ROMA
BAO: RE POLU NHO: VHIN TUNG"
(ROMANS)
Dao: Phung"
Polu wa Roma vogaung: phung: khyo ye: nae" myid: yaung: to: mung:- ai: gyaung: khyo qhid' mae" seim" nyhang" ra" khyo" Roma bao: re tung" ke' ra" vhin tung" paug' re tung" ru ngad: ra". Yao" nho: myid: yaung: ra" khyo wa ai: Roma vogaung: mae na ko" ra" Khristan byu qe: phaung mae dayo, zo: mau" zaui: mung:- ai:thao yao: bam: bao" thaug' byid' ru we' Spain mung" khyo xo' ye" lo" nae" ru ngad: ra". Polu wa ce: vhin tung" paug' mae yao: ba: gyo" yu: ra" Khristan lam khug: khyo we' ai: lam khug: khyo re Khristan byu qe lo, joe" phug' cao" kao so' daui: ye: qo: ra" khyo re sho' kyo: byid' ra" khyo" tung" to" ra". Vhin tung" paug' mae Polu nho: jab: thao" ra" mungdao: kai" qhu" byid' ra" khyo bo: ra".
Polu wa Roma vogaung: mae" phung: byu qere au" dao: ta" mung:- yao: bam: qhid' mae" yao: akyu" mho' byid' ra" khyo re bin: ta" thao re vhin tung" tung" ra" khyo ajhaung re ta" ra". Airu wa lam khug: ra" khyo" yang Mao"So: yang byu re khoru: jo: ra" ga: sun" yu byid' ra" khyo re Lau Dao: Gai: yang qhu" byid' ra" khyo ngad: ra". (1.17)
Ai: thao Polu wa ce: khyo ajhaung re aqi: amyhao ta" ra". Yuda byu qe we' Taung bug byu qe maga:- xao su byu qe alhab' wa qobo: nho: qam: so' qao: mae dakhyo: za: na: jo, mo, ngad: ruyang Mao"So: yang jo: ra" ga: sun" yu byid' rure qhug' qo: ra". Byu wa Yesu Khristu re lam khug: ra" khyo" yang Mao"So: yang din:man" ra" ga: sun" yu byid' rure gai: qo" yu: ra" khyo re ta" ra". Ai: thao re Polu wa ce: Mao"So we' zam" khug: ra" khyo asag' khyo" yang qo" yu: ra" Khristu we' dadang: dalam: za: doe; ra" kao so' daui khyo asag' khyo re ta" ra". Lam: khug: ra" yaug wa Mao"So we' mang: dae ngaui pyo : yaug yo: rure qo" yu mung:- Mao"So: Byo: yang qobo we' shid: ru: nho: qam: so' khug mae" lhoe' ke' byid' rure qhug' ra".
Adau qi: (5-8) mae Mao"So: tarha" nho: au: qang khyo re we' lam khug: ra" mo; nho: kao so' khyo mae Mao"So: Byo qam: so' bo: jo; ra" khyo rere: ta" to" ra". Ai: thao re xao su byu qe: qhid' mae" Mao"So: myid: yaung: to" rumae Yuda byumyu" we' Taung bug byumyu" qe khoru: dau vang" nae" khyo ta" sho' to" ra". Yesu re Yuda byu qe:yang ngag: ha: pye' ru wa xao su byumyu" alhab' re Khristu mae Mao"So: nhag' myan" ra" jeju qo" kham zo: nhao nae" qhid' mae" Mao"So: myid: yaung: to" ra" khyo dadau ngad mung:- Yuda byumyu" qe wa khonhae" re: abang mabyid Yesu re ngag: ha: pye' li" genae" mangad: ga:- yao: myid: lam: ra" khyo re ta" yang: dao: pin" ra". Lo" thao" dau mae Khristan kao so' daui khyo khoru: kao so' daui ang: ra" khyo- je yang: su gaje qe we' zam" khug: rumae jhid'de; myid khoru: ci yhung: nae" khyo re ta" ra". Yao: airu: ta" rumae Mao"So re caung da" byid' ra" khyo- mung"dan: re we' su gaje qe: qhid' mae" vin vo, ang: ra" Khristan qe: qo we' aung khug: nhag' lam: khyo we' sin" ra" dao: myid: jham re ta" to" ra". Yao: wa vhin tung" paug' re au" dao: jham we' Mao"So re caung:khin" byid' ra" dao: jham tung" yang: pin" to" ra".
