CAUNG: KHIN" 57
Bao" Yu Nae" Qhid' Mae" Mho' Ra" Akyu" Mho' Dao:
(Laug aug' mae Sholu mae" phao: lo" thao Davi peim: ra" ji:)
1 O" Mao"So we"- ngore nhag' khyag' yu la,- nao jhao" mae gug: gam qo" yu nae" qhid' mae"
ngo li" lo va" rumung: ngore nhag' khyag' yu la,. La qam" la dan: lai: lo" sho' ni" daung qab khug mae gug: gam: ru ngo qhug' myao: yu va".
2 Myhao: thao" ra" Mao"So re ngo khai: yao: ra"- ngo mae
ca" ru ja: khao: ngo" nyhang" byid' ra" Mao"So re ngo khai: ra".
3 Yao: wa ngore mug:gaung dao mae" tau: byid: mung: khyad' yu: li" nae"- ngore deim" zag zo: mo, re yao" yang aung: pye' nae". Mao"So wa ngore
yao" mabaui mabyo; ra" jhid'de; myid we' jhaug' zaug: ru qhu" byid' li" nae".
4 Byu: sho: zo" ra" khangkhyi jham ru" ra" gyevo qeyang ngore lhang" kham" to" ako".
Yao: bam: zaui jham wa lhae tad' we' myo: khe' jham ru"ru ngad: ako". Yao: bam: sho jham wa tho' ra" shae pyang: jham ru" ru ngad: ako".
5 O" Mao"So we"- ni" qi" qhang: ra" khyo re mug:gaung mae
qhu" byid: wa,- ni" phungbao rere: myid gaung byang" sho' qhu" byid: wa,
6 Nga" gyevo qe wa ngore taung: nae" qhid' mae" geim khae: to" ako". Ngo wa nhag' lam: gyug' byaug va".
Yao: bam wa nga" khyo mae dung:khung: dau" to" ako". Ngadqere:- ai: khug khyo yao: bam yao: gyo" vao lo" ako".
7 O" Mao"So we"- ngo wa jab byang" sho' myid: lam: na:-
ngo wa nao re nghaui"caung: mung: caung:khin" nae".
8 O" nga" alo zo: we"- beim" to" li" wa,-
nga" be, tang: we' she tang: jham we"- beim" to" lo ge, ngo wa ba re nhug' to" ke' nae".
9 O" Asang we"- ngo wa byumyu" qenho: phaung gaung: mae nao re jeju beim: so: nae".
Byumyu" qenho: phaung gaung: mae ngo nao re caung:khin" nae".
10 Ni" mabaui mabyo; ra" jhid'de; myid wa- mug: khaung khyo joe" do, lo" ra". Ni" jhaug' zaug: ru wa
mug:gaung re the' tin" zao" ra".
11 O" Mao"So we"- ni" qi" qhang: ra" khyo re mug:gaung mae qhu" byid: wa,.
ni" phungbao re myidgaung byang" sho' mae qhu" byid: wa,.