10
Amon We' Suri Byu Qere Davi Aung: Pye' Ru
(1 Km 19.1-19)
1 Dayo, kyo thao Amon kho:kham Naha shid mung: yao" yauggai zo: Hanun wa kho:kham boe" lo: ra".
2 Kho:kham Davi wa yao: pho" Naha ngore kad' ru we' dakhyo: Hanun re jhaug' zaug: ra" ba nam khyo" ngo qhu" byid: ca"- ga: ta" ra". Aimung: Davi wa yao" nhag' de, shono: rure ta" kyo: nae" qhid' mae" lagyo: qere nhao: ke' ra".
Yao: bam Amon mae joe" ye: gelao"-
3 Amon byu au: jhaung qe wa kho:kham pho" re- nhag' de, shono: ru nao re qhu" byid: nae" ce: byu qere Davi nhao: ke' ra" khyo wa ni" pho" re nga: yhe' byid' ru ngad: ein: nao jho: i? Airu mangad: nae"- yao: wa ngonhaung" re qo" aung: pye' nae" qhid' mae" ce: vogaung: re jo" qu" nae" jin" byu qekhyo" yao: bam re ca khyo nhao: ke' ru ngad: ra"- ga: ta" ako".
4 Hanun wa Davi nho: lagyo: qere nhad' maui: dakhye: qaug: pye' byid:- yao: bam mai bau: re zaung thai: khyi" mae lhai" phung" pye' byid: mung: yao: bam re nhao: ke' ra".
5 Yao: bam wa yham khyo tug' phao: lo" nae" gyai qho' ako". Boe" ra" khyo re Davi the' gyo: lao"- yao: bam Yerikho mae na: jo, mung: yao: bam: nhad' maui: dam: yaug: qhang: li" sho' aimae na: jo, genae" dao: pyang: ke' ra".
6 Davi re yao: bam gyevo khyo" kad' pye' va" rure- Amon byu qe beim" ako". Aimung: yao: bam wa Bethariho we' Zoba mae" Suri gyezo: shid' tug- Toba mae" datug: shid' taung- Makha kho:kham we' daga" byu dataung lhaung: yu: ako".
7 Davi wa ai: khyo re the' gyo: mung: gyetab alhab' we' gye yekad' nae" Yoab re nhao: ke' ra".
8 Amon byu qe wa thug' li" mung: yao: bam: vomo" Raba khyo vao ye" ra" kham: mae jo, qo yu: ako". Gatau ngad ko" ra" Suri we' Toba- Makha mae" byu qe wa pa: din" mae jo, qo yu: ako".
9 Yoab wa yao: re qhid' au: shad' khyo" re: nhaung thao" shad' khyo" re: gyevo qe: gyetab: yang gye li" zin: nae" rure ba: qu" ra". Aimung: yao: wa Israel gyezo: qemae" boe" thao" ra" mo, re khyin: yu mung: yao: bam re Suri byu qe shad' khyo myo, nho qang yang jo, qo khyo" to" ra".
10 Yao: wa dang: ra" yao" gyezo: qere yao: nhaung: Abishai" eib: ra" qao: mae nha: to" ra". Abishai wa aibam re Amon byu qe shad' khyo myo, nho qang yang: jo, qo khyo" to" ra".
11 Yoab wa yao: re- Suri byu qe ngore aung: lo" na gelao"- ngore li" bao" yu la,- amung: Amon byu qe nao re aung: lo" na gelao"- ngo nao re li" bao" yu nae".
12 Qam: qhao: mung: vae" myid bo wa,- ngonhaung" byumyu" we' ngonhaung" nho: Mao"So: vomo" jham qhid' mae" qam: ke' yang: mang: zin: gelang: Asang myid: o: ru boe" doe, vashao:- ga: ta" ra".
13 Yoab wa yao" byu qe mang: zin: nae" jhui" ye" mung: Suri byu qe phao: lo" ako".
14 Suri byu qe tao" phao: lo" na ko" rure Amon byu qe myao gelao"- yao: bam re: Abishai mae" phao: lo" mung:- vomo" khug khyo tug' phao: lo" ako". Ai: thao Yoab wa Amon byu qere mang: zin" rumae" tug' lo mung: Yerusalem khyo tug' phao: lo" ra".
15 Suri byu qe wa yao: bam re Israel byu qeyang aung: pye' va" rure beim" ako". Aimung: yao: bam: gyetab alhab' re khai: zhang: ako".
16 Kho:kham Hadadeza wa Uphrad Gyaung: ba thug' shad' mae na ko" ra" Suri byu qere khai nhao: ke' mung:- yao: bam wa Zoba kho:kham Hadadeza nho: gyezug: mo" pho" ngad: ra" Shobag na: ra" mug: Helam khyo joe" lo: ako".
17 Ai: khyo re Davi gyo: lao"- yao: wa Israel gyetab re lhang: yu mung: Yodan gyaung: re gau" de, yang: Helam khyo ye" lo" ako". Aimae Suri byu qe wa yao: re myo, nho qang yang: jo, qo yu: to" ako". Gyekhe' poe qhid mung:-
18 Israel byu qe wa Suri gyetab re dam: khe' tug' ke' ako". Davi we' yao" byu qe wa Suri gyekhe' myao: lhin" keim" ra" mo, nhad' yo yaug- myao: jui: mo, byid tug yaug re se' pye' ako". Yao: bam wa gyevo gye zug: pho" Shobag re dae te' mung: gyekhe' jao: mae shid: ra".
19 Hadadeza eib: ra" qao: mae na: ra" kho:kham qe wa yao: bam re Israel byu qeyang aung: pye' ko" rure beim" ako". Yao: bam wa Israel byu qe we' mang: dae tae" yu mung:- Israel byu qenho: eib: ra" qao mae na mo, boe" lo: ako". Amung: Suri byu qe wa gyaug yang: Amon byu qere mabao" loko" ngad: ra".