22
Yuda Kho:kham Ahazia
(2 Kh 8.25-29, 9.21-28)
1 Arab byu qe damyo" wa gyetab re yekhe' zin: mung: kho:kham Yehoram nho: yauggai zo: zothao" yaug Ahazia mae" je: yang: alhab' re se' pye' ako". Aimung: ana"- Yerusalem byu qe wa Ahazia re yao: pho" khu mae kho:kham kad' nhao: ako".
2-3 Ahazia wa apyad shid' xe: shid' zin mae kho:kham boe" lo mung: Yerusalem mae dazin eib: na: ra". Ahazia re: yao: myhi" kho:kham Ahab nho: myiqe: zo: Israel kho:kham Omri nho: yao: myid: Athalia yang makhyang" ra" mau" kad' nae" yao: re pha,jhi" byid' ruyang kho:kham Ahab nho: yham khaung: ave, re cao" kad' ra".
4 Yao: wa Asang re qobo shad' lhoe" ra". Pe"mung:ga"re yao" pho" shid thao re Ahab nho: yham khaung byu gaje qe yao" pha,jhi" byid: mo, boe" li" gemung: yao: bam wa yao: re jhui" gyoe; gyo" ako".
5 Aibam: nho: pha,jhi" byid' rure cao" yang: yao: wa Suri kho:kham Hazae we' gye jho" zin" rumae Israel kho:kham Yoram we' bozam" ra". Gyetab jham wa Gilead mae" Ramod jo, qo mae jho" khe' zin: mung: Yoram wa gye poe mae dae de; byaug: ra".
6 Yao: wa yao" dae gai nae" qhid' mae" Yezre vogaung: khyo tug' lo" ra". Ahazia wa aimae yao: jhao" lae" ye" ra".
7 Mao"So wa ce: Yoram jhao" lae" ye" rure Ahazia nho: gyoe; gyo" nae" khyo boe" nhao: ra". Ahazia aimae yena: jo; au:- Ahab nho: kho:kham kaung re se' tam" pye' nae" qhid' mae" Asang: yang khyin: to: yaug ngad: ra" Nimshi nho: yauggai zo: Yehu ga: mang yaug wa yao: we' Yoram we' yejho" qhug' ako".
8 Yehu wa kho:kham kaung re Mao"So: yang dao: phyid' rure kad' thug au: Ahazia we' bocao: lo: ra" Yuda au: jhaung qe we' Ahazia nho: zonhaung: qe daphung: we' yejho" qhug' ra". Yehu wa aibam alhab' re se' pye' ra".
9 Ahazia re qho mung: Samari vogaung: mae vho' jo; rure yeqho: myao: ako". Yao: bam wa yao: re Yehu jhao" jhui" lo mung: yao: re se' pye' ako". Ngadqere: yao: bam wa Asang re caung da" byid' rumae yao: qo" boe" qhi" kad' lo yaug ngad: ra" yao: phug' kho:kham Yehoshaphad re phug' myao: byid' ra" khyo" yao" maogaung re nyhab' shaung: ako". Mung"dan: re qo" eib nae" ra" Ahazia nho: yham khaung byu qe dayaug re: madang lo:ngad: ra".
Yuda Kho:kham Myhi" Athalia
(2 Kh 11.1-3)
10 Kho:kham Ahazia nho: yao: myhi" Athalia wa yao" yauggai zo: se' pye' qhug' ra" khyo re ba lao" jao"- yao: wa Yuda kho:kham yham khaung byu qe alhab' re se' pye' nae" qhid' mae" amyin" byid' ke' ra".
11 Ahazia wa Yehoiada ga: mang: ra" khinjaung agyi dayaug we' lo,xo' xo' ra" Yehosheba ga" ra" yao: nhae: mo" bye" dayaug qo" ra". Yao: wa sae za: Ahazia nho: yauggai zo: qemae" dayaug ngad: ra" Yoasha re se' pye' qhug' nae" ngad ko" ra" kho:kham nau" gaje qemae" sab za: jhui" phao: lo" mung: Caung:pa" Yham mae" yab qe, mae" daqe, mae zojhui: byu dayaug we' nyham" to" ra".
12 Yao: wa airu: nyham" to" ra" khyo" yang Athalia lo, mae shid nae" rumae" yao: re khyad' yu: to" ra". Athalia kho:kham myhi" khyo" eib: na: ra" ayo, gyo: mae yao: wa khyaug' zin lam: lam: aimae vho' na: jo; ra".