CAUNG: KHIN" 83
Israel Qe Gyevo Jeim: Nae" Qhid' Mae" Akyu" Mho' Dao:
(Asab peim: ra" Nghaui"caung: dalam:)
1 O" Mao"So we"- sae za: datae" to:-
sae dana: jo,- datae" to:
2 Qu" wa, ni" gyevo qe wa tau: lhan" na: ako". Nao re nghang: mo, wa
gye kad' na: ako".
3 Yao: bam wa ni" byumyu" qere gye kad' nae" qhid' mae" byin phyo: khug' zin" na: ako".
Yao: bam wa nao gug' gam byid' to: mo, re gyekhe' ako".
4 Yao: bam wa- Ro"- yao: bam: mung"dan: re phyo' sin" pye' gelang: ailao"
Israel re apyad ato mae qo" to" myhid' pye' nae" ngad:- ga: ta" na: ako".
5 Yao: bam wa nao re tug' khe' nae" qhid' mae"
yao: cao: yao: jho" qham: to" rumae myid vang" na: ako".
6 Ai bam wa Edom byumyu" qe Israel byumyu" qe
Moba byumyu" qe we' Hagara byumyu" qe-
7 Gebala- Amon: we' Amaleg byumyu" qe Philisti we'
Ture mae" byu qe ngad: ako".
8 Asuri re: Lod nho: myid:zo: qe ngad ko" ra"
Amon we' Moba byumyu" qenho: qam: bo: ra" ba nam phung: khyo" bo: ra".
9 Midian byumyu" qere nao kad' lai: lo: ruru: yao: bam re kad' pye' wa,- Kishon qid gyaung: nhae mae
Sisera we' Yabin re kad' pye' ruru: yao: bam re kad' wa,
10 Nao wa yao: bam re Endo mae" aung: pye' mung:
yao: bam: mao gaung jham wa myid gaung mae bab: lo" ako".
11 Oreb we' Zeeb re kad' ruru: yao: bam: au: jhaung qere kad' wa,- Zeba we' Zalmunna re
jeim: nhao: ruru: yao: bam: zug: kho:kham alhab' re aung: pye' wa,.
12 Yao: bam wa Mao"So sang: ra" mug: myid re
ngonhaung" yu: sang: pye' nae" ga: ta" ako".
13 O" Mao"So we"- yao: bam re phalhug we' dakhyo:- la hug' yang
hug' sin" pye' ra" khovho re we' dakhyo: lhau: sin" pye' wa,
14 Myi: wa seyo: thao" jam" re nga" pye' ruru: myi: shae jham wa
bug gaung jham re nga" pye' reru:-
15 Ni" la qam" yang yao: bam re khe' phao: pye' wa,- aimung: ni" gyaug pho: la hug' yang yao: bam re kyaug' tin" ke' wa,.
16 O" Asang we"- yao: bam: myo,khung: re
qho' phau: nhao wa,- aimung: ni" kheim: so' re yao: bam: yang lhang: yu sho' kad' byid: wa,
17 Yao: bam wa seim" mung: apyad ato mae
gyaug: din: na vageshao:- yao: bam wa bin sho' nga: phoe: thao" khyo" shid geshao:.
18 Yao: bam wa nao dayaug za: Asang ngad: rure ba: yu vageshao:-
Myid gaung geim" mae lo" thao" kheim: so' yang eib: ra" Kho:kham ngad: ru ba: yu vageshao:,