CAUNG: KHIN" 119
Asang: Nho: Tarha"
1 Yao: yao" apyad mae qo mabo mo,- Asang: tarha" mae ta" to" ru we' dakhyo:
kao so' daui mo, wa ngaui lho" ako".
2 Yao" amyin" jham re cao" mung:- yao: re nhag' lam: alhab' yang
phug' cao" mo, wa ngaui lho" ako".
3 Yao: bam wa khonhae" re: shad' ru makad'
Asang: khyo mae khonhae" re: su" na: ako".
4 Asang we"- nao wa ngonhaung" re ni"
tarha" jham byid' to: mung: aijham re jhaug' zaug: ru we' cao" ye: nae" ta" to: va".
5 Ni" mho" shid' dao: jham re jhaug' zaug za:
cao" ye: nae" ein: lhaung" taung" myid: lao" na:.
6 Ni" amyin" dao: alhab' re ngo nyang" za: myid: qu" na: re
ngo qho' maphau: nae".
7 Ni" din:man" ra" dao: kho' rure ngo mho" zhao: yu zo" re"
gyang" san: ra" nhag' lam: we' nao re ngo caung:khin" nae".
8 Ni" tarha" jham re ngo cao" na nae"-
ngore khonhae" re: dashapye' to: la,.
Asang: Tarha" Re Cao" Ra" Khyo
9 Zolau: dayaug wa- yao" apyad re gyang" san sho' khoru: qo" na nae" i?
Ni" amyin" jham re phug' cao" yang: gai: na: ra".
10 Nga" nhag' lam: alhab' we' ngo nao re caung da" byid: nae".
Ngo re ni" amyin" jham re maphug' cao" lo:sho' dakad' nhao la,-
11 Ngo wa ni' tarha" re nga" nhag' lam: khug mae ke' ci va".
Aimung: ngo wa nao re qobo maqo" shad' lo nae".
12 O" Asang we"- nao re ngo caung:khin" ra". Ngo re
ni" khyo jham mho" byid: la,.
13 Nao byid' to' ra" tarha" jham alhab' re-
ngo thoe qi: we' aire dam: paug' ta" nae".
14 Ngo wa jo,nho" myo: sho' qo" ru tho' mae
ni" amyin" dao: jham re phug' cao" rure je: ngaui: ra".
15 Ni" pyang dao: jham re ngo ca: zhao: yu mung:
ni" mho" shid' khyo jham re ngo myid: ca: qu" ra".
16 Ni' tarha" jham mae ngo myid: ngaui mung:-
ni" amyin" jham re ngo mato" myhid' nae".
17 Ni" daui daui yaug ngore gai kad' byid: la,- aire
ngo daui: na mung: ni" mho" shid' dao: re cao" na nae".
18 Nga" myo,jid' re phung" byid: la,- aire ngo wa
ni" tarha" khug mae" mug' pho: dangman" ra" khyo re qo" the' myao nae".
19 Ngo wa ce: myidgaung dao mae dazab daso' za: li" daui: na:-
ni" amyin" jham re ngo mae" danyham" to" pye'.
20 Nga" nhag' lam: wa myid: lao" yang: no: lo: kyiva".
Ngo wa ni" dao: kho' rure ayo, byang" sho' ba nug: ra".
21 Nao wa ngad beim: mo, re qeim: mho" byid' ra".
Ni" amyin" jham re macao" mo, wa byuxa: voqoe, qhug' ako".
22 Ngo wa ni" tarha" jham re cao" rumung: yao: bam: yang
ce: roe" yang: jung" rumae" ngore loe; beim nhao byid: la,.
23 Zug: kho:kham qe wa- phaung: qham mung: ngore yhin" nae" ga:
byin phyo: zin" ako". Ngadqere: ngo kam" wa ni" mho" shid' dao: jham re zhao: yu nae".
24 Ni" pyang dao: jham wa ngore ngaui bau: nhao: ra".
Aijham wa ngore pha,jhi" byid: mo, ngad: ako".
