23
Davi Nho: Lo" Thao" Pyang Dao: Jham
1 Yese nho: yauggai zo: Davi wa Mao"So yang qi" qhang nhao: yaug ngad: ra". Yao: wa Yaku nho: Mao"So yang kho:kham kad' nae" khyin: to: qhug' yaug ngad: ra". Israel byu qe: qhid' mae" gyai gai: ra" nghaui" caung: jham re tung" yaug ngad: ra". Cejham wa Davi nho: lo" thao" pyang dao: jham ngad: ra".
2 Aiwa Asang: byo wa nga" nhad' khyo" jhau: ra".
Yao" mungdao: wa nga" nhad' qid dao mae ngad: ra".
3 Israel nho: Mao"So wa dao: jhau: ava".
Israel nho: gug: gam yaug wa ngore tarha" din: nyang: ru we' eib: ra"
kho:kham Asang re phug' cao" yang: eib: ra" yaug wa-
4 Jham thaui majo; ra" ne, seim mug: bo" mae bao qhui byid' ra" ba we' dakhyo:-
mug: bin: qu thao mhin: gae re kyi nhao byid' ra" ba we' dakhyo: ngad: ra"- ga: ngore ta" ra".
5 Aiwa nga" myid:zo: qere Mao"So khoru: shaman" byid: nae" ru ngad: ra".
Pe"mung:ga"re yao: wa ngo we' apyad ato dao: thang" magai: byo; qeim: ra" myid: vang" khyo-
magai: tha" pye' ra" dao:so: to: yaug ngad: ra".
Aiwa nga" nho: kao bau: ru alhab'- ai wa nga" aung doe; ru ngad: mung:-
Mao"So wa aire dang za: byid' li" nae".
6 Ngadqere: Mao"So malam: ra" mo, wa shapye' pye' qhug' ra" zau: kyin jham we' dau: ra".
Lo,cin: yang aijham re khag' maqo" tin: ngad: ako".
7 Ai: zau: kyin re zaui: nae" qhid' mae" aire jo, to' zai we' lhae tad' ci yang: kad' qo: ra".
Ai: zau: kyin jham jhad' za: nga" lo" li" genae".
Davi Nho: Mang Qi" Ra" Gyezo: Qe
(1 Km 11.10-41)
8 Cebam wa Davi nho: mang qi" ra" gyezo: qe ngad: ako". Sao qhid' yaug wa Takhemon mae" Yosheb Bashebed ngad mung: yao: wa sam yaug: nho: au: jhaung ngad: ra". Yao: wa lhae tad' yang byu she' yo re gye kad' mung: yao: bam alhab' re gye poe dapoe mae za: se' pye' ra".
9 Shid' yaug ein: yaug ngad: ra" mang qi" ra" gyezo: sam yaug mae" dayaug wa- Aho kaung mae" Dodo nho: yauggai zo: Eleaza ngad: ra". Daba mae yao: we' Davi wa gye poe qhid' mae" zang" ham: na ko" ra" Philisti byu qere myo, byo; lhaung: ako". Israel byu qe wa thao khyo zad: phao: ako".
10 Ngadqere: yao: wa yao" jo, qo mae ye; jo, mung: shae zhaug' mae" yao" lo, zhab' magai: pheim lo: de, byaug sho' Philisti byu qere khe' zin" ra". Asang wa ai: ba mae qi: sho' aung doe; ra". Ceru bin thao Israel byu qe wa Eleaza na: ra" jo, qo khyo tug' lo mung: shid mo, mae" gyezai jham re khyad' yu: ako".
11 Sam yaug ein: yaug ngad: ra" mang qi" ra" gyezo: sam yaug mae" dayaug wa- Harara mae" Agee nho: yauggai zo: Shamma ngad: ra". Philisti byu qe wa shagyao: yo jo; ra" Lehi jo, qo mae zang" ham: na: ako". Israel byu qe wa Philisti byu qe: lo, mae" tao" phao: ako".
12 Ngadqere:- Shamma wa ai: yo mae" yao" jo, qo mae ye; jo, mung: aibam re lham: khe' zin: mung: Philisti byu qere se' pye' ra". Asang wa ai ba mae qi: sho' aung doe; ra".
13 Byao gin yo, joe" lo qid re byu sam xe yaug mae" sam yaug wa Philisti byu qe daphung: Rephaim lao: khaung: mae na: jo, shiko" au: Davi na: ra" Adulam laug aug' khyo gyo" ye" ako".
14 Ai: ayo, mae Davi wa gyetab bug gaung mae na: jo; ra". Philisti byu qe daphung: wa Betlehem re sang: yu: pye' ako".
15 Davi wa yham khyo myid mung:- Betlehem qid thaung: mae" qid re dayaug yaug: yang ngore ye khae jhaug' ko" qa: we"- ga: ta" ra".
