22
Davi Nho: Aung Doe; Ra" nghaui" caung:
(Dzh 18)
1 Asang wa Sholu we' yao" gyevo gaje qe: lo, mae" Davi re bin: khyad' yu lao"- Davi wa Asang re ce: nghaui" caung: yang: caung" ra".
2 Asang wa nga" gug: gam yaug- yao: wa gang" tang: ra" nga" gyetab ngad: ra".
3 Nga" Mao"So wa nga" nho: gug: gam ngad mung:
yao" khug mae ngo gug: gam: na:-
Yao: wa go we' dakhyo: ngore gug: gam byid' ra".
Yao: wa ngore vha byid: mung: ngore gug: nhao: ra".
Yao: wa nga" khyad' yu Asang ngad: ra".
Yao: wa ngore gug: gam byid: mung: aqan alan mae" ngore khyad' yu: ra".
4 Ngo Asang re yao mung:
yao: wa nga" gyevo qe: lo, mae" khyad' yu: ra".
Asang re caung:khin" ra" wo"-
5 Shid: ra" bang: lhung" jham wa ngore lhang" kham" to" ako".
Phyo' qheim" ru bang: lhung" jham wa ngore lonhai" pye' ako".
6 Shid: ru nho: gyaug ci" ca" ru wa ngore lhang" kham" to: mung:
lab wa nga" qhid' mae" lha" khae: to" ra".
7 Nga" qug: khai: mae" ngo Asang re khai: ke' ra".
Bao" thaug' ru qhid' mae" nga" Mao"So re ngo khai: ke' ra".
Yao: wa nga" thoe re yao" yham mo" khug mae" gyo: byid' ra".
Bao" thaug' ru qhid' mae" nga" gyi: hug' thoe re yao: tae" gyo" ra".
8 Ailao" myid gaung wa ko, ko, laui" nin" mung: mug:gaung apan wa thug' jhu: yang: nin" ra".
pe"mung:ga"re mao"So wa nhag' yo" ra".
9 Yao" nho mae" myikhug' mad: thug' ke' ra".
Yao" nhad' mae" myishae we' gyang" ra" myi:gyoe: phoe" thug' ke' ra".
10 Yao: wa mug:gaung re akhao: khao: lao" cad' phung" pye' mung: gyo" li" ra".
Yao" khyid qao: mae jham no, thaui: to" to" ra".
11 Yao" kherubin daung dao mae qao: ra" khyo" yao: dao" lo" ra". Yao: wa la: nho: daung jham: dao mae su" lhau: ra".
12 Yao" gaung re mug: cad' yang nghoe' ci: ra".
Qid byang" jo; ra" thau: ra" jham thaui: yao: re lham" kham" to" ra".
13 Yao" qhid' kheim: lhe' cad' mae" myi:gyoe: gyang" mae myishae de; thug' li" ra".
14 Ailao" Asang wa mug:gaung mae" mug: gyug: gyug: mung:
qam: bo: thao" ra" Mao"So: thoe re the' gyo" ra".
15 Yao: wa yao" myo: jham re bag: ke' mung: yao" gyevo qere byo: sin" lo" nhao: ra".
Lhe' cad' cad' yang: yao: bam re tao" phao: lo" nhao: ra".
16 Qid mung" panglai: jo, gyae: wa acin mae ngad mung:
myid gaung: nho: apan aqao: wa manghoe' to: ngad: ra".
Asang yao" gyevo qere qeim: ke' lao"-
nhag' yo: nhag' gyid' yao: bam re kyid' ke' ra".
17 Asang wa tho' mae" yheim" ke' mung: ngore zaui" yu: ra".
Yao: wa ngore qid no, mae" she: thug' yu: ra".
18 Yao: wa qam: bo: ra" nga" gyevo qe: lo,mae" we' ngore ngang: mo, alhab' lo, mae" ngore khyad' yu: ra".
Nga" qhid' mae" wa yao: bam gyai qam: bo: ako".
19 Ngo qug: khai: qhug' au: yao: bam ngore gyekhe' ako".
Ngadqere: Asang wa ngore gug: gam byid' ra".
20 Yao: wa gyaug ci" ca" rumae" ngore bao" yu ra".
Yao: wa ngore ngaui yang: khyad' yu: ra".
21 Ngo jo: ru kad' yang: Asang wa ngore aphug' jhaung qhu" byid' ra".
Ngo qobo maqo" yang: yao: ngore shaman" byid' ra".
22 Ngo wa Asang: tarha" re phug' cao" va".
Ngo wa nga" Mao"So mae" maphaug' lo"-
23 Yao" tarha" alhab' re ngo cao" va".
Yao" amyin" dao: re maphug' cao" makad'.
24 Ngo qobo maqo" ra" khyo rere:-
shad' ra" mau" re ngo makad' lo: zang" pye' ra" khyo rere: yao: ba: ra".
25 Ngo jo: ru kad' yang: yao: ngore aphug' jhaung qhu" byid' ra".
pe"mung:ga"re ngo qobo maqo" rure yao: ba: ra".