Asang: Tarha" Re Cao" Nae" Myid: Phyid' Ra" Khyo
25 Ngo wa jeim: mung: phalhug bam mae lang" jo;-
nao dao:so: to" ru we' dakhyo: ngore dam: byan" to" lo nhao la,
26 Ngo kad' lai: lo: ru alhab' re lhang: yu mung: nao ngore tau: byid: va".
Ngo re ni" khyo mho" byid: la,
27 Ni" tarha" jham re ba: gyo, sho' ngore bao" thaug' byid: la,-
aire ngo wa ni" mug' pho: mho" shid' dao: jham re myid: qu" na nae".
28 Kaug' qhui: ru wa ngore aung: byaug: kyiva".
Nao dao:so: byid' to" ru we' dakhyo:- ngore qam: bo nhao la,.
29 Ngore shad' nghung" ra" khyo malo" sho' zam: la,-
Ni" gai shab: ruyang ngore ni" tarha" mho" byid: la,.
30 Ngo wa mho dao: gyo: nae" shad' khyo khyin: yu qhug' va".
Ngo wa ni" dao: kho' nae" shad' khyo khyin: yu qhug' va". Ngo wa ni" dao: kho' rure myid: qu" va".
31 Asang we"- ngo wa ni" pyang dao: jham re cao" va".
Ngore qho' daphau: nhao la,.
32 Ngo wa ni" amyin" jham re kao bau taung" cao" ye: nae".
Pe"mung:ga"re nao wa ngore laba lajhao je: myo: sho' byid' li" nae".
Ba: Gyo: Nae" Qhid' Mae" Akyu" Mho' Dao:
33 Asang we"- ni" tarha" jham: nho: lajheim: ngore mho" shid' byid: la,.
Ailao" ngo wa ayo, byang" sho' aijham re phug' cao" ye: nae".
34 Ngore ni" tarha" sho' kyo: la,- aire ngo wa ai: rure cao" ye: nae".
Aire nga" nhag' lam: alhab' yang nga" aung khug mae ke' to: nae".
35 Ni" amyin" alhab' qo" cao" sho' ngore zam: la,.
Pe"mung:ga"re aijham mae ngo ngaui bau" ru qhug' ra".
36 Ngore jo,nho" qo" nhao nae" tho' ni" tarha" jham re
cao" ye: nug nae" nhag' lam: yaug: ake' byid: la,.
37 Pe" aphug' made; rure mazhaug' qu" nae" qhid' mae" ngore zam: la,-
Nao dao:so: to: byid' ru we' dakhyo: ngore gai kad' byid: la,.
38 Asang: daui daui yaug ngore dao:so: dang byid: la,-
Ni" mho dao: gyo: mo, re nao to" ra" dao:so: re dang byid: wa.
39 Ngo gyaug: na: ra" ceim" roe" rumae" ngore khyad' yu la,-
Ni" dao: kho' ru wa khoqhi" mug' pho: ngad: ra" i?
40 Ngo wa ni" amyin" jham re phug' cao" nug: ra".
Ngore kao so' asag' byid: la,- pe"mung:ga"re nao wa din:man" ra" yaug ngad: ra".
Asang: Tarha" Re Lam Khug: Ra" Khyo
41 Asang nao ngore khoqhi" jhid'de; ru qhu" byid: la,.
Aimung: ni" dao:so: jo; ru we' dakhyo: ngore khyad' yu la,.
42 Aire ngo wa ngore roe" zo: mo, re qo" phaug' tau: nae".
Pe"mung:ga"re ngo wa
ni" mungdao: re lam khug: na yaug ngad:.
43 Ayo, byang" sho' mae dangman" ru qo" ta" nae" qhid' mae" ngore bao" thaug' byid: la,.
Pe"mung:ga"re nga" myid: lao" khyo wa ni" dao: kho' rumae ngad: ra".
44 Ngo wa khonhae" re: apyad ato mae
ni" tarha" re phug' cao" na nae".
45 Ngo wa ni" mho" shid' ra" khyo re phug' cao" na: rumung:
jab byang" sho' loe; beim: rumae daui: na nae".
46 Ngo wa kho:kham qere ni" amyin" jham hau" kyo: byid: nae".
Amung: ngo qho' mathug' nae".