1
1 Lau Dao: Gai re hau" pyo: kyo: nae" qhid' mae" Mao"So: yang khai: yu mung: lagyo: dayaug khyo" khyin: yu: to" ra" Khristu Yesu jeim pho" ngo wa mugsug' tung" ke' ra".
2 Ganhae"- Mao"So wa Yao" Lapa qe: nhad' dao: thoe khyo" yang Lau Dao: Gai re byid: nae" ga: dao:so: byid' to: va" ra" khyo re Gyang" lho" ra" Jham: Mugsug' mae tung" to" ra".
3 Ai: Lau Dao: Gai wa Mao"So: Yao: Zo:- ngonhaung" Asang Yesu Khristu khyo ngad: ra". Yao: wa xao su byu khyo"- Davi myid:zo: kaung mae khau: li" ra".
4 Amung: yao: wa Mao"So khyo"- Mao"So: Yao: Zo: ngad: rure qam: so' mo" we' shid: rumae" dam: daui: to" li" ra" khyo" yang qhu" byid' ava".
5 Byumyu" cao jab alhab' mo, wa Yesu re lam khug: lo mung: phug' cao" genae" qhid' mae" au: jhui" she nae" Mao"So wa ai: Asang khyo" yang Khristu mathao mae ngore ai: lagyo: aya: byid' ra".
6 Amung: Roma vogaung: mae na ko" ra" mo, naonhaung" re: Yesu Khristu byu qe boe" genae" qhid' mae" Mao"So: yang khai: yu: to: va" mo, ngad ko" ruyang ai bam: phung: mae bobo: ako".
7 Airumung: Mao"So jhid'de; yang: yao" amyu" boe" nae" qhid' mae" khai: yu: to" ra" Roma vogaung: bao: alhab' re ngo mugsug' tung" ke' ra".
Ngonhaung" Pho" Mao"So we' Asang Yesu Khristu wa nhag' myan" ru we' yaug yo: ru naonhaung" re shaman" byid: vageshao: wo".
Jeju Caung:khin" Akyu" Mho' Dao:
8 Asang Yesu re naonhaung" lam khug ko" ra" khyo re mug: myid geim" mae hau" nhao" jo; ruyang ngo wa naonhaung" alhab' mo; qhid' mae" Yesu Khristu mathao mae sao qhid' Mao"So: jeju re caung:khin" ra".
9 Ngo ta" ra" dao: dangman" rure Yao: Zo" nho: Lau Dao: Gai re ta" hau" kyo" ra" khyo" yang nga" aung khug nhag' lam: alhab' yang ngo caung da" byid' na: ra" Mao"So yao: yao: nga" sagse: ngad: ra".
10 Ngo akyu" mho' khao: ngo" naonhaung" re ngo myid: beim" na: ra" khyo re Mao"So yao: ba: ra". Mao"So myid o: ra" khyo jo; ngad: re wa celhang wa naonhaung" jhao" ngo qo" li" nae" khyo phung" byid: nae" qhid' mae" Mao"So re ngo akyu" mho' ra".
11 Pe"mung:ga"re naonhaung" nhag' lam: re qam: bo nhao nae" qhid' mae" Byo we' sin" ra" shaman" jeju naonhaung" re gae byid: nug: ruyang ngo wa naonhaung" we' gyai jho" myao nug: ra".
