20
Edom We' Gye Khe' Poe' Boe" Ra" Khyo
1 Dayo, kyo thao Moba we' Amon gyezo: qe wa- yao: bam: ba nam phung: qe- Meunid byu qe we' daga" Yuda mung" khyo jhin" vao li" ako".
2 Lagyo: qe daqhae: joe" li" mung: kho:kham Yehoshaphad re nao re gyekhe' nae" qhid' mae" Edom mae" gyetab mo" zang wa tham: shid thoete' mae" joe" li" avako". Yao: bam wa Hazazon Tama sang: yu: pye' avako"- ga: ta" hau" ako". (Ceru wa Engedi mang gatau ngad: ra".)
3 Yehoshaphad wa gyaug mung: khyoshid' byid: nae" Asang re akyu" mho' ra". Athao yao: wa Yuda mung" geim" zo:ve jao" genae" qhid' mae" amyin" khyo" ke' ra".
4 Yuda vomo" khao: ngo" mae" mung" byu qe wa khyoshid' byid: nae" Asang re akyu" mho' nae" qhid' mae" Yerusalem khyo hin hin ye" lo" ako".
5 Yao: bam we' Yerusalem vobyu qe wa Caung:pa" Yham mae" vang" asag' mae zang" ham: na: jo; ako". Kho:kham Yehoshaphad wa yao: bam: qhid' au: khyo yeye; jo, mung:-
6 Thoe qi: we' O"- ngonhaung" phug' pho" qenho: Mao"So Asang we"- nao wa mug:myid dao mae" byumyu" mung"dan: alhab' re mug: khaung dao mae eib: na yaug ngad: ra". Nao wa kheim: so' we' qam: so' qi" thao" yaug ngad mung: khag' re: nao re gye maqo" kad' ngad: ako".
7 Nao wa ngonhaung" nho: Mao"So ngad: ra". Ni" nho: Israel byumyu" qe ce: mung" khyo byaung" vao lo: au:- cemae na ko" ra" byumyu" qere nao khe' thug' pye' ra". Amung: mung"dan: re ni" ba nam Abraham nho: myid:zo: qere yao: bam qhid' mae" apyad ato khyo" byid' ra".
8 Yao: bam wa cemae na mung: nao re nga: yhe' byid: nae" caung:pa" yham dalam: re yao: bam kad' avako".
9 Yao: bam re qobo dae byid' ru ngad: ra" gye poe- qam" no- bao" khug' khug' ru yao: bam: dao mae kyi" khyag' ru daja: ja: qhug' yang: ngad: re- nao re caung:pa" ra" jo, qo ce: Caung:pa" Yham: nho: qhid' au: mae yao: bam joe" li" mung: li" qo" ye; jo; ako". Yao: bam qug: khai: dayin dayo: mae" yao: bam nao re akyu" mho' mung: nao wa yao: bam re tae" gyo: byid: yang: yao: bam re qo" khyad' yu: ra" khyo re yao: bam ba: ako".
10 Ana"- Amon- Moba- Edom byu qe wa ngonhaung" re gye li" khe' avako". Ngonhaung" nho: phug' pho" qe Egutu mae" thug' lo: au:- yao: bam re aibam: mung" khyo vao ye: nae" akhang" nao mabyid: ngad: ra". Arumung: ngonhaung" nho: phug' pho" qe wa yao: bam re su" lhang" pye' mung: yao: bam re maphyo' qheim" pye' ngad: ako".
11 Yao: bam wa ceru qhid' mae" ngonhaung" re tug' byid: nae" nao yang byid' to" ra" mung" mae" ngonhaung" re khe' thug' pye' nae" joe" li" avako".
12 Nao wa ngonhaung" nho: Mao"So ngad: lhe"- yao: bam re qobo dae byid: wa,- pe"mung:ga"re ngonhaung" re khe' zin" na ko" ra" ce: gyetab mo" qhid' kheim: mae ngonhaung" wa masho: majhin boe" jo; pe" kad' nae" ngonhaung" maba lo: nao re kam" wa ngonhaung" re bao" yu nae" lao" na: ga: akyu" mho' ra".
13 Yuda byu qe alhab' wa yao: bam: yham sang myhi" qe- zoshao qe we' daga" Caung:pa" Yham mae ye; jo; ako".
14 Asang: byo wa mo, phaung mae na: jo; ra" Levi byu dayaug jhao" joe" li" ra". Yao" mang wa Zekharia nho: yauggai zo: Yahazie ga: yaug ngad: ra". Yao: wa Asab nho: kaung mae bobo yaug ngad mung: Matania- Yeiela we' Benaia khyo" gyo" li" ra" Asab nho: myid:zo: ngad: ra".
15 Yahazie wa- Asang kho:kham we' Yuda we' Yerusalem byu qe naonhaung" alhab' we"- naonhaung" ce: gyetab mo" re yethaung" qhug' nae" sulhe: myid magai: byaug- gyaug re: magai: gyaug genae". Gye khe' poe wa naonhaung" dao mae mangha- Mao"So: dao mae angha: ra".
16 Ne, mo" ba yao: bam Ziza mae" ku" lhao" mae do, li" na ko" au: yao: bam re khe' zin: ge,- naonhaung" wa yao: bam re Yerue nhae mae" seyo khyo joe" ra" lao: khaung: thao mae yeqhug' li" genae".
17 Ce: gye poe re naonhaung" makhe' ca" genae". Naonhaung" nho: jo, qo re yu mung: lao" za: lao" na ge,- Asang naonhaung" re aung doe, ru byid' rure myao: li" genae". Yuda we' Yerusalem byu qe we"- dayam" na ge,- dagyaug ge,- Gye poe khyo ye: ge,- Asang wa naonhaung" we' daga" ngad: li" nae"- ga: ta" ra".
