2
Mao"So: Dao: Kho' Ru
1 Nga" ba nam pho" we"- nao wa su gaje re dao: kho' nae" akhang" qo" i? Nao wa khoru" ra" yaug ngadqere: dao: kho' ra" akhang" dajhid' re: maqo" ngad: ra". Pe"mung:ga"re nao wa su gaje qere dao: kho' mung: yao: bam shad' lhoe" ra" qobo re naoyao: re: shad' lhoe" re wa naoyao" gaung naoyao: dao: phyid' yu: ru ngad: ra".
2 Airu: makhyang" ra" mau" zo" zaui: so" ra" mo, re Mao"So: dao: kho' ru wa tarha" ru ngad: ru ngonhaung" ba: ra".
3 Ngadqere: su gaje qere dao: kho' ra" qobo re naoyao: shad' lhoe" ra" yaug nga" ba nam pho" we"- Mao"So: dao: kho' rumae" qo" phao: loe, nae" ein: nao jho: i?
4 Airu: mangad: lao"- nao wa Mao"So: qi" qhang: ra" nhag' khyag' shogu ru- zang: kham: ru we' nhag' lam: qhang: ru jham re nao maphug' makhyad' kad' i? Pe"mung:ga"re Mao"So wa nao re myid tha" lo sho' khyoqhid' au: she: na: ruyang Mao"So wa nhag' khyag' shogu: yaug ngad: rure gaigai: yao: nao ba: ra".
5 Ngadqere: nao wa nhag' lam: qao yang: myid matha" ruyang Mao"So: nhag' yo" ru de" thug' li" nae" ra" ba na- din:man" ra" khyo" dao: kho' nae" ra" ba na mae kham zo: nae" qobo dae re je: qi: naekhyo" nao qaung" na: ra".
6 Pe"mung:ga"re Mao"So wa ngonhaung" yaug khao: ngo" re yao: yao" lo, mau" re cao" yang:- aphug' jhaung qhu" byid' li" nae".
7 Gai: ra" mau" zo" zaui: so" na mung: phungbao- phug' te' nga: yhe' nae" we' maba: shid: ra" kao so' re qho: ra" mo, re Mao"So wa apyad ato: kao so' byid' li" nae".
8 Yao: yao" qhid' mae" za: myid yang: jo: ra" khyo re ngag: pye' mung: shad' ra" khyo cao" ra" mo; dao mae Mao"So wa yao" nhag' gyid' nhag' yo" ra" dae byid' li" nae".
9 Sao qhid' Yuda byu qe- amung: ai: thao re- Taung bug byu qere:- makhyang" ra" mau" zo" zaui: so" ra" byu qe alhab' wa- dayin dayo: no: ru we' qug: khai: qhug' kham zo" li" genae".
10 Ngadqere: din: man" ra" khyo re zaui: mo, alhab' Yuda byu qeshi" sao qhid'- amung: ai: thao re Taung bug byu qere re: Mao"So wa phungbao- phug' te' nga: yhe' ru we' ngaui pyo: yaug yo: ru byid' li" nae".
11 Pe"mung:ga"re- Mao"So wa yaug khao: ngo" re myo, nho nga: lao: makhyin lo: dao: kho' ra".
12 Moshe kham" to" ra" Tarha" re maba ko" ra" Taung bug byu qe qobo shad' lhoe" gelao"- yao: bam wa Tarha" khyo" mangad: lo:- jeim" shid: lo" ako". Tarha" ba: ra" Yuda byu qe qobo shad' lhoe" gelao"- yao: bam wa tarha" khyo" dao: kho' ru qhug' ako".
13 Pe"mung:ga"re xao su byu re Mao"So: yang jo:- ga: sun" yu byid' ru wa- ai: Tarha" re gyo" yu: ruyang za: mangad:- ai: Tarha" mae amyin" byid' to" ra" gu: re phug' cao" ra" khyo" sun" yu byid' ru ngad: ra".
14 Taung bug byu qe wa ai: kham" to" ra" Tarha" maqo" ko" ngad: ra". Ngadqere: ai: Tarha" mae bo: ra" amyin" dao: jham re yao: bam: nhag' lam: aung khug mae yao: yao: ba mung: phug' cao" gelao"- yao: bam wa Tarha" maqo" gesho' ngadqere: ai: aung khug mae ba: ru wa yao: bam: Tarha" ngad: ako".
15 Ai: Tarha" mae bo: ra" dao: jham wa yao: bam: nhag' lam: aung khug mae tung" to" ra" khyo re yao: bam: lo, mau" yang qhu" byid' ako". Yao: bam: nhag' lam: akhug myid re: ceru dangman" ra" khyo re shid' byid' na: ra". Dalhang lhang yao: bam: nhag' lam: wa yao: bam re qobo zhaug' mung: dalhang lhang wa yao: bam re jo: ra"- ga: khin" byid' ra".
