CAUNG: KHIN" 30
Jeju Beim" Ra" Akyu" Mho' Dao:
(Caung: khin yham vao: au: qhid' mae"- Davi peim: ra" Nghaui"caung:)
1 Asang we"- nao ngore khyad' yu va" ruyang nga" gyevo qe ngore maqo" qu" jung" nae khyo: kad' pye' mung:- nao re ngo caung:khin" ra".
2 O" Asang nga" Mao"So we"- nao re ngo mho' yao mung: nao ngore no dae gai byid' ra".
3 Nao wa ngore lab khung: mae" qhaung: yu va"
Ngo wa myid khug khyo vao lo" na: re nao nga" kao so' re dam: taui byid' ra".
4 Asang: jhaug' zaug mo, alhab' we"-
Asang re caung:khin" ge,- Gyang" Lho" Yaug kad' byid' rure myid: beim: mung: yao: re jeju caung: ge,.
5 Yao" nho: nhag' yo" ru wa dazab za: myao" ra"- yao" gai: shab: ru wa pyad geim" kham: ra". Myi" ayo, re ngug byid yug qere: ne, kao re ngaui bau" ru joe" li" ra".
6 Ngo wa ngo yao" gaung re- Gug: va"- ein: myid: lam mung: ngo khonhae" re jeim: nae" mangad: ein: ta" va".
7 Asang Nao wa nga" dao mae gyai gai: lai: lo va"-
Nao wa ngore bam dao mae" gyetab ru: gug: gam byid: va". Ngadqere: nao wa ngo mae" phao: vho' byaug lao" kam" wa ngo gyaug: ra".
8 Asang we"- nao re ngo khai mung: bao" yu nae" qhid' mae" mho' yao:.
9 Ngo shid: lo" rumae" nao pe" akyu" qo" yu nae" i?
Lab khug khyo ngo vao lo" re nao pe" gau pai: qo" yu nae" i? Shid: jo, mo, wa nao re qo" caung:khin" genae" i?
Yao: bam wa ni" mabaui mabyo; ra" gai: shab: rure qo" ta" hau: byid: genae" i?
10 Asang we"- ngore gyo: byid: mung: nhag' khyag' yu la,- Asang we"- ngore bao" thaug' yu la,.
11 Nao wa nga" kaug' qhui: rure ngaui bau: ngaui lho" go" nhan" ru boe" nhao: ra"- nga" kaug' qhui myid re yu: pye' mung: ngaui bau" ruyang ngore lhang" kham" to: byid: va".
12 Aimung: ngo wa sae za: matae" jo, lo: nao re nghaui"caung" na nae". Asang we"- nao wa nga" Mao"So ngad: ra"- ngo nao re apyad ato mae jeju caung:khin" na nae".