CAUNG: KHIN" 135
Caung:khin" Ra" nghaui" caung:
1-2 Asang re caung:khin" byid: ge,-
Asang: yham ngad: ra" ngonhaung" Mao"So: Caung:pa" Yham mae ye; jo, ko" ra"
Asang: daui daui mo, naonhaung" we" yao" mang a re caung:khin" ge,-
3 Asang wa- gai yaug ngad: rumung: yao: re caung:khin" ge,-
Yao: wa nhag' khyag' myid bo yaug ngad mung: yao" mang re caung:khin" ge,.
4 Yao: wa- yao: yao" qhid' mae" Yaku re khyin: yu: ra".
Israel byumyu" re yao: yao" qhid' mae" khyin: yu: ra".
5 Ngonhaung" nho: Asang qi" qhang: rure ngo ba:-
Yao: wa phara" alhab' tho' mae je: qi" qhang: ra".
6 Yao: wa mug:gaung mae we' myidgaung dao mae
panglai: jham: khug mae we' tham: no, khug mae yao: kad' nug: rure kad' ra".
7 Yao: wa myidgaung thao" mae"- la qam" jham thaui: re jhui" lo: ra".
La qam" qhid' mae" lhe' cad' re kad' to" ra". Aimung: yao: wa yao" kug qe, mae" phoe' thug' ke' ra".
8 Yao: wa Egutu mung" mae yauggai zoqhid' alhab' we'
sao qhid' sad' ra" gug'nyhug' alhab' re dakhyo: za: se' pye' ra".
9 Ai: mae yao: wa- kho:kham we' yao" zug: qere- qobo dae byid: nae" qhid' mae" mug' pho: ve, lho we'
mug' pho: mau" zo" jham re kad' qhu" byid' ra".
10 Yao: wa mung"dan: myo: sho' re phyo' qheim" pye' ra".
Aimung: qam: bo: ra" kho:kham qere se' pye' ra".
11 Amori kho:kham Sihon- Bashan kho:kham Oga we'-
Khanan kho:kham alhab' re se' pye' ra".
12 Yao: wa yao: bam: mug: myid re
yao" byumyu" ngad: ra" Israel qere byid' pye' ra".
13 Asang we"- nao wa Mao"So ngad: ra" khyo" khonhae" re: ta" hau: byid' ru qhug' li" nae".
Byu qae: alhab' wa nao re myid: beim" na: li" genae".
14 Asang wa yao" byumyu" re gyevha byid' li" nae".
Yao: wa yao" daui daui mo, re nhag' khyag' yu: li" nae".
15 Byumyu" qenho: so qe wa ngaui we' qhang: yang kad' to" ru ngad: ako".
Yao: bam re xao su byu: lo; yang kad' to" ru ngad: ra".
16 Yao: bam wa nhad' de, qere: maqo" jhau
myo,jid' de, qere: mamyao ngad: ako".
17 Yao: bam wa no khye' de, qere: maqo" gyo: ngad: ako".
Aimung: yao: bam wa so' lhao" re: maqo" she ngad: ako".
18 Aijham re kad' mung:- lam khug: na: ra" mo, alhab' wa
yao: bam kad' to" ra" solho jham we' dakhyo:- boe" lo" vageshao:-
19 Israel byumyu" qe: Asang re caung:khin" ge,
Mao"So: khinjaung naonhaung" we"- yao: re caung:khin" ge,.
20 Levi byu qe naonhaung" we"- Asang re caung:khin" ge,
Yao: re caung:pa" mo, alhab' we"- yao: re caung:khin" ge,.
21 Ziun mae Asang re caung:khin" ge,
yao" yham Yerusalem mae caung:khin" ge,
Asang re caung:khin" ge, wo".