47 Ngo wa ni" amyin" jham re cao" rumae ngaui bau" ru qo" yu: ra".
Pe"mung:ga"re aijham re ngo jhid'de; yang: ngad: ra".
48 Ngo wa ni" amyin" jham re phug' myao: mung: jhid'de; ra".
Ngo wa ni" mho" shid' khyo jham re myid: qu" na nae".
Asang: Tarha" Re Myid: Lam: Na: Ra" Khyo
49 Ni" daui daui yaug ngad: ra" ngore nao byid' to" ra" dao:so: re myid: beim: wa,- ai wa
ngore myid: lao" nae" ru byid' ra".
50 Dayin dayo: kham zo" na: ra" au: lhao" re:-
ngo wa nhag' tang" ru qo" yu: ra". Pe"mung:ga"re ni" dao:so: wa ngore kao so' byid' ra".
51 Ngad beim: mo, wa khonhae" re: ngore qu" jung" na: ako".
Ngadqere: ngo wa ni" tarha" mae" magao: malin: lo".
52 Ganhae" gaco' mae" ni" dao: kho' rure ngo myid: beim" na:.
Aimung: O" Asang we"- aijham wa ngore nhag' tang" byid' ra" wo".
53 Nhag' lam: kaui: ra" makhyang: mo, ni" tarha" re
lhoe" pye' ko" rure ngo myao lao" ngo nhag' jam: yo" ra".
54 Myid gaung dao mae ngo daui: na: au: re ngo wa
ni" amyin" jham we' sin: yang: nghaui" caung: jham thug: to".
55 Asang we"- Myi" re ngo nao re myid: beim" na:- aimung:
ngo wa ni" tarha" re myid: qu" na: ra".
56 Ni" amyin" jham re phug' cao" rumae
nga" ngaui bau: ngaui lho" khyo re qhug' myao: yu: ra".
Asang: Tarha" Re Caung:pa" Kao Bau: Ra" Myid
57 O" Asang we"- nao wa ngo o: ru alhab' ngad: ra".
Ni" tarha" jham re phug' cao" nae" ngo dao:so: to: va".
58 Nao dao:so: byid' to: va" ru we' dakhyo: ngore
nhag' khyag' yu nae" qhid' mae" nao re nga" nhag' lam: alhab' yang mho' ra".
59 Nga" ave, re ngo bin: myid: qu" mung:
nao mho" shid' ra" khyo re cao" ye: nae" qhid' mae" dao:so: re ngo byid: va".
60 Ni" amyin" jham re phug' cao" nae" qhid' mae"
mayam" na lo:sho' ngo hin hin seim" na va".
61 Nhag' lam: kaui: ra" makhyang: mo, wa nga" qhid' mae" lha" khae: to" ako".
Ngadqere: ngo wa ni" tarha" re mato" myhid' pye'.
62 Gae gaung: myi: re ngo beim" so" li" mung:
ni" din:man" ra" dao: kho' ru: mathao mae nao re ngo caung:khin" ra".
63 Ngo wa nao re caung da" byid: mo, alhab' nho: ba nam ngad:.
Ni" tarha" jham re phug' cao" mo, alhab' nho: ba nam ngad: ra".
64 Asang we"- myid gaung wa ni" mabaui mabyo; jhid'de; myid byang" jo; ra"
ni" amyin" jham ngore mho" byid: la,.
Asang: Tarha" Nho: Aphug'
65 Asang we"- nao wa ni" dao:so: re zam" to" ava".
Amung: nao wa ni" daui daui yaug nga" dao mae gai yaug ngad: ra".
66 Ni" amyin" jham re ngo lam khug: rumung:- ngore
pha,jhi" we' laba lajhao byid: la,.
67 Nao: yang ngore qobo dae mabyid: shi:re ngo lhaung" shad' nghung" lo:.
Ngadqere: ana" wa ni" dao: re ngo phug' cao" na:.
68 Nao wa khoqhi" gai: i? Khoqhi" nhag' ba: khyag' i?
Ni" amyin" dao: jham ngore mho" byid: la,.
