CAUNG: KHIN" 2
Mao"So: Yang Khyin: Yu: Ra" Kho:kham
1 Byumyu" mung"dan: jham wa pe"mung: tau: lhan: nae" yaung: na ko" i?
Byumyu" qe wa pe"mung: yao: bam: akyu" mabo: ra" mau" re seim" na ko" laug i?
2 Yao: bam: kho:kham qe wa tau: lhan: mung: yao: bam: zug: ade, qe wa Asang re daga" za: geim lau to" ru we'
Asang: yang khyin: to" ra" kho:kham re tau: lhan: nae" byin phyo: khug' zin" ako".
3 Yao: bam wa yao: bam eib zo" rumae" ngonhaung" loe; beim: lo" gelang:-
yao: bam zag zo" rure khyad' lhaui" pye' gelang ga: jho" ta" ako".
4 Asang wa mug:khaung mae jo; ra" yao" zaung tao" mae"
yao: bam: qam: nang" ra" yaung: to" mau" jham re qi: jung" pye' byid' ra".
5 Aimung: yao: wa nhag' yo" ru we' yao: bam re ta" peim" ra".
Yao" nho: nhag' yo" ruyang re: yao: bam re kyaug' nhin" ra".
6 Yao: wa nga" gyang" lho" ra" bug gaung Ziun mae nga" kho:kham re ngo zhaung: to: va"- ga: ta" ra".
7 Kho:kham wa- Asang ta" hau" rure ngo hau" kyo: nae"- yao: wa ngore- Nao wa nga" yauggai zo: ngad:-
Ana" ba ngo wa ni" pho" boe" lo va".
8 Mho' wa,- ai lao" byumyu" mung"dan: alhab' ngo nao re byid: nae".
Myid gaung geim" wa nao: yang sang: li" nae".
9 Nao wa yao: bam re jo, to' zaung: bao" yang khyug' pye' mung:-
nao: yang yao: bam re zho:gam: ug' we' dakhyo: aje, aman" be; khyoe' sin" pye' li" nae"- ga: ta" ra".
10 Kho:kham naonhaung" we"- ana" ce: ta" peim: dao: re tae" gyo: ge,-
mug:myid mae" zug: ade, naonhaung" alhab' we"
Ce: mho" shid' rure zhao: yu ge,.
11 Asang re gyaug phug' ru we' caung da" byid: ge,-
12 Gyaug: nin" ru we' yao: re goe; pa" ge, airu: mangad: re yao" nhag' yo" ru phyad ga: lhau: zhung" to" ke' mung:- naonhaung" wa nyag din taung" shid: lo" li" genae".
Yao: jhao" gug: gam: ru qo" yu nae" qhid' mae" ye: mo, wa nga: lho" ako" wo".