23
Athalia Re Tau: Lhan" Ra" Khyo
(2 Kh 11.4-16)
1 Khinjaung Yehoiada wa khyaug' zin bin: lao" na thao mau" zaui: nae" ayo, joe" va"- ga: myid: phyid' ra". Yao: wa Yehoram nho: yauggai zo: Azaria- Yehohanan nho: yauggai zo: Ishmae- Obed nho: yauggai zo: Azaria- Adaia nho: yauggai zo: Maaseia- Zikhri nho: yauggai zo: Elishaphad ga" ra" gyezug: ngo" yaug we' dao:so: dalam: to" ra".
2 Yao: bam wa Yuda mung" mae" vogaung: jham alhab' khyo gyaung: su" ye: mung: Levi byu qe we' amyu" kaung qenho: au: jhaung qe alhab' re yao: bam we' daga" Yerusalem khyo jhin" lo: ako".
3 Yao: bam alhab' mo, wa Caung:pa" Yham mae zang" ham mung: aimae kho:kham nho: yauggai zo: Yoasha we' dao: thang" dalam: to" ako". Yehoiada wa yao: bam re- Kho:kham kad' thao" yaug: nho: yauggai zo: cemae na: ra" lhe"- Davi nho: myid:zo: qe ngad ca" ga: Asang dao:so: byid' to" ru we' dakhyo: ana" yao: wa kho:kham ngad: ra".
4 Ngonhaung" ceru: kad' bam nae" ngad:- khinjaung qe we' Levi byu qe Dugno: Ba mae mau" li" zaui" na gelao"- yao: bam sam bam mae" dabam: gu: wa Caung:pa" Yham kham: mae zaung" li" genae".
5 Gatau dabam: gu: wa kho:kham vang" re zaung" li" genae". Dang: ra" gu: wa apan aqao: Kham: mae na: jo; li" genae". Mo,byu qe alhab' wa Caung:pa" Yham mae ham: na: li" genae".
6 Mau" ang: ra" khinjaung qe we' Levi byu qemae" je yang: Caung:pa" Yham khyo khag' re: mavao ye: nae". Yao: bam wa aikhyo qo" vao ye" ako". Pe"mung:ga"re yao: bam wa kyang" san: to: qhug' va" mo, ngad: ako". Ngadqere: dang: ra" mo, byu qe wa Asang mho" ra" dao: re phug' cao" mung: taung gaung mae na: jo, ca" ako".
7 Levi byu qe wa yao: bam: shae pyang: she: ci yang: kho:kham nho: lhang" gam: mae gug:gam ca" ako". Kho:kham pho" ye" ra" jo, qo khao: ngo" khyo ye" ako". Caung:pa" Yham khyo vao li" nae" seim" yaug khag' re: se' pye' qhug' li" nae"- ga: ta" ra".
8 Levi byu qe we' Yuda byu qe wa Yehoiada nho: mho" ra" khyo re boe" sho' cao" kad' ako". Gyezug: qe wa mau" vao mo, we' thug' lo" mo, mae" byu qo" genae" qhid' mae" Dugno: Ba mae yao: bam mau" thang gelao"- byu dayaug rere: manhao: thug' ke' ngad: ako".
9 Yehoiada wa gyezug: qere Caung:pa" Yham mae shaung: to" ra" Davi yang sang: lo: ra" lhae tad' jham we' go jham re gae byid' ra".
10 Yao: wa kho:kham re gug:gam byid: nae" qhid' mae" Caung:pa" Yham qhid' kheim: mae shae pyang: she: ci yang: na: jo, mo, we' daga" na: jo; ra".
11 Ai: thao Yehoiada wa Yoasha re jhui" thug' lo" mung: yao" au: dao mae ba maug: zhaung: byid: mung: kho:kham tarha" paug' re qhaug' byid' ra". Airu: yao: re kho:kham kad' nhao: ako". Khinjaung Yehoiada we' yao" yauggai zo: qe wa Yoasha re xau gyad byid: mung: yaug khao: ngo" wa kho:kham pho" kao qhang vashao: wo"- ga: zag: hug' ako".
12 Athalia wa mo, byu qe kho:kham re khin" na thoe re the' gyo: mung: mo, byu qe zang" ham: na: ra" Caung:pa" Yham khyo hin hin ye" lo" ra".
13 Aimae kho:kham asag' wa Caung:pa" Yham phaui: lhab' mae" kho:kham qe: qhid' mae" jaung: to" ra" zang baung: nhae mae gyezug: qe we' labo" mad mo; yang lhang" kham" mung: ye; jo; rure yethe' myao: ra". Mo,byu qe alhab' wa ngaui bau: taung" hug' mung: labo" jham mad: ako". Caung" pa" yham mae" nghaui" thoe ba: ke' mo, wa yao: bam: be; ngaui" ra" zai jham ci yang: poe jham kad' na: ako". Yao: wa yao" mai bau: jham re nhag' lam: thao" ru we' lao" cad' pye' mung: gyevo wo"- gyevo wo"- ga: hug' ra".
14 Yehoiada wa Athalia re Caung:pa" Yham myidgaung khaung: mae manug: se' pye' ngad: ra". Aimung: yao: wa gyezug: qere khai: yu mung: yao: re gug:gam mo, ajin gyo: mae" she: thug' lo" ge,- yao: re khyad' yu nae" seim" yaug khag' re ngadqere: se' pye' ge,- ga: ta" ra".
15 Yao: bam wa yao: re taung" yu mung: kho:kham kho" khyo shae lo" yang: myao: kham: dung: tau mae yao: re se' pye' ako".
Yehoiada Nho: Dam: Nyhang" Ra" Khyo
(2 Kh 11.17-20)
16 Khinjaung Yehoiada wa kho:kham Yoasha re jhui" yu mung: mo, byu qe wa yao: bam wa Asang: amyu" byu qe boe" genae" ga: dao: thang" kad' rumae yao: we' bocao: kad' ako".
17 Ai: thao yao: bam alhab' wa Bala caung:pa" yham khyo ye: mung: aire yephyo' khyo" pye' ako". Yao: bam wa phan re we' solho jham re aimae be; khyoe' mhan" pye' mung: phan qhid' kheim: mae Bala khinjaung Matan re se' pye' ako".
18 Yehoiada wa khinjaung qere we' Levi byu qere Caung:pa" Yham mau" mae au: jhaung kad' nhao: ra". Yao: bam wa kho:kham Davi yang vin vo; nae" jaung: to" ra" mau" jham re boe" sho' kad' mung:- Moshe tarha" re cao" yang: Asang re ngaui" xeim: phad' ngaui" nae" mau" re kad' ako". Yao: bam wa nghaui" thoe we' poe kad' rumae re: au: jhaung kad' ako".
19 Yehoiada wa caung:pa" thung" khyo" masan masin" ra" mo, alhab' re tam" pye' nae" qhid' mae" Caung:pa" Yham kham: dung: rere: gug:gam mo, re san: to" ra".
20 Gyezug: qe- au: jhaung qe- zug: qe- dang: ra" amyu" byu qe wa kho:kham pho" re Caung:pa" Yham mae" kho:kham kho" khyo Yehoiada yang jhui" jin: vao ye" lo" rumae bocao: ye" ako". Yao: bam wa kham: mo" dung: khyo" vao ye: mung: kho:kham wa yao" kho:kham tao" mae zaung: ra".
21 Mo,byu qe alhab' wa ngaui bau: ngaui lho" byang" jo, mung: ana" Athalia wa se' pye' qhug' ava". Vomo" wa yaug yo cae: tae" jo; ra".