CAUNG: KHIN" 56
Mao"So Re Lam Khug: Ra" Akyu" Mho' Dao:
(Philisti qeyang Davi re Gat mae the' taung" yu thao Davi peim: ra" Nghaui"caung:)
1 O" Mao"So we"- ngore khe' zin" na ko" ruyang- ngore nhag' khyag' yu la,- nga" gyevo qe wa ngore
ayo, byang" sho' mae- ce:yhin" na: ako".
2 Nga" gye jham wa ngore ba geim" khe' zin" na: ako".
Ngo re khe' zin" na mo, wa myo" ako".
3 O" qam: bo: thao" ra" Asang we"-
ngo gyaug: ra" au: nao mae lam khug: na:.
4 Ngo wa Mao"So re lam khug: na mung: magyaug- yao: to: byid' ra" dao:so: jo; ra" mathao mae yao: re ngo caung:khin" ra".
Xao su byu za: angad mo, ngore pe" qo" kad' genae" i?
5 Nga" gyevo qe wa daba: geim" ngore qug: khai: ce:byid' na: ako". Yao: bam wa ngore dae te' nae" khyo re
khonhae" re: amyid: na: ako".
6 Yao: bam wa vho' jo, qo mae phaung: ham mung:
ngore se' pye' nae" myid: lao" ru we' ngo kad' ru ja: khao: ngo" re lhaug' qu" na: ako".
7 O" Mao"So we"- yao: bam: makhyang: mashab: mau" mathao mae
yao: bam re qobo dae byid: wa,. Ni" nhag' yo" ruyang yao: bam re jeim: nhao: pye' byid: wa,.
8 Ngo khoqhi" myid myo" na: rure nao ba: ra".
Nga" ngug byid jham re nao tung" xam" to: byid' ava". Aijham wa ni" mugsug' paug' mae bo: bam: ra" mangad: i?
9 Nao re ngo khai: yao: ra" ba na mae nga" gyevo qere
khe' tug' pye' nae" Mao"So wa nga" shad' khyo bo: rure ngo ba:.
10 Asang: dao:so: jham re ngo caung:khin" na:.
11 Yao: mae ngo lam khug: na mung: ngo magyaug nae"-
xao su byu za: angad mo, ngore pe" qo" kad' genae" i?
12 O" Mao"So we"- nao re ngo dao:so: to" rure
ngo qhaug' byid: nae"- nao re
nga" jeju beim: Alu: qhaug' byid: nae".
13 Pe"mung:ga"re nao wa ngore shid nae" rumae" khyad' yu va"- aimung: ngore maseim" lo" nhao. Airu: mung: ngo wa
Mao"So: qhid' kheim: mae su" qin" nae"- daui: na mo; dao mae bao byid' ra" bo" bao khug mae su: nae".