11
Davi We' Betsheba
1 Thao: zin- zin vao kheim: kho:kham qe gye lhaung" khe' ko" ra" ayo, joe" lao"- Davi wa Yoab we' yao" gyezug: qe- Israel gyetab qere gyekhe' nhao: ke' ra". Yao: bam wa Amon byu qere aung: pye' mung:- Raba vomo" re vang" lhaung" ci: ako". Davi yao: yao: wa Yerusalem mae na: jo; ra".
2 Daba mae" myi" thao zo" re- Davi wa dazab lhau" yab: rumae" to" mung: kho:kham kho" khaung dao khyo do, lo" ra". Adao khyo su" do, lo" na: au:- myiqe: dayaug gaung cid' na: rure Davi myao: ra". Yao: wa gyai yaung" yaug ngad: ra".
3 Aimung: Davi wa yao: khag' ngad: rure ye: myid: nae" qhid' mae" lagyo: nhao: ke' mung:. Ai: yaug wa Eliam nho: myiqe: zo: Betsheba ngad mung:- Hiti byu Uria nho: yham sang myhi" ngad: rure ba: yu: ra".
4 Davi wa yao: re ye jhui" yu nae" lagyo: qere nhao: ke' ra". Yao: bam wa Davi jhao" yao: re jhui" lo: ako". Davi wa yao: we' gaung sho: jho" zam" ako". (Yao: wa mai bin: ci mung: caung" pa" thung" khyo" kyang" san ru ai: au: shi" bin: to" ra" ayo, ngad: ra") ai:thao yao: wa yham khyo phao: lo" ra".
5 Ai: thao yao: gaung la: va" rure beim: lao" Davi re yeta" kyo: nae" dao: pyang: ke' ra".
6 Ailao"- Davi wa Yoab re- Hiti byu Uria re ngojhao" nhao: ke' wa,- ga: dao: pyang: ke' ra". Airumung: Yoab wa yao: re Davi jhao" nhao: ke' ra".
7 Uria joe" lo lao"- Davi wa yao: re- Yoab we' gyezo: qe gai: na magai: na- gyekhe' ru khoru: ngad: ra" khyo myid' ra".
8 Ai: thao yao: wa Uria re- yham khyo dazab lo" mung: lo" no" yu wa,- ga: ta" mung: Davi wa yao" yham khaung qhid' mae" jhaung qhu" vhin: ke' ra".
9 Ngadqere: Uria wa yham khyo malo" ngad: ra". Ai: atha" yao: wa kho:kham kham: zang mae kho:kham nho: gug: gam qe we' daga" yab: ra".
10 Uria yham malo" rure Davi the' gyo" ra". Davi wa yao: re- nao wa yham we' gyai gao: thao ana" za: tug' joe" lo: ra". Pe"mung: nao yham khyo malo" i? ga: myid' ra".
11 Uria wa Israel byu qe we' Yuda byu qe wa gyekhe' poe khyo yena: jo, mung: Dao: Thang" Ban" re: yao: bam we' daga" ngad: ra". Nga" zug: pho" Yoab we' yao" gyezug: qe wa- seyo taung gaung mae jamu kad' na: ako". Ngo wa yham khyo lo" mung: zo: shaug' ru we' nga" yham sang myhi" we' ngo khoru: lo" qo" yab nae" i? Ngo wa airu" ra" mau" re khonhae" re: makad' nae" rure gyang" lho" ja: alhab' re lao: yang: ngo jham tang" ra"- ga: tau" ra".
12 Airumung: Davi wa- ailao" wa dang: ra" ba gu: mae cemae thang: na wa,- ne, mo" ba ngo nao re dam: tug' nhao: ke' nae"- ga: ta" ra". Amung: Uria wa Yerusalem mae ai: ba we' thao: ba thang: na: jo; ra".
