19
Yehoshaphad Re Lapa Pho" Qeim: Ra" Khyo
1 Yuda kho:kham pho" Yehoshaphad wa Yerusalem yao" kho:kham kho" khyo gug:gam za: dam: tug' joe" lo: ra".
2 Hanani nho: yauggai zo: lapa dayaug wa kho:kham pho" re yetug: yu mung:- makhyang: mashab: ru we' Asang: yang nghang" ra" mo, shad' khyo bode; yang: bao" thaug' byid' ru wa jo: ra" khyo ngad: ein: nao myid: jho: i? Nao kad' ra" mau" zo" wa ni" dao mae Asang: nhag' yo" rure cili" byid' ava".
3 Ngad sho' ngadqere: nao mae gai: ru damyo" bo: ra". Nao wa mung" byu qe caung:pa" va" so myhi" Ashe nho: aso: jham re alhab' yu: pye' mung: Mao"So myid o: rure phug' cao" nae" nao qam: ke' ava"- ga: ta" ra".
Yehoshaphad Dam: Nyhang" Kad' Ra" Khyo
4 Yehoshaphad wa Yerusalem mae ana ngadqere: yao: bam: phug' pho" qenho: Mao"So Asang jhao" mung" byu qere dam: khai: tug' yu nae" qhid' mae" yao: wa mug: thao shad' mae jo; ra" Bersheba mae" mug: am: shad' mae jo; ra" Ephrim bam mug: athao joe" sho' mung" byu qe: phaung khyo man: man: gyaung: su" ra".
5 Yao: wa Yuda mung" mae" gyetab vogaung: khao: ngo" mae tarha" agyi qere san: to" ra".
6 Amung: yao: bam re dao: kho' ra" khyo re ta" hau" rumae lha" yang: kad' ge,- naonhaung" wa byu: kheim: so' khyo" kad' na ko" ru mangad:- Asang: kheim: so' yang kad' na: ru ngad: ako". Naonhaung" dao: kho' ko" au: yao: wa naonhaung" we' daga" ngad: ra".
7 Asang re nga: yhe' byid: mung: lha" yang: nyang" kad' ge,. Pe"mung:ga"re ngonhaung" nho: Mao"So Asang wa shad' ru- bo: de; ru- khug vag: yu rure zang: kham: byid: yaug mangad: ngad: ra" ga: mho" shid' ra".
8 Yehoshaphad wa Yerusalem mae Levi byu- khinjaung qe- au: jhaung qe daqhae: re Asang: tarha" re aqan alan kad' rumae bobo: ra" mau"- vogaung: byu qe: agyo: mae tarha vao jho" ta" ngag: ra" mau" jham re dao: kho' nae" tarha" agyi qekhyo" san: to" ra".
9 Yao: wa yao: bam re o mae tung" to" ru we' dakhyo: mho" shid' ra". Aijham wa naonhaung" wa naonhaung" mau" re Asang re gyaug phug' ru we' naonhaung" kad' ra" mau" ja: khao: ngo" mae yao: re jhaug' zaug za: mho dao: gyo: yang: kad' ca" ako".
10 Vogaung: dalam: lam: mae" naonhaung" mao:nhaung: mung" byu qe naonhaung" qhid' au: khyo byuse' mau"- tarha" re we' amyin" dao: re aqan alan boe" nhao: ra" gatau: mau" cili" khao: ngo"- tarha" ca: qu" ra" ayo, gyo: mae yao: bam yao: khoru: kad' ca" nae" khyo re naonhaung" yao: bam re nyang" za: mho" shid' ca" ako". Airulao" yao: bam wa Asang re gye kad' qobo shad' re qobo ru qo" genae" mangad:. Naonhaung" airu: makad' ko" re wa naonhaung" we' naonhaung" mao:nhaung: mung" byu qe wa Asang: nhag' jam: yo" ra" qam: so' re leim zo" li" genae". Ngadqere: naonhaung" mau" re kad' ko" re wa naonhaung" wa qobo maqo" genae".
11 Khinjaung Yin" Amaria wa caung:pa" thung" we' sin" ra" mau" mae lo" thao" kheim: so' qo" yaug ngad: li" nae". Amung: Ishmae nho: yauggai zo: Yuda mung" zug: Zebadia wa mung" byu qe we' sin" ra" mau" mae lo" thao" kheim: so' qo" yaug ngad: li" nae". Levi byu qe wa tarha" yung" mae dao: phyid' ra" mau" re qu" byid' ra" mau" qo qo" mo, ngad: li" genae". Vae" myid bo mung: ce: mho" shid' dao: re lo, joe" kad' ge,- Asang wa jo: ra" shad' mae bode, vashao: wo"- ga" ru ngad: ra".