12 Ngo ta" nug: ru wa naonhaung" wa nga" lam khug: myid khyo" yang- ngo wa naonhaung" lam khug: myid khyo" yang dayaug we' dayaug qam: jho" bao" thaug' ru qhug' yu: li" nae" ein: ru ngad: ra".
13 Mao:nhaung: qe we"- ngo wa naonhaung" jhao" li" nae" qhid' mae" myo: sho' lhang seim" qu" va"- ngadqere: daja: ja" yang khonhae" re: kaung: kag' mung:- naonhaung" jhao" maqo" li" ru ngad: ra" khyo re naonhaung" myid: beim: byid: gela,- ngo wa gatau Taung bug byu qe: phaung mae qo" kho" aung: yu: ru we' dakhyo:- naonhaung" phaung mae re: qo" kho" aung: yu nug: ra".
14 Pe"mung:ga"re ngo wa byuyin- byujam:- pha,jhi" ba: ra" byu- pha,jhi" maba: ra" byu alhab' mo; dao mae qo qo" ra" yaug ngad: ra".
15 Airumung: naonhaung" Roma vobyu qere re: Lau Dao: Gai kho" kyo: byid: nae" qhid' mae" ngo kao bau: na: ra".
Ngaui Bau: Lau Dao" Ra" Qam: So'
16 Ngo wa ai: Ngaui Bau: Lau Dao: re myo, cam: tang lam: ra". Aiwa sao qhid' re Yesu re lam" ko" ra" Yuda byu qe alhab' ai: thao re Yesu re lam" ko" ra" Taung bug byu qe alhab' re khyad' yu: ra" Mao"So: qam: so' ngad: ra".
17 Pe"mung:ga"re ai: Ngaui Bau: Lau Dao: wa xao su byu qere Mao"So: yang jo: ra" yaug ngad: ga: khoru: sun" yu: ra" khyo re qhu" byid' ra". Ai: ru wa aqhid mae" lo" thao" sho' lam khug: ra" khyo" yang sun" yu: ra" khyo ngad: ra". Airumung: Jham: Mugsug' mae- lam khug: ra" khyo" Mao"So: yang jo: ra" yaug ngad:- ga: sun" yu byid' ru qhug' ra" yaug wa kao so' daui: na: li" nae"- ga: tung" to" ru we' dakhyo: ngad: ra".
Xao Su Byu Qe Qobo Qo" Ra" Khyo
18 Ai: dangman" ra" khyo myao: thug' li" na: ra" khyo mae tam" to" ra" makhyang" ra" mau" zo" aja: ja: we' qobo alhab' dao mae Mao"So: nhag' yo" rure mug:gaung mae" qhu" byid' ava".
19 Pe"mung:ga"re Mao"So wa yao: yao" khyo re yao: bam re de: de: za: qhu" byid' ava". Airu: mung: yao: bam wa Mao"So: khyo we' sin: yang: gai: ba: ra" gu: re de: de: za: ba: yu: avako". Ce: mathao mae Mao"So wa yao: bam re qobo dae byid' ru ngad: ra".
20 Yao: bam wa Mao"So: yang phan" to: va" ra" ja: jham re qu" mung:- myid gaung re Mao"So phan" ra" ba na mae" maqo" gai: myao: ra" yao" qam: o: we' yao" Mao"So: ve, khyao re de: de: za: qu" ba: yu: avako". Airu: mung: yao: bam wa yao: yao" qhid' mae" ta" qid' yu nae" akhyo majo, loko" ngad: ra".
21 Yao: bam wa Mao"So re ba gengad yang: re: Mao"So re caung:khin" phug' te' byid: ang: ru we' dakhyo:- macaung: khin" byid: ko" ru we' Mao"So re jeju re: mabeim: so: ngad: ako". Ai: atha" yao: bam myid: ra" khyo jham wa akeim boe" pye' mung: yao: bam maba mabeim" ra" nhag' lam: re: mug: cad' cad' no; jo; ra".
