa?
17 Nama ca Khazing kha a phasa pata na pathuo sa raalaa'a pata cawsaa hrangpa cuota ca a sathawna aw vyi.
18 Niema laata thyiliparyi i cyi the vie nakawta Khazing kha i law.
19 Cuorasala, apungna chunglie malie changna riypa taca thyiliparyi biesuo thawhraa i cyipa laata thyipa ryi biesuo suopangaa khana i cyi hriy aa.
20 Uvnu hne sieta zaw, nama khueruena hing haatiy khueruena haata cuo kha se, uvthyita haata khuerue ungla, pha lina kawlie tuv dyi kha haatiy haata cuo tie ung.
21 Phungbie caa-uv chunglie, Abyipa ta,
"Ryi hrangpa a cyipa tie hne
ruohrang ming pakaa taata
hing cawsaa zaw'a luo hing bie i ri aa;
Cakhutaacata hmuota
naa na thlie ngiethie'a vayi," a ta.
22 Cakhutaata, thyiliparyi ca zangtuv tie cuota cuo li pata zanglituv tie cuota pamangsana ta a cuopa haata profet-biephu rithena hing zanglituv tie cuota cuo li pata zangtuv tie cuota pamangsana ta a cuo ra.
23 Cacuonakawta, khrihsaabuv lie zangtuv tie bangkhuo a pung ungla, nama bangkhuo ta thyiliparyi nama cyina lie kha zanglituv tie amaa zaa ngie kie, ama ngaa diy tli muo ca ta'a vayi ma?
24 Cuorasala nama bangkhuo ta profet-biephu kha nama ri kieca, zanglituv a cuo li kie ale cawsaa pakhakha a zaa ngie tiyta, nama bie ta a pathiypalung ruv kha capya'a te a suena a pachang aa.
25 A pathiypalung ruv chunglie'a pakha a kya luo'a te, a pakhuv pane'a te Khazing kha abie te, "Nama hrawlie Khazing a aw hmisi," a ta aa.
26 Cacuokie, uvnu zaw, khaapama ma tue aa? Khazing abie riypata namaa pung tiyta, niema pakha cyicuo ta, hlaa sa a khingpa, a pacuv khingpa, Khazing biephu a ri khingpa, thyiliparyi a cyi khingpa, a ri khingna a palie khingpa tapata nama aw aa. Hingpa bangkhuo hing Khrihsaabuv a sathawna ta tue tie ung.
27 Thyiliparyi a cyi khingpa nama aw kieca pahning a cuo li kie a hluvce ta pathung ta ri yi sala, aa paziy pata ri yi se; cakhutaata pakha ta a ri khingna kha palie se.
28 A palie riypa ama aw li kieca, a dieta tah aw yi sala, iema hne Khazing'a lie kha ri yi se.
29 Profet pahning a cuo li kie pathung ta bie kha ri yi sala, a hrangpa tie ta ama ripa kha ruepacuo yi se.
30 A thaa lie a tu rapa pakhakha'a lieta, Khazing biephu aa luo kieca, a ri taapa ca die se.
31 Tahematapakieca, nama bangkhuo ta namaa cuv the riypa hne thaazuo namaa la thena riypata profet-biephu kha pakha hnang pakha ta nama ri khu.
32 Profet tie pathiypalung phya ta ca profet tie ri kha a ngie aa.
33 Tahematapakieca Khazing ca adang-apuo li pata hmang a tuepa cuo li pata diena Khazing tana a cuo.
(Mingpathepa tie Khrihsaabuv bangkhuo lie ama tuepa haakhata,
34 canung ca apungna lie kha a dieta tah aw yi se. Tahematapakieca iema ca bie rina naw hnyi vayi. Phungbie ta a ripa haakhata, aa ne vie ta aw yi se.
35 Ama pachang khingpa suokhakha a aw kieca ama navaapa kha ing lie hiehriy yi se. Khrihsaabuv lie bie ripa ca canung cuota nangzaa aa chiypa tana a cuo.note 14:35 Hluo vie caa-uv lieca rina 34-35* hing rina 40* khutaa tana a pazue.
36 Khazing bie ca niema'a taata a hruo a thu kanaa? A cuo li kie capa bie ca niema'a luo dyi hing chiy kanaa?)
37 Niema hrawlie ta profet tana i cuo aa tapa tie, a cuo li kie thlaapa cahrana na i hmung aa tapa tie ta, ata niema'a luo i vya capepa caa hing Abyipa bie pipa tana a cuo tapa kha pachang yi se.
38 Hingpa hing khaapatahmuo a ri lipa ca khaapatahmuo ripa cuo'a vyi.
39 Cacuonakawta, viesaa zaw,note 14:39 Gk Uvnu zaw profet-biephu ri kha khing ungla, thyiliparyi cyi kha thlu kha ung;
40 cuorasala hmangting bangkhuo kha aa chawrawsa pata hne adang-apuosa pata tue tie ung.