16
Davi We' Ziba
1 Davi bug gaung au: mae" dajhid' lai: lo" byaug lao"- Mephiboshed nho: daui daui yaug Ziba we' nyag din taung" jho" qhug' ra". Yao: wa mug shid' yo khai"- sabyi shi: kyaug' kaug' dayo- shi: dayo tang:- sabyi qang: byang" sho' bo: ra" shoqid thaung dathaung seim" vhin: to" ra" loze shid' dau: jhui" ra".
2 Kho:kham Davi wa- ai gu: alhab' pe" kad' nae" i? ga: myid' ra". Ziba wa loze shid' dau: wa Asang kho:kham nho: yham byu qe zaung nae"- mug we' shi: jham wa byu qe zo: nae" we' din"pyad' yo mae yao: bam su" myaung: gelao" shaug' genae" qhid' mae" ngad: ga: tau" ra".
3 Kho:kham pho" wa ni" asang Sholu nho: yao: myid: Mephiboshed khai: mae na: i? ga: myid' ra".
Ziba wa yao: wa Yerusalem mae na: jo; ra". Pe"mung:ga"re Israel byu qe wa yao: phug' Sholu nho: mung"dan: re ana" yao: re dam: byid' li" genae"- ga: yao: myid: lam: na yang: ngad: ra"- ga: tau" ra".
4 Kho:kham pho" wa- Mephiboshed sang: ra" gu: ja: khao ngo" ni" mae" ngad: ra"- ga: ta" ra".
Ziba wa ngo wa ni" daui daui yaug ngad: Asang kho:kham we"- ngo nao re khonhae" re: qo" ngaui nhao vashao: wo"- ga: tau" ra".
Davi We' Shimi
5 Kho:kham Davi wa Bahurim khyo joe" lo lao". Sholu nho: ba nam ug zo: ngad: ra" Gera nho: yauggai zo: Shimi wa yao: re li" qhug' mung: nhang" na: ra".
6 Davi re yao" byu qe we' yao" kao zaung" mo, yang lhang" gam" to: gesho' ngadqere: Shimi wa Davi we' yao" zug: qere laug baui: yang pye' qhid: li" ra".
7 Shimi wa thug' lo" wa,- thug' lo" wa, byu se' yaug- yug: hab'-
8 Nao wa Sholu nho: mung: dan: re lhad' yu: mung:- ana" wa Sholu nho: yham byu qe mae" myo: sho' yaug re nao se' pye' ru mathao mae Asang wa ana" nao re qobo dae byid' na: ra". Asang wa ni" mung"dan: re ni" yauggai zo: Absalom re byid' pye' ava". Aimung: byu se' yaug we"- nao byo; qeim: ava"- ga: shad' mung: ta" ra".
9 Yao: myhi" ngad: ra" Zeruia nho: yauggai zo: Abishai wa kho:kham pho" re Asang kho:kham pho" we" nao re ce: lakha" yang pe"mung: nhang: nae" akhang" byid' i? Ngo re ai: khyo ye: mung: yao: au: re yephyid' pye' nhao la,- ga: ta" ra".
10 Kho:kham pho" wa Abishai we' yao: mao: Yoab re- ce wa ni" shid' yaug mau" mangad:- yao: wa Asang: yang nhang" nhao yang: ngore nhang" ngad: re yao: ai: khyo: pe"mung: kad' i? ga: myid: nae" akhang" khag' qo" i?
11 Amung: Davi wa- Abishai we' yao" zug: qe alhab' re- nga" yauggai zo: wa ngore se' nae" seim" na: ra". Aire naonhaung" pe"mung: ce: Benyamin byu re naonhaung" qu" mug' ko" i? Asang wa yao: re nhang: nae" ta" to" ra". Aimung: yao: re sae za: nha: to: ge, airu: nhang" na vashao:-
12 Asang wa nga" kyi" khyag' rure qu" xam" yu mung: yao: nhang" ra" dao: thoe mae atha" khyo" ngore shaman" jeju daqhae: byid' re byid: maba- ga: ta" ra".
13 Aimung: Davi we' yao" byu qe wa- khyo cao" yang: xo' ye" lo" ako". Shimi wa yao: bam re cao" myhi: lo mung: bam khyid mae su" na: ra". Yao: wa su: zo" nhang: mung: yao: bam re laug baui we' phalhug pye' sheim" ra".
14 Kho:kham we' yao" byu qe alhab' wa Yodan gyaung: mae joe" ye: gelao"- su" myaung" byaug gemung: yao: bam aimae thang: na: ako".
Absalom Yerusalem Mae Na: Ra" Khyo
15 Absalom we' Israel byu qe alhab' Yerusalem khyo vao ye" lo" ako". Aimung: Ahithophe re: yao: bam we' daga" ngad: ra".
16 Davi nho: lam ga" ra" ba nam Hushai wa Absalom we' qhug' lao" yao: wa- kho:kham pho" kao qhang vashao: wo"- kho:kham pho" kao qhang vashao: wo"- ga: hug' ra".
17 Absalom wa ni" ba nam pho" Davi re nao jhaug' zaug: ru wa pe" boe" byaug va" i? Nao yao: we' pe"mung: daga" macao" i? ga: yao: re myid' ra".
18 Hushai wa- ngo khoru: gai: cao nae" i? Ngo wa Asang: yang- ce: mo, byu qeyang Israel byu alhab' yang khyin: yu: ra" yaug: shad' mae bode; ra". Ngo nao we' daga" na nae".
19 Aitho' mago"- nga" asang: yauggai zo: re macaung da" lo:- khag' re ngo caung da" nae" i? Ngo wa ni" pho" re caung da" lo: ru we' dakhyo: ana" ngo nao re caung da" byid: nae"- ga: tau" ra".
20 Ailao" Absalom wa Ahithophe shad' lhang mung:- ana" ngonhaung" wa cemae joe" na va". Ngonhaung" pe" kad' nae" rure nao pe" pha,jhi" byid: nae" i? ga: ta" ra".
21 Ahithophe wa kho:kham kho" re qu" caung nae" ni" pho" nha: to: co' ra" ni" pho" nho: myingai qe we' gaung sho: ye zam" wa,. Ailao"- Israel mung" mae" yaug khao: ngo" wa ni" pho" wa nao re yao" gyevo khyo" sun" to" re ba: li" genae". Amung: ni" thao cao" mo, wa qi: sho' qam: qo" li" genae" ga: tau" ra".
22 Aimung: yao: bam wa kho:kham kho" khaung dao mae Absalom qhid' mae" zaung dalam: kad' byid' ako". Amung: yaug khao: ngo" myao jao: mae ai: khug khyo vao ye: yang: yao: pho" nho: myingai qe we' gaung sho: zam" ra".
23 Ai: ayo, gu: mae Ahithophe nho: pha,jhi" byid: dao: pe" ja: rere: Mao"So: mungdao: yao: ngad: ru we' dakhyo: khae: yu: ako". Davi we' Absalom shid' pha" geim" aire cao" ako".