69 Ngad beim: mo, wa nga" khyo re mhug' ta" ako".
Ngadqere: ngo wa nga" nhag' lam: alhab' yang ni" mho" shid' dao: jham re phug' cao" na:.
70 Byu cebam wa ba: gyo" ra" myid mabo ngad: ako".
Ngadqere: ngo wa ni" tarha" mae ngaui bau: khyo qhug' myao: yu va".
71 Nga" qobo dae wa nga" qhid' mae" gai: ra".
Pe"mung:ga"re airu wa ngore ni" amyin" dao: jham qo" mho" yu nhao: ra".
72 Nao byid' ra" tarha" wa nga" qhid' mae" mug: myid geim" mae jo; ra"
ngaui qhang alhab' tho' je: phug' de; ra".
Asang: Tarha" Din: Nyang: Ra" Khyo
73 Nao ngore phan" to: mung: gug: gam byid' ra".
Ni" tarha" jham re qo" cao" sho' ba: gyo" ra" myid ngore ke' byid: la,.
74 Nao re gyaug phug' na mo, wa ngore the' myao lao" ngaui bau" li" genae".
Pe"mung:ga"re ngo wa ni" dao:so: re lam khug: na:.
75 Asang we"- ni" dao: kho' ru wa din:man" rure ngo ba:-
Aimung: nao wa jhaug' zaug yaug ngad: ruyang nao ngore qobo dae byid: va".
76 Ni" daui daui yaug ngore nao: yang dao:so: byid' to" ru we' dakhyo:-
ni" gang" tang: ra" jhid'de; myid: yang ngore nhag' tang" byid: la,.
77 Ngo qo" daui: na sho' ngore nhag' khyag' yu la,-
Pe"mung:ga"re ngo wa ni" tarha" mae ngaui bau" na:.
78 Ngad beim: mo, wa ngore mangad' khyo" qobo zhaug' ko" ra" mathao mae qho' phau: geshao:-
ngo kam" wa ni" mho" shid' khyo re myid: qu" na nae".
79 Nao re gyaug phug' mo, alhab'- ni" amyin" jham re ba mo, alhab'-
ngojhao" li" lo geshao:-
80 Ni" amyin" dao: jham re ngo: yang jab byang" sho' cao" na mung:-
jeim" lo" ruyang qho' phau: nae" rumae" loe, vashao:.
Loe; Beim Nhao Nae" Mho' Ra" Akyu" Mho' Dao:
81 Asang we"- ngo wa nao: yang li" khyad' yu nae" rure lao" yang: qam: shan: lo" na va".
Ngo wa ni" mungdao: mae lam khug: na:.
82 Ngo wa- nao ngore khonhae" bao" yu nae" i? ein: myid: na: au:-
ni" dao:so: re lao" mung:- nga" myo,jid' jham kyam: byaug va".
83 Ngo wa su: yang shapye' pye' va" ra"
sabyi thaung we' dakhyo: pe" aphug' made, lo:ngadqere:
ni" amyin" jham re mato" myhid' pye' shi:.
84 Khomyhao" myao" sho' ngo xo' lao" ca" shinae" i?
Ngore yhin" mo, re nao: yang khonhae" qobo dae byid:nae" i?
85 Ni" tarha" re macao" ra" ngad beim: mo, wa ngore kung" yu nae" ga: dung:khung: dau" to" ako".
86 Ni" amyin" jham alhab' wa lam ga" ru ngad: ra".
Byu jham wa ngore mhug' dao: khyo" yhin" na: ako". Ngo re bao" yu la,.
87 Yao: bam wa ngore alaug qo" se' pye' ako".
Ngadqere: ngo wa ni" amyin" jham re malhaui" pye'.
88 Mabaui mabyo; ra" ni" jhid'de; myid: mathao mae ngore gai kad' byid: la,.
Aire ngo wa ni" tarha" jham re cao" phug' na nae".
