17
Hushai yang Absalom Re Khyo Jhui" Nghung" Ru
1 Dayo, zo: kyo thao Ahithophe wa Absalom re ngore byu datug: shid' taung khyin: yu nhao la,- ana" myi ngo Davi thao cao" khe' nhao: ke' nae".
2 Yao: myaung: yang: nhag' lam: gyug' na: au: ngo yao: re yekhe' zin: nae". Yao: wa gyaug: din: li" nae". Yao" byu qe alhab' wa tao" phao: lo" li" genae". Ngo wa kho:kham re za: se' nae".
3 Ai: thao yao" byu qere alhab' wa- myhi" sag' wa yao" yham sang pho" jhao" tug' lo: na: ru we' dakhyo: nao jhao" jhui" tug' lo byid: nae". Nao se' nug ru wa dayaug za: ngad: ra". Dang: ra" mo, wa gug: gam: li" genae"- ga: ta" ra".
4 Ceru wa Absalom we' Israel au: jhaung qe alhab' mo, qhid' mae" gai: ra" pha,jhi" byid: dao: ngad nhohab mung: ra".
5 Absalom wa ana" Hushai re lhau" khai: lo: qu" shige,- yao: ta" ra" dao: rere: tae" gyo" qu" gelang:- ga: ta" ra".
6 Hushai joe" lo lao"- Absalom wa yao: re ceru wa Ahithophe ngonhaung" re byid' to" ra" pha,jhi" ngad: ra". Ngonhaung" aire cao" zai i? macao" zai ngad: re wa- pe" kad' nae" rure nao ngonhaung" re ta" kyo: la,- ga: ta" ra".
7 Hushai wa ana" lhang Ahithophe yang nao re byid' ra" pha,jhi" byid: dao: wa magai ngad: ra".
8 Ni" pho" Davi we' yao" byu qe wa gyekhe' gyai doe, mo, ngad ko" rure we' yao: bam wa vae nau" lhad' yu: pye' byid' qhug' ra" vae myhi" we' dakhyo: tin: ra" mo, ngad: rure nao ba: ra". Ni" pho" wa thaung" qhug' qu" ru myo: va" ra" gyezo: dayaug ngad: mung: yao: wa myi" re yao" gyezo: qe we' mana ngad: ra".
9 Ana" ce: ayo, mae yao: wa laug aug' mae mangad: lao"- jo, qo gatau mae vho' na: jo; li" nae". Davi yang ni" byu qere li" khe' zin: we' ai: lau thoe re the' gyo: mo, yaug khao: ngo" wa ni" byu qe jeim: vako" ra"- ga: ta" li" genae".
10 Ailao"- khang khyi jham qhi" vae" mo, ngad: ra" lhe" thao" ra" mo, lhao" re:- ni" pho" wa gyezo: gai dayaug ngad mung: yao" byu qe wa gyekhe' doe, mo, ngad: ra" khyo re Israel mung" mae" yaug khao: ngo" ba geyang: gyaug: li" genae".
11 Nga" pha,jhi" byid: dao: wa mung"dan: geim" mae" Israel byu alhab' re panglai: qid yae mae" ma coe nho" khai: zhang" yu mung: ai bam re nao yao: gye poe khyo au: jhui" she: ye: wa,.
12 Ngonhaung" wa Davi khai: mae na na yeqho yang: yao: pe" mabeim: shire yekhe' zin: nae". Yao: we' yao" byu qe dayaug re: madang genae".
13 Yao: wa vogaung: dalam: lam: khyo phao: vao lao" yang: ngad: re- ngonhaung" byu qe alhab' wa jam pha: taui: yu ci yang: ai: vogaung: re lao: khaung: khyo she: khyo" pye' nae" ngad:- bug gaung au: mae laug baui dabaui re: madang: jo, nae"- ein: ru ngad:- ga: ta" ra".
14 Absalom we' Israel byu qe alhab' wa- Hushai nho: pha,jhi" byid: dao: wa Ahithophe byid' ra" tho' je: gai: ra" ga: ta" ako". Asang wa Absalom nho: dao mae kyi" khyag' ru joe" li" shao:- Ahithophe byid' ra" pha,jhi" byid: dao: agai re macao" genae" khyo: myid: phyid' to" ra".
Davi Re Ye Peim: Byid' Ru We' Phao: Loe; Lo" Ra" Khyo
15 Ai: thao Hushai wa khinjaung Zadog we' Abiatha re Absalom we' Israel au: jhaung qere yao: pe" pha,jhi" byid' to: va" ru we' Ahithophe pe" pha,jhi" byid' to: va" khyo ta" kyo" ra".