16 Mang qi" ra" ai: gyezo: sam yaug wa Philisti byu qe: jamu khyo" jhui" kho' lai: ye: gemung:- qid thaung: mae" qid dajhid' re ye khae: yu yang: Davi jhao" cilo: ako". Ngadqere: Davi aire mashaug' ngad: ra". Ai: atha" Asang re qhaug' byid' ra" xeim: khyo" aire vhe' sheim: khyo" pye' mung:-
17 Asang we"- ngo cere khonhae" re: maqo" shaug' yao: bam kao so' dam: pye' ko" ra" mo; sa: re shaug' rure: boe" li" nae"- ga: ta" ra". Aimung: yao: wa aire mashaug' lo: ha: pye' ra". Aijham wa mang qi" ra" gyezo: qenho: vae" ra" lo,mau" jham ngad: ra".
18 Yoab nho: yao: nhaung: Abishai (yao: bam: yao: myhi" wa Zeruia ngad: ra") wa mang qi" ra" sam xe: nho: au: jhaung ngad: ra". Yao: wa yao" lhae tad' yang byu sam yo re mang: zin: mung: ai bam re se' pye' ra".
19 Amung: sam xe qe: phung mae mang qi" li" ra". Yao: wa sam xe mae" mang je: qi" thao" yaug ngad mung: yao: bam: au: jhaung boe" lo: ra". Ngadqere: yao: wa ai: sam yaug qhi" mang maqi: ngad: ra".
20 Kabze mae" Yehoiada nho: yauggai zo: Benaia wa mang qi" ra" gyezo: dayaug ngad: ra". Yao: wa gyai mang qi" ra" Moba gyezo: shid' yaug re se' pye' ru bobo mung: sulhe: mau" myo: sho' re kad' lo: ra". Yao: wa dalhang mae" gyu: khyo" ra" ba daba mae dung:khung: dalam: khyo gyo" ye: mung: khang khyi dadau: re yese' pye' ra".
21 Yao: wa lhae tad' ci: ra" byu gaung qi" ra" Egutu byu dayaug rere: se' pye' ra". Benaia wa yao" thaung kang: yang ai Egutu pho" re lhe: mung: aiyaug nho: lo,mae" lhae tad' re lhad' khyad' yu yang: ai: yaug yao: re se' pye' ra".
22 Cejham wa sam xe mae" dayaug ngad: ra" Benaia nho: sulhe: lo,mau" jham ngad: ra".
23 Yao: wa yao: bam: phaung mae baug thug' ra" yaug ngad: ra". Ngadqere: ai: sam yaug qhi" mang maqi: ngad: ra". Davi wa yao: re yao" kao zaung" au: jhaung kad' nhao: ra".
24-39 Sam xe mae bobo: ra" gaje qe wa
Asahe- Yoab nho: yao: nhaung:
Betlehem mae" Dodo nho: yauggai zo: Elhanan
Harod mae" Shamma we' Elika
Peled kaung mae" Heleza
Tekoa vogaung: mae" Ike nho: yauggai zo: Ira
Anathod vogaung: mae" Abieze
Husha amyu" kaung mae" Mebunai
Aho amyu" kaung mae" Zalmon
Netopha mae" Maharai
Netopha mae" ba na nho: yauggai zo: Heleb
Benyamin mug: Gibea vogaung: mae" Ribai nho: yauggai zo: Ittai
Pirathon amyu" kaung mae" Benaia
Gasha vogaung: lao: khaung: nhae mae" Hiddai
Araba amyu" kaung mae" Abialbon
Behurim amyu" kaung mae" Azamaved
Shalbon amyu" kaung mae" Eliahba
Yashen nho: yauggai zo: qe
Yonathan
Harara amyu" kaung mae" Shamma
Harara amyu" kaung mae" Shara nho: yauggai zo: Ahiam
Maka amyu" kaung mae" Ahasbai nho: yauggai zo: Elipheled
Gilo amyu" kaung mae" Ahithophe nho: yauggai zo: Eliam
Khame amyu" kaung mae" Hezra
Araba amyu" kaung mae" Parai
Zoba vogaung: mae" Nathan nho: yauggai zo: Iga
Gad amyu" mae" Bani
Amon amyu" mae" Zeleg
Berod amyu" mae" Naharai- Yoab nho: gyezai ci byid: yaug
Ira we' Yati amyu" mae" Gareb
Hiti byu Uria bam bobo: ra".
Mang qi" ra" gyezo: alhab' sam xe: nhad' yaug ngad: ako".