Asang: Tarha" Mae Lam Khug: Na: Ra" Khyo
89 O" Asang we"- ni" mungdao: wa apyad ato mae jo; jo, nae"- ai wa mug:gaung mae apyad ato ngad: jo; ra".
90 Ni" jhaug' zaug: ru wa dapyad we' dapyad mae gang" tang: jo; ra".
Nao wa myid gaung re yao" jo, qo mae to: mung: ai wa airu: yao: jo; jo; ra".
91 Acao jab wa ni" amyin" khyo" ana" ba joe" sho' jo; bam: ako"
Pe"mung:ga"re aijham alhab' wa ni" daui daui mo, ngad: ako".
92 Ni" tarha" wa nga" qhid' mae" ngaui bau: khyo ajhaung ko mangad: re wa ngo wa dayin dayo: dae no yang: shid: byaug naeva".
93 Ngo wa ni" mho" shid' khyo jham re khonhae" re: malhaui" pye' nae".
Pe"mung:ga"re nao wa ngore ai: gu" yang daui: na nhao: ra".
94 Ngo wa ni" byu ngad:- ngore khyad' yu la,- ngo wa
ni" amyin" jham re phug' cao" nae" qam: ke' na:.
95 Nhag' lam: kaui: ra" makhyang: mo, wa ngore se' nae" ga: lao" na: ako".
Ngadqere: ngo wa ni" tarha" jham re myid: qu" na nae".
96 Ngo wa ja: khao: ngo" mae yao" kyodam: jo; rure the' zhao: yu va".
Ngadqere: ni" amyin" wa jab byang" ra" wo".
Asang: Tarha" Re Jhid'de; Ra" Khyo
97 Ni" tarha" re ngo khoqhi" jhid'de; i?
Ngo wa aire ba geim" myid: qu" na:.
98 Ni" amyin" wa yo, byang" sho' ngo we' daga" ngad: jo; ra".
Aimung: ngore nga" gyevo qe tho' pha,jhi" je: bo nhao: ra".
99 Ngo wa ni" mho" shid' khyo jham re myid: qu" rumung:-
nga" mho" pho" qe alhab' tho' je: ba: gyo".
100 Ngo wa ni" amyin" jham re cao" rumung:-
phug' mao: qetho' pha,jhi" je: bo:.
101 Ngo wa ni mungdao: re cao" nug mung: makhyang" ra"
ave, alhab' re jao" pye' va".
102 Nao yao: nga" mho" pho" ngad: rumung:
ni" mho" shid' khyo jham re ngo malhaui" pye'.
103 Ni" mho" shid' khyo jham wa khoqhi" cug: ra" i?
Byoyhid tho' lhao" je: cug: ra".
104 Ngo wa ni" tarha" jham mae" pha,jhi" qo" yu mung: magai: ra"
ave, alhab' re ngo nghang" ra".
Asang: Tarha" Mae" Bo" Bao
105 Ni" mungdao: wa ngore khyoshid' byid: nae" myikaug'
ngad mung:- nga" khyo qhid' mae" bo" bao ngad: ra".
106 Ngo wa ni" din: nyang: ra" mho" shid' khyo jham re
cao" nae" qhid' mae" gang" tang: ra" dao:so: byid: nae".
107 Asang we"- ngo kham zo" na: ra" dayin dayo: dae jham wa gyai xo: ra".
Nao dao:so: to" ru we' dakhyo: ngore daui: na nhao la,.
108 O" Asang we"- nga" jeju beim: so" ra" akyu" mho' thoe re lham: khae: yu byid: la,.
Aimung: ngore ni" amyin" jham mho" byid: la,.
109 Ngo wa kao alaug laug lhaung" thao" byaug va".
Ni" tarha" re ngo mato" myhid' pye'.
110 Nhag' lam: kaui: ra" makhyang: mashab mo, wa nga" qhid' mae" lha" khae: to" ako".
Ngadqere: ngo wa ni" amyin" jham re mangag: pye'.
111 Ni" amyin" jham wa apyad ato mae" nga" jo,nho" ngad: ra".
Aijham wa nga" nhag' lam: ngaui bau: khyo ngad: ra".
112 Ngo wa ngo shid: ra" ba joe" sho' ni" tarha" jham re
cao" nae" qhid' mae" myid: phyid' to: va".