16 Hushai wa- ana" phyad mung ge,- Davi jhao" byu nhao: ke' mung: din"pyad' yo mae" qid gyaung: gau" de; ra" jo, qo mae myi" re maye: na nae" we' yao: we' yao" byu qe alhab' taung" yu yang: se' pye' ru maqhug' genae" qhid' mae" Yodan gyaung: re ai jao" yao: gau" de; ye: genae" rure yeta" kyo: nhao ge,- ga: ta" ra".
17 Abiatha nho: yauggai zo: Yonathan we' Zadog nho: yauggai zo: Ahima wa Enroge qid thug' jo, qo Yerusalem taung gaung mae lao" na: ako". Pe"mung:ga"re yao: shid' yaug wa vomo" khug khyo vao ye" re su: yang lham: myao: pye' nae" gyaug: ako". Daui daui myiqe: nau" dayaug khonhae" re: ye: mung: pe" boe" na: ra" khyo yao: shid' yaug re yeta" kyo: mung:- ai:thao yao: shid' yaug re: kho:kham Davi re yelhaung" ta" kyo" ako".
18 Ngadqere: daba mae yao: shid' yaug airu kad' rure yauggai nau" dayaug the' myao yu mung: Absalom re lo" ta" kyo" ra". Aimung: yao: shid' yaug wa Bahurim mae" byu dayaug yham khyo phao: vho' nae" ga: hin: ye" lo" ako". Byu aiyaug wa yao" yham nhae mae qid thaung: dalam: qo" ra". Yao: shid' yaug wa aikhyo gyo" vao ye" ako".
19 Byu aiyaug: yham sang myhi" wa anghoe' re yu yang: ai qid thaung: nhad' mae phyid: myhung" ke' mung: khag' re: maba: qu" nae" qhid' mae" ai: dao mae gaug lhe' to" ra".
20 Absalom nho: gyezug: qe ai: yham khyo joe" li" mung: myiqe: myhi" re Ahima we' Yonathan khai: mae na: ko" ra" i? ga: myid' ako". Myiqe: myhi" wa yao: shid' yaug qid gyaung: gau" de; ye" lo" avako" ga: tau" ra". Ai: byu qe wa yao: shid' yaug re qho gengadqere: mamyao ko" ngad: ra". Aimung: yao: bam Yerusalem khyo dam: tug' lo: ako".
21 Yao: bam to" lo" gethao- Ahima we' Yonathan wa qid thaung: mae" thug' li" mung: kho:kham Davi re lau thoe ye kyo" ako". Yao: shid' yaug wa Ahithophe wa yao: re gye kad' yang: yaung: to" va" khyo Davi re ta" kyo: mung: qid gyaung: re phyad gau" de, wa,- ga: ta" ako".
22 Aimung: Davi we' yao" byu qe wa Yodan gyaung: re gau" de, mung: mug: bo" lao"- yao: bam alhab' bin: gau" de; ako".
23 Ahithophe wa yao" pha,jhi" byid: dao: re macao" byid' rure ba lao"- yao" loze mae do; zaung yang: yao" vogaung: khyo tug' phao: lo" byaug: ra". Yao: mau" jham re yao: we' yao: bin: kad' thao- yao: yao: jui" shid: pye' ra". Yao: re yao" yham byu qe: lab mae nyhab' pye' ako".
24 Absalom we' Israel byu qe Yodan gyaung: bin: gau" de, ko" ra" ayo, mae Davi wa Mahanaim vogaung: khyo joe" ye" ra".
25 (Absalom wa Yoab nho: gyezug: jo, qo mae Amasa re san: to" ra". Amasa wa Ishmae amyu" Yetha nho: yauggai zo: ngad: ra" yao: myhi" wa Naha nho: myiqe: zo:- Yoab yao: myhi" Zeruia nho: yao: nhaung: Abigai ngad: ra".)
26 Absalom we' yao" byu qe wa Gilead mung" mae jamu kad' na: ako".
27 Davi Mahanaim khyo joe" ye: lao"- Amon mung" mae jo; ra" Raba vogaung: mae" Naha nho: yauggai zo: Shobi Lodeba mae" Ammie nho: yauggai zo: Makhira we' Gilead mung" Rogelim mae" Bazilai bam: yang yao: re li" tug: yu: ako".
28-29 Yao: bam wa bam jham- zhogam: ug' jham- yab qo jham- Davi we' yao" byu qe: qhid' mae" zo:ve jham- jung: gaug- bale gaug- cin man"- gaug shin: shagyao:- gyao: jid' bang"- byoyhid- nug' xau khai"- xau pe'- yao jham re cili" byid' ako". Davi we' yao" byu qe din"pyad' yo mae vae: moe; qid shab' mung: dug: myaung: ko" rure yao: bam ba: ako".