1 Kama hingta cawsaa ryi a phangphang hne avuoming ryi khahmuo the ra ang sala, duena i hnyi li kieca i ryi ca malie naa a ruepa daakhang pu hne chaaraa pu khana a lu. 2 Profet biephu ri khuna hnyi ang te, bie a thuvpa bangkhuo i pachang diy khutaa pachangna phangting hnyi pata, tluo a hnyi khupa zangna bangkhuo i hnyi zaw ta duena i hnyi li kieca, khaapatahmuo cuo va ang. 3 I hnyipa bangkhuo kha malie pi diy yi ang te i pangpa kha myi ta rue riypata i pi zaw ta, duena i hnyi li kieca khaapatahmuo cuo va ang.

4 Duena ca a palung pasiy te kawpacuo a the. Duena ca malie hietlie vyi, a pale a patie vyi. Duena ca a hruotle li pata 5 a palung chiehruv vyi. Duena ca ama phana dyi kha huv vyi. A hi haa li pata vieriy thung khingna palung hnyi vyi. 6 Duena ca a pha lipa hmang lie a palung tluo vyi, cuorasala biehmisipa lie kha aa law. 7 Duena ca hmangting kha ang khu te, hmangting kha a zang. Hmangting kha a nguopuo te hmangting lie te a maa khu.

8 Duena ca chuo buo vyi. Cuorasala profet biephu zaw ca a chuo aa. Ryi phangting rithena zaw die'a te, pachangna zaw a chuo aa. 9 Tahematapakieca a chebuo dyi pachang pate, bie kha a che dyi ma phu. 10 Cuorasala a tlingpa a vya chiy tiyta a chebuo hing ca a chuo aa. 11 Haatiy i cuo ning kha haatiy haata bie i ri, haatiy haata rue ang te, haatiy haata i ruepacuo. Uvthyita i vya cuo tiyta ca haatiy cuona kha i pachuo sa. 12 Tahematapakieca ata hing ca thlaluo lie a sie pawliy li pata maa hmungpa haata cuo pate, capa thueta ca a hmiepachaw pata ma hmung aa. Ata hing ca a chebuo dyi pachang ang te, capa thueta ca kama kha ina pachangpasie pahaata a bangkhuo ta i pachang aa. 13 Ata hing a hmang paripa hmang suothung aw te; zangna, anguopuona hne duena ta ama cuo, capa suothung chunglie ta a lecepa ca duena tana a cuo.