Asang: Tarha" Mae Jo; Ra" Gug: Gam: Ru
113 Nao re bin sho' jhaug' mazaug mo, re ngo nghang" ra"
ngadqere: ngo kam" wa ni" tarha" re jhid'de; ra".
114 Nao wa ngore gye vha byid: yaug we' gug: gam byid: yaug ngad: ra".
Ngo wa ni" dao:so: mae myid: lao" na:.
115 Qobo byu qe we"- ngo mae" va: khyo phao: lo" ge,-
ngo wa nga" Mao"So: amyin" jham re phug' cao" nae".
116 Nao dao:so: to" ru we' dakhyo: ngore qam: o: byid: la,- aire ngo qo" daui:na nae".
Ngo re nga" myid: lao" rumae qam: dashan nhao la,
117 Ngo re zaui" ci byid: la,- aire ngo gug: gam: na nae".
Aimung: ngo wa ni" amyin" dao: jham re khonhae" re: myid: qu" na nae".
118 Nao wa ni" tarha" jham re maphug' cao" mo, re kang" pye' ra".
Yao: bam: mhug' pyag'ra" byin phyo: mau" wa pe" akyu" mabo ngad: ra".
119 Nao wa nhag' lam: kaui: ra" makhyang: mo, alhab' re basad re we' dakhyo: qu" to" ra".
Aimung: ngo wa ni" pyang dao: jham re jhid'de; ra".
120 Ni" mathao mae ngo gyaug: ra".
Ni" dao: phyid' ra"
ruyang ngo gyaug: byaug va".
Asang: Tarha" Re Phug' Cao" Ra" Khyo
121 Ngo wa jo: ru we' gai: rure kad' va".
Ngo re nga" gyevo qe:ra" lo, khyo dashapye' to: la,.
122 Ni" daui daui yaug re bao" yu nae" qhid' mae"
dao:so: byid: la,- ngad beim: mo; yang ngore dadeim" zag zo: nhao la,.
123 Nao: yang bao" khyad' yu nae" ru we'
loe; beim nhao nae" ga" dao:so: to" rure lhaug' qu" na mung: nga" myo, myaung" byaug va".
124 Ni" mabaui mabyo; jhid'de; myid khyo" ngore mho" shid'byid: la,.
Aimung: ngore ni" amyin" dao: jham mho" byid: la,.
125 Ngo wa ni" daui daui yaug ngad. ngore:-
laba lajhao byid: la,- aire ngo wa ni" mho" shid' rure ba: gyo: nae".
126 Asang we"- nao lo, mau" zaui: nae" ayo, joe" va" ra".
Pe"mung:ga"re byu qe wa ni" tarha" jham re maphug' cao" ngad: ako".
127 Ngo wa ni" amyin" jham re qhang tho' mae"-
gyang" thao" ra" qhang tho' mae" je: jhid'de; ra".
128 Airu: mung: ngo wa ni" pyang dao: alhab' re cao" ra"- shad' ra" khyo jham alhab' re ngo nghang" ra".
Asang: Tarha" Re Phug' Cao" Nug: Ra" Nhag' Lam:
129 Ni" mho" shid' ru jham wa mug' pho: ngad: ra".
Ngo wa aijham re nga" nhag' lam: alhab' yang phug' cao" ra".
130 Ni" mho" shid' dao: re sho' kyo" ru wa bo" bao byid' ra".
Aimung: pe" maba mo, re pha,jhi" byid' ra".
131 Ni" amyin" jham re ngo myid: o: na mung:-
ngo wa nhad' ho" ci yang: so' kho' na:.
132 Nao re jhid'de; ra" mo, alhab' re kad' ru we' dakhyo:
ngojhao" lhang: lo mung: ngore nhag' khyag' yu la,.
133 Nao dao:so: to" ru we' dakhyo: ngore magyang: lang" lo" sho' zam: byid: la,.
Ngo re makhyang:mashab: ra" ruyang daaung: pye' nhao la,.
134 Ngo re deim" zag zo: mo; lo, mae" khyad' yu la,.
Aire ngo wa ni" amyin" jham re qo" phug' cao" nae".
