CAUNG: KHIN" 126
Khyad' Yu: Ru Qhid' Mae" Akyu" Mho' Yao: Ra" Thoe
1 Asang: yang ngonhaung" re
Yerusalem khyo dam: jhui" tug' lo: ra" au: ai wa yab mo, ru: ngad: ra".
2 Ngonhaung" khonho" qi mung: ngaui bau: taung" nghaui" caung: caung: nghaui" bam: i?
Ai: au: re gatau: byumyu" qe wa ngonhaung" khyo re- Asang wa yao: bam: qhid' mae" mau" zang kad' thug' byid' ava"- ga: ta" hau" ako".
3 Gai gai: yao:- yao: wa ngonhaung" qhid' mae" qi" ra" mau" re kad' ava"-
Ngonhaung" khoqhi" ngaui bau" bam va" i?
4 Asang wa kyaug' ho: jo; ra" qid gyaung: re-
mug: qu: yang qid dam: yug nhao: ru we' dakhyo:-
ngonhaung" re dam: na: dai nhao la,.
5 Ngug byid thug' zo" re" yao: bam: qhovo: qhoshi: sin" ra" mo, re
ngaui bau: ngaui lho" ru we' qho:vo: ashi: yad: yu nhao byid: wa,.
6 Ngug byid thug' zo" re" myug: shi: vin yang: thug' ye" lo" ra" mo, wa
qhovo: qhoshi: jham" vin yang: ngaui bau" ru we' Nghaui"caung: mung: dam: tug' lo: li" genae".