13 Davi wa yao: re myi" xeim khai zho: mung: yhid jhaug' yhid' ra". Ngadqere: Uria wa yham khyo maphao lo: dam: na: jo; ra". Ai: atha" kho:kham kho" zaung" ra" qe, mae yao" mai pho' dao mae yab: ra".
14 Thao: ba ne, kao Davi wa Yoab re vhin tung" dakhye' tung" mung: aire Uria lo, khyo" vhin: ke' ra".
15 Yao: wa vhin tung" mae gyekhe' poe thin: ra" qhid' au: mae Uria re jo, qo khyo" byid: wa,- ai:thao tug' phao mung: yao: re se' pye' qhug' nhao wa,- ga: tung" ra".
16 Aimung: Yoab vogaung: re vang" lhaung" to" au:- gyevo qe qam: je: thin: ga: yao: ba: ra" jo, qo khyo Uria re nhao: ke' ra".
17 Gyevo gyephung: wa vogaung: mae" thug' li" mung: Yoab nho: gyetab re gye li" zin" ako". Davi nho: gyezug: daqhae: se' pye' ru qhug' ako". Uria re: aru: se' pye' ru qhug' ra".
18 Ai: thao Yoab wa Davi re gye poe we' sin: yang: lau kyo" ke' ra".
19 Amung: yao: wa lagyo: re- gye poe alhab' khyo re kho:kham pho" re nao bin: ta" kyo: thao-
20 Yao: wa nhag' gyo" yo: mung: nao re pe"mung: aibam re khe' zin: nae" vogaung: khyo ai qhi" te' ye: ko" i? Vang mae" myo: jham re yao: bam bag genae" rure mabeim: ko" i?
21 Gidon nho: yauggai zo: Abimeleg khoru: se' pye' qhug' rure mabeim: ko" i? Thebeza mae myiqe: dayaug vang dao mae" laug lhang pye' khyo" ke' mung: yao: re se' pye' ra". Aire pe"mung: naonhaung" vang shad' khyo ai qhi" te' ye: ko" i? ga: myid' li" nae" kho:kham pho" nao re ceru: lham: myid' re ni" gyezug: pho" Uria re: se' pye' qhug' ava" ein: yao: re ta" kyo: wa,- ga: mho" ke' ra".
22 Aimung: lagyo: pho" wa Davi jhao" ye: mung:- Yoab yang yao: re ta" nae" amyin" byid' ke' rure Davi re ta" kyo" ra".
23 Yao: wa ngonhaung" gyevo qe wa ngonhaung" tho' je: qam: bo: mung: taung gaung shad' pa: din" mae ngonhaung" re khe' zin: nae" qhid' mae" vomo" mae" thug' li" ako". Ngadqere: yao: bam re ngonhaung" vomo" kham: joe" sho' khe' tug' ke' va".
24 Ai: thao yao: bam wa vang dao mae" myo" yang ngonhaung" re bag: ako". Amung: nao Asang kho:kham nho: gyezug: pho" Uria re: se' pye' qhug' ra"- ga: ta" kyo" ra".
25 Davi wa ai: lagyo: pho" re nao: yang Yoab re qam: lo" byid: mung:- qam: mashan nae" qhid' mae" ta" kyo: wa,- pe"mung:ga"re gyekhe' jao: mae khag' shid nae" rure nao maba: ta". Ai: vogaung: re thin: ra" khyo" khe' zin: mung: sang: pye' wa, ein: yao: re ta" kyo: wa,- ga: pyang: ke' ra".
26 Betsheba wa yao" yham sang pho" se' pye' qhug' ra" khyo re the' gyo: lao"- yao" mathao mae kaug' ngug: ra".
27 Kaug' ngug: ra" ayo, lai: byaug lao"- Davi wa yao: re kho:kham kho" khyo li" nae" qhid' mae" khai nhao: ke' ra". Yao: wa Davi yham sang myhi" boe" lo mung: yao" qhid' mae" yauggai zo: dayaug khau byid' ra". Ngadqere: Davi kad' lai: lo: ra" mau" zo" re Asang ma ngaui ngad: ra".