18 Ailao" kho:kham Yehoshaphad wa yao" myo, khung myid gaung mae tin: sho' goe; gyo" mung: mo, byu qe alhab' re: yao: we' daga" cao: goe; gyo" yang: Asang re caung:pa" ako".
19 Kohad we' Kora kaung mae bobo ko" ra" Levi byu qe wa to" ye, mung: Israel nho: Mao"So Asang re thoe qi: hug' yang: caung:khin" ako".
20 Thao: ba ne, seim no' mo, byu qe wa Tekoa nhae mae" seyo khyo ye" lo" ako". Yao: bam to" lo" na: ko" au: Yehoshaphad wa yao: bam re- Yuda we' Yerusalem byu qe we"- naonhaung" Mao"So Asang re lam khug ge,- ailao"- naonhaung" tang za: qo" ye; jo; li" genae". Yao" lapa qeyang naonhaung" re ta" rure lam" ge,- naonhaung" aung myaug: li" genae"- ga: ta" ra".
21 Mung" byu qe we' bin: jho" qham thao kho:kham pho" wa gyang" lho" ra" yo,gin khyo" yao: bam ci: ra" bau: qhang re ve, mung: gyetab qhid' au: mae su: yang: Asang re caung:khin" byid: ge,- yao" jhid'de; myid wa apyad ato mae ngad: ra" wo"- ga: nghaui"caung: genae" qhid' mae" she mad be, nghaui" mo, daqhae: re amyin" byid' ra".
22 Yao: bam nghaui"caung: qhid lao" Asang wa jhin" vao li" na ko" ra" gyezo: qere byodin byosho: boe" nhao: ra".
23 Amon byu qe we' Moba byu qe wa Edom gyetab re khe' zin: mung: bin sho' se' tam" pye' ako". Ai: thao re yao: cao: qu" gyaug qu" lhaung jho" khe' zin" ako".
24 Yuda gyetab wa din"pyad' yo mae jo; ra" gyebyu zaung khyo joe" ye gelao"- yao: bam wa gyevo qere qu" ke' ko" re aibam alhab' mo, myidgaung mae shid: lang" jo, ko" rure the' myao: ako". Dayaug re: maphao: loe, ngad: ako".
25 Yehoshaphad we' yao" gyezo: qe wa lanyab yeyu nae" qhid' mae" qui" ye: mung: yao: bam wa nung: jham- zokho- mai bau:- phug' de; ra" zai myo: sho' yeqhug' ako". Yao: bam wa sam ba lam: lam: lanyab gaug: zhang: yu ge ngadqere: saung" laug yang: ja: khao: ngo" re yao: bam maqo" yu ngad: ako".
26 Byid ba ein ba mae yao: bam wa Berakha lao: khaung: mae zang" ham mung: yao: kad' lo: ra" khyo qhid' mae" Asang re caung:khin" ako". Ce: mathao mae ai: lao: khaung: re Berakha ga: mhang" ako".
27 Yehoshaphad wa yao" gyezo: qere Yerusalem khyo aung myaug: ru we' jhui" tug' lo: ra". Pe"mung:ga"re Asang wa yao: bam: gyevo qere aung: pye' yang: ngad: ra".
28 Yao: bam vogaung: khyo joe" lo" gelao"- yao: bam wa Caung:pa" Yham khyo tang: thoe- labo thoe we' ye" lo" ako".
29 Israel nho: gyevo qere Asang khoru: seim" nhao: pye' rure the' gyo" ra" byumyu" qe wa gyaug: ako".
30 Aimung: Yehoshaphad wa ngaui pyo: yaug yo za: eib: ra". Mao"So wa shad' khao: ngo" mae yao: re gug:gam: ru byid' ra".
Yehoshaphad Eib Ra" Ayo, Thao" Lo" Ru
(1 Kh 22.41- 50)
31 Yehoshaphad wa yao" apyad sam xe: ngo" zin mae Yuda kho:kham boe" lo mung: Yerusalem mae shid' xe: ngo" zin eib: ra".
32 Yao" qhid' au: mae" yao: pho" Asa we' dakhyo: yao: wa Asang qhid' kheim: mae jo: ra" mau" re kad' ra".
33 Ngadqere: taung bug so jham re caung:pa" ra" jo, qo jham re maphyo' pye' ngad: ra". Amyu" byu qe wa yao: bam: phug' pho" qenho: Mao"So re caung:pa" nae" qhid' mae" aung khug nhag' lam: alhab' we' maphaug' lo: shiko" ngad: ra".
34 Yehoshaphad kad' ru yao: eib: qhid: rumae" thao" sho' mae" gatau: mau" alhab' re Hanani nho: yauggai zo: Yehu nho: mhomyi: paug' mae tung" xam" to" ako". Aiwa Israel kho:kham qenho: mhomyi: mae" dadau ngad: ra".
35 Dalhang mae Yuda kho:kham Yehoshaphad wa makhyang" ru myo: sho' kad' ra" Israel kho:kham Ahazia we' ba nam kad' ra".
36 Yao: shid' yaug wa Eziongeba gau: khung: mae Pang:lai:: gau" ra" qid sang pho jham zhaug' ako".
37 Ngadqere: Maresha vogaung: mae" Dodavahu nho: yauggai zo: Elieze wa Yehoshaphad re- nao wa Ahazia we' myid vang" ba nam kad' va" ruyang nao kad' rure Asang phyo' qheim" pye' li" nae" ga: ta" peim" ra". Qid sang pho jham wa byo; qeim: lo" mung: khonhae" re: maqo" gau: ngad: ako".