CAUNG: KHIN" 86
Bao" Yu Nae" Mho' Ra" Akyu" Mho' Dao:
(Davi akyu" mho' ra" dao:)
1 Asang we"- ngore tae" gyo: mung: tau: byid: la,
Pe"mung:ga"re ngo mae bao" yu nae" byu maqo" mung: qam: nang" jo;
2 Ngo wa ni" dao mae jhaug' zaug: na: rumung: ngore shid: rumae" khyad' yu la,
Ngo wa ni" daui daui yaug ngad: ru we' nao re ngha: na yaug ngad: ruyang ngore khyad' yu la,
3 Nao wa nga" Mao"So ngad: ra". Aimung: ngore
nhag' khyag' yu la,- ngo wa daba geim" nao re akyu" mho' na: ra".
4 O Asang we"- ni" daui daui yaug re ngaui bau: nhao la,
Pe"mung:ga"re nga" akyu" mho' dao: jham nao jhao" do, lo" ra".
5 Nao wa ngonhaung" dao mae gai mung: qobo khyad' byid' ra".
Nao re akyu" mho' ra" mo; qhid' mae" mabaui mabyo; ra" jhid'de; myid byang" jo; ra".
6 Asang we"- nga" akyu" mho' dao: re tae" gyo: byid: la,-
Bao" yu nae" mho' yao: ra" nga" hug' yao thoe re gyo: byid: la,.
7 Nao wa nga" akyu" mho' dao: jham re tau: byid' rumung:
qug: khai: qhug' ra" au: re ngo nao re hug' yao: ke' ra".
8 O" Asang we"- nao we' dau: ra" so mana ngad: ra". Nao kad' lo: rure khag' dayaug re: maqo" kad' ngad: ra".
9 Nao: yang phan" to" ra" byumyu" alhab' wa nao jhao" li" mung: goe; pa" li" genae".
Yao: bam wa ni" nho: qi" qhang: ra" khyo re caung:khin" byid' li" genae".
10 Nao wa qam: so' qi" rumung: mug' pho: mau" jham re kad' ra".
Nao dayaug za: Mao"So ngad: ra".
11 Asang we"- nao ngore kad' nhao nug: ru mho" shid' byid: la,- aire ngo wa
nao re jhaug' zaug taung" ni" mho dao: gyo" na nae"- Jab byang" ra" khyo" nao re phug' myao: mung: caung da" byid' na nae" qhid' mae" ngore mho" shid' byid: la,.
12 O" Asang nga" Mao"So we"- ngo wa nao re nga" nhag' lam: alhab' yang caung:khin" nae".
Ngo wa ni" qi" qhang: ra" khyo re apyad ato mae ta" hau: byid: nae".
13 Nga" dao mae to" ra" ni" gang" tang: ra" ni" jhid'de; myid wa khoqhi" qi" qhang: ra" i?
Nao wa ngore lab khug mae" yao: khyad' yu va".
14 O" Asang we"- ngad beim: mo, wa ngore gye kad' nae" ga: li" na: ako".
Nao re pe" xan: masun: ra" aqan alan: byu nghang: daphung: wa ngore se' pye' nae" ga: phin" na: ako".
15 Ngadqere: Asang we"- nao wa nhag' khyag' ru we' jhid'de; ra" Mao"So ngad: ra".
Nao wa khonhae" re: nhag' lam: qhang mung: khonhae" re: nhag' khyag' myid bo: ru we' jhaug' zaug: ra" Mao"So ngad: ra".
16 Ngo jhao" lhang: lo mung: ngore nhag' khyag' yu la,- ngore qam: byid: mung: khyad' yu la,-
pe"mung:ga"re nga" myhi" ngore caung da" byid' ru we' dakhyo: nao re ngo caung da" byid' ra".
17 Asang we"- nao gai: ra" khyo ngore sagse: qhu" byid: la,- ngore nghang: mo, wa nao: yang ngore
nhag' myan: byid: mung: bao" yu: rure yao: bam myao lao" qho' thug' li" genae".