26 O" Asang nao wa nao re jhaug' zaug mo, re jhaug' zaug yaug ngad: ra".
Jab byang" mo, re jab byang" sho' gai kad' ra".
27 Nao wa gyang" san: ra" mo; dao mae gyang" san: ra".
Ngadqere: makhyang" ra" mo; dao mae wa gye kad' ra".
28 Nhag' lam: nyham: khyo" ra" mo, re nao khyad' yu: ra".
Ngad beim: mo, re kam" wa nao nyham khyo" pye' ra".
29 Nao Asang wa nga" bo" bao ngad:-
nga" mug: cad' re nao baui" lo" nhao: ra".
30 Nga" gyevo qere khe' zin: nae" qam: so' we'
yao: bam: gyetab re aung: pye' nae" qam: so' nao ngore byid' ra".
31 Ce: Mao"So yao" lo, mau" jham wa khoqhi" jab byang" i?
Yao" dao: thoe jham wa khoqhi" lam ga" i?
Yao" nho: gug: gam re qho: ra" mo, alhab' qhid' mae" yao: wa go we' dakhyo: ngad: ra".
32 Asang dayaug za: Mao"So ngad: ra".
Mao"So dayaug za: ngonhaung" gye vha ngad: ra".
33 Ce: Mao"So wa qam: bo: ra" nga" phao: khug jo, qo ngad: ra".
Yao: wa nga" khyo re gug: gam byid' ra".
34 Yao: wa xe' re" ru: ngore khuxam tang nhao: ra".
Yao: wa bam jham: dao mae ngore gug: nhao: ra".
35 Kyaung: thao" lo,la: re ngo qo" bag nae" qhid' mae"
yao: wa ngore gye poe qhid' mae" mho" byid' ra".
36 O"- Asang we"- nao wa ngore gug: gam byid: mung: ngore khyad' yu: ra".
Ni" nho: bao" thaug' byid' ru wa ngore qi" qhang nhao: ra".
37 Su: yang mathe' taung: sho' nao ngore zam" ci: ra".
Amung: ngo wa khonhae" re: malang:-
38 Nga" gyevo qere ngo cao" khe' mung: yao: bam re aung: pye' ra".
39 Yao: bam re ngo be; lhang" ke' mung: yao: bam maqo" to" ngad: ako".
Yao: bam nga" qhid' kheim: mae seim" yang: lang" jo; ako".
40 Gyekhe' poe qhid' mae" nao ngore qam: o: byid: mung:-
nga" gyevo qere aung: pye' nhao: nae".
41 Nao wa nga" gyevo qere ngo mae" tao" phao: lo" nhao: ra".
Ngo re nghang" ra" mo, re ngo se' tam" pye' va".
42 Yao: bam wa bao" yu nae" rure qho: ako". Ngadqere: yao: bam re khag' mabao" ngad: ako".
Yao: bam Asang re khai: ako". Ngadqere: yao: wa matau: ngad: ra".
43 Yao: bam re ngo khyoe' pye' mung: yao: bam wa phalhug boe" pye' ako".
Ngo wa hau" mo" mae" tham: bab: reru: yao: bam re zab: nhe" pye' va".
44 Nao wa tau: lhan" ra" nga" byu qe: lo, mae" ngore khyad' yu mung:-
byumyu" qe: dao mae nga" eib: ra" aya: re dang: jo; nhao: ra".
Ngo maba ra" byumyu" qe ana" ngo eib: ra" qao: mae" mo, boe" lo: ako".
45 Yao: bam nga" thoe re gyo: gelao"-
taungbug byu qe wa nga" qhid' kheim: mae goe; gyo" mung: nga" mho dao: gyo" ako".
46 Yao: bam vae" ra" myid baui" byaug mung:
yao: bam: gyetab jham mae" ko, ko, nin" thug' li" ako".
47 Asang daui: na: ra"- ngore gug: gam yaug re caung:khin" ge,.
Ngo re khyad' yu: ra" yaug Mao"So: qam: bo: ra" qi" qhang khyo re ta" hau: ge,.
48 Yao: wa ngore nga" gyevo qere aung: pye' nhao: ra".
Yao: wa byumyu" qere nga" qao: mae na nhao mung:-
49 Nga" gyevo qemae" ngore khyad' yu: ra".
O"- Asang we"- ngore nga" gyevo qere aung: pye' nhao la,-
Aqan alan byu qe: lo, mae" ngore gug: gam byid: la,-
50 Aimung: byumyu" qe: phaung mae ngo nao re caung:khin" ra".
Ngo nao re nghaui" caung: yang: caung:khin" ra".
51 Mao"So wa yao" kho:kham re qi" qhang: ra" aung doe; ru byid' ra".
Yao: wa yao" yang khyin: san: to" ra" yaug Davi re we' yao" myid:zo: qere apyad ato mae mabaui mabyo; ra" jhid'de; myid qhu" byid' ra".