22 Yao: bam wa yao: bam yao: pha,jhi" bo: ga:- ta" gengadqere: yao: bam wa adu: adae: mo, ngad: ako".
23 Shid no maba: ra" Mao"So re caung:pa" byid: nae" atha"- yao: bam wa shid no ba: ra" byu- ngho' jham- gug'nyhug' jham we' yoe" du" lhau: ra" ja: gug'nyhug' jham we' dau: ra" khyo" kad' to" ra" sulho jham re caung:pa" byid' ako".
24 Airumung: Mao"So wa ai: byu qere yao: bam: nhag' lam: kao bau: ra" masan masin" mau" zo" re kad' genae" qhid' mae" we' yao: bam yao: cao: aqho' aqhid mau" zo" kad' genae" qhid' mae" shapye' to" ra".
25 Yao: bam wa Mao"So: dangman" ra" khyo re mhug' pyag' ru we' tha" yu: pye' gemung: phan" Asang Mao"So yao: re caung:pa" byid: nae" atha"- Mao"So: yang phan" to" ra" ja: re yao: bam caung:pa" byid: yang: caung da" byid: na: ako". Phan" Asang wa apyad ato caung:khin" byid' ru qhug' vashao: wo". Amen.
26 Yao: bam ceru: kad' ko" ruyang Mao"So wa aqho' aqhid mung: ra" gaung sho" ra" shab' mhin: ru shad' khyo ab: pye' ava". Myiqe: qe lhao" re: gaung sho: jho" zam" na: ra" khyo re yauggai qe we' mangad: lo:- akhyo mangad' ra" khyo" jho" zam" ako".
27 Ai we' dakhyo: yauggai qere: gaung sho: jho" zam" ra" khyo re myiqe: qe we' mangad: lo:- akhyo mangad' ra" khyo" gaung sho: shab' ra" khyo yao: cao: jho" qho: ako". Yauggai qe wa yao: cao: aqho' aqhid mau" zo" kad' ko" ruyang yao: bam shad' lhoe" ra" magai: mau" zo" we' man: qi" ra" qobo dae re yao: bam yao: gag: vo; yu: ako".
28 Ai: byu jham wa Mao"So re Mao"So khyo" mamyid gemung:- Mao"So wa yao: bam mazaui: maso: ang: ra" mau" zo" re zaui: so: genae" qhid' mae" nhag' cad' noyaug myid khyo yao: bam re jhan: byid' ke' ra".
29 Yao: bam wa makhyang: mashab: ru- makhyang" ra" mau" zo" aja: ja:- so' kho' obyid: ru- maca' majhad' ru byang" sheim: jo; ako". Amung: yao: bam wa myid nug' ru- byu se' ru- nhag' lam: kaui: ru- mhug' pyag' ru- mo, byo, qho: ru byang" sho' ngad: ako".
30 Yao: bam wa gaui mho mung: dayaug we' dayaug makhyang" ra" dao: jho" ta" ako". Yao: bam wa Mao"So re nghang" ra" mo,- yao: cao: jho" roe" mung: ngad beim" ru we' phug mo, ngad: ako". Amung: yao: bam wa aphaug' alhag' kad' mo,- yao: bam: myhi" pho" mho dao: re magyo" ra" mo, ngad: ako".
31 Yao: bam wa akyang qeim mo,- dao:so: madang mo,- su gaje re nhag' khyag' myid- kao taui: myid mabo: ra" mo, ngad: ako".
32 Ceru: kao so' daui: ra" mo, wa shid man" ra"- ga: Mao"So: tarha" mae ta" to" rure yao: bam ba gau ngad: ako". Ngadqere: yao: bam wa yao: bam yao: ceru: kao so' daui ko" ru za: mangad:- Airu: kao so' daui: ra" mo, gaje qere re:- jo: ga: qam: byid' ako".