CAUNG: KHIN" 141
Myi" Thao Zo" Mae" Akyu" Mho' Dao:
(Hebre Dao: Au:- Davi peim: ra" Nghaui"caung:)
1 Asang we"- nao re ngo mho' yao: na:-
ana" ngore bao" yu byid: la,- nao re ngo khai: ra" au: tae" gyo: byid: la.
2 Nga" akyu" mho' thoe re nae pyo"ra" sheim we' dakhyo: lham: yu byid: la,.
Nga" lo, to' ci: rure myi" thao zo" mae" ngaui" xeim: we' dakhyo: lham: yu byid: la,.
3 Asang we"- nga" nhad' re khang" byid: la,
nga" nhad' qid kham: jham mae- lhaug' zaung" ru to: byid: la,.
4 Shad' rure ngo makad' nae" qhid' mae" we' makhyang: mashab mo, we' daga"
yao: bam: nhag' lam: kaui: ra" mau" mae mabo: be; baung: sho' ngore zam: la,. Yao: bam: zo: shaug' poe mae khonhae" re: mabo: cao: zo: vashao:.
5 Byugai wa ngore qobo dae byid: mung: nhag' khyag' myid we' yo" re yo: nae".
Ngadqere: makhyang: mashab mo, mae" nga: yhe' byid' rure khonhae" re: ngo makhae: yu nae".
Pe"mung:ga"re ngo wa yao: bam: makhyang: mashab: lo, mau" jham byo; qeim nae" qhid' mae" khonhae" re: akyu" amho' na:.
6 Yao: bam: zug: qere- byo, khao: mae" pye' khyo" ke' ra" au:
nga" dao: thoe jham dang: rure- mung" byu qe tug: yu: li" genae".
7 Sag' thaung: jham re kho' mung:- akhao: khao: baug: cad' pye' ru we' dakhyo:
yao: bam: sho:qug: jham re lab avai: ayae mae shapye' sin" khyo" li" genae".
8 Ngadqere: phungbao qi" qhang: thao" ra" nga" Asang we"- ngo wa nao re xo' yang: za: lam khug: na:-
ngo wa nao: yang gug:gam: yu: rure qho: na:- ngore dashad' nhao la,.
9 Yao: bam ngore kung" ra" taui: mae"- ai: makhyang: mashab: mau" kad' ra" mo; lha" mae"-
ngore gug: gam: yu byid: la,.
10 Ngo wa pe" dae made; lo: phao: lo" re nhag'lam: kaui: ra" makhyang: mo, wa
yao: bam yao" taui: mae gyo" myi" lo" vageshao:.