135 Nao ngo we' na mung: shaman" byid: la,- ngore
ni" tarha" jham mho" byid: la,.
136 Byu qe ni" tarha" re maphug' cao" gemung:
nga" ngug byid wa qid gyaung: we' dakhyo: yug: na: ra".
Asang: Tarha" Din: Nyang: Ra" Khyo
137 Asang we"- nao wa din:man" ra"-
ni" tarha" jham re: din" ra".
138 Nao byid' ra" tarha" jham wa
jab byang" sho' din: nyang mung: jo: ra".
139 Nga" gyevo qe wa ni" amyin" jham re
pe" xan: masun: gemung: nga" nhag' yo: wa myi: we' dakhyo: ngo mae laung: na: ra".
140 Ni" dao:so: wa khoqhi" dang: ra" i?
Aire ngo khoqhi" jhid'de; ra" i?
141 Ngo wa pe" akhyag yaug mangad: mung: qu" ngai: pye' ru qhug' ra".
Ngadqere: ngo wa ni" mho" shid' dao: re malhaui" pye'.
142 Ni" dangman" ru wa apyad ato dang: jo, nae"- aimung:
ni" tarha" wa khonhae" re: dangman" ra".
143 Ngo mae qug: khai: we' sang: kho" ru byang" jo; ra". Ngadqere:
ni" amyin" dao: jham wa ngore ngaui bau: ngaui lho" nhao: ra".
144 Ni" pyang dao: jham wa khonhae" re: din: nyang: jo; ra".
Ngo re ba: gyo: nae" ru byid: la,- aire ngo qo" daui: na nae".
Loe; Beim Nhao Nae" Qhid' Mae" Akyu" Mho' Dao:
145 Ngo wa nga" nhag' lam: alhab' we' nao re yao: ra".
Asang we"- ngore tau: byid: la,- aire
ngo wa ni" amyin" dao: jham re qo" phug' cao" nae".
146 Nao re ngo yao: ra". Ngo re khyad' yu la,-
aire ngo wa ni" tarha" jham re qo" zam" ci nae".
147 Ba mathug' shi:mae" ngore bao" yu nae" qhid' mae"
nao jhao" mho' yao: na:- ago wa ni" dao:so: re myid: lao" na:.
148 Ngo wa damyi khyeim gyang: yang: lang" jo, mung:
ni" pyang dao: jham re myid: qu" na:.
149 O" Asang we"- ni" jhid'de; myid wa mabaui mabyo; ru ngad mung:
ngore gyo: byid: la,.
Ni" nhag' khyag' myid re qhu" byid: mung: nga" kao so' re
daui: na nhao byid: la,.
150 Ngo re se' da: be, khyad' kad' mo, wa jhao" li" na: ako".
Yao: bam wa ni" tarha" re
khonhae" macao" ra" mo, ngad: ako".
151 Ngadqere: Asang we"- nao wa ngo we' te' te' na: ra".
Aimung: ni" amyin" dao: alhab' wa khonhae" re: jo: jo; ra".
152 Ganhae" yo, mae" ni" pyang dao: khyo re
ngo zhao: yu: lo va". Nao wa aijham re apyad ato mae dang: jo, nhao: ra".
Bao" Yu Nae" Ru Mho' Yao: Ra" Dao:
153 Ni" tarha" re ngo malhaui" pye' rumung:
ngo kham zo" ra" dayin dayo: dae re myao byid' ru we' ngore khyad' yu la,.
154 Nga" mau" zo" re bo:ta" byid: mung: ngore
loe; beim: nhao la,- nao dao:so: to" ru we' dakhyo:- ngore khyad' yu la,.
155 Nhag' lam: kaui mung: makhyang: mashab mo, wa khyad' yu: ru
maqhug' genae". Pe"mung:ga"re yao: bam wa ni" tarha" jham re maphug' cao" ngad: ako".
156 Ngadqere: Asang we"- ni" nhag' khyag' myid wa qi" qhang: ra".
Ni" nhag' khyag' myid re qhu" byid: mung: ngore khyad' yu la,.
