CAUNG: KHIN"
(PSALMS)
Dao: phung"
Caung: khin" mugsug' wa jham: mugsug' mae" nghaui" caung: paug' we' akyu" mho' paug' ngad: ra". Zinna myo: sho' mae byu myo: sho' yang ceim" tung" to" ra" mugsug' ngad mung: Israel byumyu" qe wa ce: caung:khin" paug' re yao: bam caung:pa" khao: ngo" ci: lo mung: lo" thao" re yao: bam: jham: mugsug' paug' mae bo: ke' yu: ru ngad: ra".
Caung:pa" khyo we' sin" ra" ce: dao: zham" jham wa aja: ja: ngad: ra"- Mao"So re caung:pa" mung: akyu" mho' ra" nghaui" caung: jham mae" bao" thaug' yu: ru- gug: gam byid' ru we' khyad' yu nae" rure mho' yao: ra" dao:- qobo khyad' byid: nae" mho' yao: ra" dao:- Mao"So: jeju re caung:khin" byid' ra" nghaui" caung: jham we' gyevo qere qobo dae byid: nae" qhid' mae" mho' yao: ra" dao: jham bo: ako". Ce: akyu" mho' ra" dao: jham wa dayaug khyo" mho' yao: ru bo:- byumyu" geim" khyo" mho' ru bo:- daqhae: wa byu dayaug: nhag' lam: mae" te' thao" ra" khyo" mho' yao: ru bo:- daqhae: gu: wa Mao"So: byumyu" damyu" geim" nho: kham zo" ru we' qo ca" ru jham re mho' yao: ru bo: ako".
Caung: khin" mugsug' jham: re Yesu ci: ra" dao: thang" asag' jham tung" mo, re: ci: ako".
Amung: Khristan Phung: sao qhid' maqhid' mae" caung:khin" paug' khyo" ci: lo: ru ngad:.
CAUNG: KHIN" 1
DAPAUG'
Dang Man" Ngaui Bau: Khyo
1 Makhyang: mashab mo, pha,jhi" byid' rure ngag: ha: pye' mo,- qobo jab qenho: ave, re macao" ra" mo,-
Mao"So: qhid' mae" pe" akyu" mabo mo, we' mazam" khug: ra" mo, wa ngaui lho" ako".
2 Airu: kad' nae" atha" Asang: Tarha" re phug' cao" rumae ngaui bau: mung:-
ai: tarha" re myi" re: na" re: nghe' zhao: na: ako".
3 Yao: bam wa qid zo: gyaung: yae mae yaug: ra" yao" ayo, mae ashi: zaui: mung: avho' jham re: mamai: kyaug' lo" ra" sag' gae jham we' dau: ako".
Yao: bam kad' ru alhab' mae aung doe; ako".
4 Ngadqere: makhyang: mashab mo, wa ceru we' dajhid' re: madau-
yao: bam wa la yang hug' sin" pye' ra" khapyao: we' dau: ako".
5 Qobo jab qere Mao"So: yang dao: phyid' mung:
Mao"So yao" byumyu" qemae" kho' to" ru qhug' genae".
6 Din:man: mo, re kam" wa Asang: yang khyo shid' mung:- gug: gam byid' li" nae".
Ngadqere: makhyang: mashab mo, wa yao: bam: byo; qeim: lo" nae" khyo qang: ye" lo' na: ako".