16 Airumung: ngo kho" kyo" ra" lau dao: gai we' dakhyo:- ai: dao: kho' ra" ba na mae Mao"So wa Yesu Khristu khyo" yang byu alhab' mo; nho: nhag' lam: khug mae nyham" to" ra" mau" zo" jham re airu: dao: kho' li" nae".
Yuda Byu Qe We' Kham" To" Ra" Tarha".
17 Nao khoru: i? Nao wa naoyao" gaung re Yuda byu ngad:- ga: ta" ra". Amung: nao wa kham" to" ra" Tarha" re lam khug: ru we' Mao"So re ngha yang: phug: ra".
18 Nao wa Mao"So myid o: ra" khyo re ba yaug ngad: ra"- amung: kham" to" ra" tarha" mae" jo: ru we' shad' rure ba: khyin: yu nae" qhid' mae" zhao: yu va" yaug ngad: ra".
19 Amung: nao wa myo, jid jham: qhid' mae" khyo jhui: yaug- mug: cad' khug mae na: ra" mo; mug: bo" ngad:- adu: adae: mo, re mho" shid' ra" yaug- maba mabeim" ra" mo; mho" pho" ngad:- ga: nao gaigai: myid: jho: ra".
20 Kham" to" ra" Tarha" mae laba lajhao we' dangman" ru byang" sho' bo: ga" rure nao gaigai: ba: ra".
21 Nao wa su gaje qere mho" byid: mung: naoyao" gaung re pe"mung: mamho" peim: i? Nao wa su gaje qere magai: khug' ga: mho" kyo: mung: naoyao: wa pe"mung: khug' i?
22 Nao wa su: myi: magai: shad' ga:- ta" mung: naoyao: wa pe"mung: su: myi: re shad' i? Nao wa so sulho jham re ca' mung: naoyao: wa ai: sulho yham mae" pe"mung: lhad' zo" na: i?
23 Amung: nao wa- ai: kham" to" ra" Tarha" re ngha yang: phug: ta" mung:- yao" Tarha" re shad' lhoe" ra" khyo" nao pe"mung: Mao"So re qho' phyo' i?
24 Yuda byu qe: mathao mae Taung bug byu qe wa Mao"So: mang re makhyang: mayao: ra" khyo" jung" gaui: ako"- ga: jham: mugsug' mae ta" to" ra".
25 Amung: nao wa kham" to" ra" Tarha" re phug' cao" yaug ngad: re wa- ni" nho: au: qid lhai" ra" khyo wa phug' de; ra". Ngadqere: nao wa ai: kham" to" ra" Tarha" re maphug' cao" yang: ngad: re wa- khonhae" re: au: qid malhai" ru wa je: gai: ra".
26 Au: qid lhai" ra" khyo makham: yu: ra" Taung bug byu dayaug wa ai: kham" to" ra" amyin" dao: jham re phug' cao" ngad: re wa- Mao"So wa aiyaug re au: qid lhai" ra" khyo kham: yu: ra" yaug khyo" sun" yu byid' li" nae" mangad: i?
27 Yuda byu ngad: ra" nao wa tung" to" ra" Tarha" re qo" ru we' au: qid lhai" ra" khyo re kham: yu sho' ngadqere: nao wa ai: kham" to" ra" Tarha" re shad' lhoe" ra" yaug ngad: ra". Airu: mung: Taung bug byu qe wa naonhaung" Yuda byu qere dao: kho' li" genae"- pe"mung:ga"re yao: bam wa gaung sho: we' sin: yang: au: qid lhai" ra" khyo makham: yu gengadqere: yao: bam wa ai: kham" to" ra" Tarha" re phug' cao" ako".
28 Au: qid lhai: kham: ra" Yuda agyang" wa khoyaug lam: ngad: ra" i? Gaung sho: we' sin: yang: au: qid lhai" ra" khyo re kham: yu mung: adao shad' mae za: Yuda byu ngad: ra" yaug wa Yuda byu agyang" mangad:-
29 Yuda byu agyang" wa- nhag' lam: khug mae au: qid lhai" ra" khyo re kham: yu: ra" yaug za: ngad: ra". Yao: re Yuda byu agyang" boe" nhao: ru wa ai: tung" to" ra" Tarha" yang boe" nhao: ru mangad:- ai wa Mao"So: Byo: yang aung khug nhag' lam: mae Yuda byu boe" nhao: ru ngad: ra". Airu" ra" yaug wa byu: yang caung:khin" byid: qhug' yaug mangad:- Mao"So: yang caung:khin" byid: qhug' ra" yaug ngad: ra".