157 Ngo mae gyevo myo: sho' we' deim" zag zo: mo, gyai bo: ra".
Ngadqere: ngo wa ni" tarha" jham re manghung: lo: cao" na:.
158 Phaug' lhag' lo" mo, re ngo qu" mung: nhag' qu" no: ra".
Pe"mung:ga"re yao: bam wa ni" amyin" jham re maphug' cao" ngad: ako".
159 Asang we"- ni" pyang dao: jham re ngo khoqhi" jhid'de; rure qu" qu" wa,.
ni" jhid'de; myid wa khonhae" re: malai:- aimung: ngore khyad' yu la.
160 Ni" tarha" nho: akao" wa din:man" ru ngad: ra".
Aimung: ni" dangman" ra" dao: kho' ru alhab' wa apyad ato ngad: ra".
Tarha" Re Phug' Cao" Nae" Ga: Yao" Gaung Re Qhaug' Byid' Ru
161 Kheim: so' qi: mo, wa ngore matarha" khyo" khe' zin" ako".
Ngadqere: ngo wa ni" tarha" re phug' myao" ra".
162 Ni" dao:so: jham: mathao mae ngo khoqhi" ngaui bau" na: i?
Ngaui qhang jo,nho" myo: sho' qo" yaug we' dakhyo: ngaui bau" na:.
163 Mhug' ta" ru alhab' re ngo nghang" ru we' ca' ra"- ngadqere:
ngo ni" tarha" re jhid'de; ra".
164 Ni" din:man" ra" dao: kho' ru jham: mathao mae ngo wa
daba re nhad' lhang nao re jeju beim: so" na:.
165 Ni" tarha" re jhid'de; mo, wa jab byang" ra" gug: gam: ru qo" ako".
Aimung: yao: bam re gyang: gyo" nae" khyo qo" kad' ru pe" majo,.
166 Asang we"- ngo wa nao: yang bao" yu nae" rure lao" na:- aimung: ngo wa
nao amyin" byid' to" rure kad' na:.
167 Ngo wa ni" mho" shid' khyo jham re phug' cao" mung:
nga" aung khug nhag' lam: alhab' we' aijham re ngo jhid'de; ra".
168 Ngo wa ni" amyin" jham we'
ni" mho"shid' ra" khyo jham re phug' cao" na:-
nao wa ngo kad' ru ja: khao: ngo" re myao byid' ra".
Bao" Yu Nae" Mho' Ra" Akyu" Mho' Dao:
169 Asang we"- bao" yu nae" qhid' mae" mho' ra" nga" thoe wa nao jhao" joe" vashao:-
nao: yang dao:so: byid' to" ru we' dakhyo: ngore ba: gyo: nhao la,.
170 Nga" akyu" mho' dao: re tae" gyo: byid: la,- aimung:
ni" dao:so: we' dakhyo: ngore khyad' yu la,.
171 Nao ngore ni" tarha" mho" shid' byid' ru mathao mae ngo wa nao re
khonhae" re: caung:khin" na nae".
172 Ni" amyin" jham wa din: nyang: rumung: ngo wa ni" tarha" we'
sin: yang: Nghaui"caung: caung: nae".
173 Ngo wa ni" amyin" jham re cao" ra" mathao mae ngore
bao" yu nae" qhid' mae" khonhae" re: jin" jin" seim" ci byid: la,.
174 O" Asang we"- ngo wa nao: yang khyad' yu: ra" bao" thaug' rure
khoqhi" nhag' nghae" na: i? Ngo wa ni" tarha" mae ngaui bau khyo qhug' yu: ra".
175 Nao re qo" caung:khin" nae" qhid' mae" ngore kao so' ke' byid: la,-
ni" mho" shid' khyo jham wa ngore bao" yu vashao: wo".
176 Ngo wa byaug: lo" ra" yao we' dakhyo: du" lae" qin" ra".
Aimung: ni" daui daui yaug ngore li" qho: yu la,- pe"mung:ga"re ngo wa ni" tarha" jham re malhaui" pye' yang: ngad: ra".