CAUNG: KHIN" 118
Aung doe, Mung: Jeju Caung: Akyu" Mho' Ra" Dao:
1 Asang wa- gai yaug ngad: rumung: yao: re jeju caung: ge,.
Yao" jhid'de; myid re: apyad ato mae ngad: ra".
2 Israel byumyu" qe wa- yao" jhid'de; myid wa
apyad ato ngad: ra"-
ga: ta" vageshao:.
3 Mao"So: khinjaung qe wa- yao" jhid'de; myid wa
apyad ato ngad: ra"- ga: ta" vageshao:
4 Yao: re caung:pa" mo, alhab' wa- yao" jhid'de;
myid apyad ato ngad: ra"- ga: ta" vageshao:.
5 Ngo nhag' lam: ngai: na: ra" au: Asang re ngo hug' yao: ke'.
Yao: ngore tau: byid: mung: loe; beim nhao va".
6 Asang wa ngo we' daga" ngad:- ngo magyaug nae"-
Khag' yang ngore pe" qo" kad' genae" i?
7 Ngo re bao" yu yaug wa Asang ngad: ra".
Aimung: nga" gyevo qe jeim" lo" rure ngo the' myao nae".
8 Asang mae- khug ngha: na: ru wa
byu re khug ngha: ru tho' je: gai: ra".
9 Asang mae khug ngha: na: ru wa-
xao su byu: au: jhaung qere khug ngha: ru tho' je: gai: ra".
10 Gyevo myo: sho' mo, wa nga" avai: ayae mae na: jo; ako".
Ngadqere: Asang: qam: so' yang yao: bam re ngo khe' aung: pye' va".
11 Yao: bam wa nga" avai: ayae shad' khao: ngo" mae na: bam qere:
Asang: qam: so' yang yao: bam re ngo khe' aung: pye' va".
12 Yao: bam wa nga" avai: ayae gam: sho' mae byo: jham we' dakhyo: ceim" ako".
Ngadqere: yao: bam wa thao" paung" myi: we' dakhyo: phyad za: nga" jeim" lo" ako"- Asang: qam: so' yang- yao: bam re ngo phyo' qheim" pye' va".
13 Ngo wa dae xo sho' khe' se' ru we' jeim: nhao: ru qhug' va'.
Ngadqere: Asang wa ngore bao" yu: ra".
14 Asang wa ngore qam: so' qi: mung: qam: bo nhao: ra"-
Yao: wa ngore khyad' yu va".
15 Mao"So: byumyu" qenho: zaung jham mae
(Asang: qi" ra" qam: so' wa aire kad' ke' ava")
Gyai ngaui bau: ngaui lho" hug' ra" aung thoe re tae" gyo: ge,.
16 Yao" qam: so' wa ngonhaung" re aung doe, nhao va"- Gye khe' mang: zin: jao: mae-
yao" qam: so' mo" yang aung doe, va".
17 Ngo mashid nae"- ai: atha"
Asang kad' va" mau" zo" re ta" hau: nae".
18 Yao: wa ngore dae xo sho' qobo dae byid' ava".
Ngadqere: ngore mashid nhao ngad: ra".
19 Caung:pa" Yham mae" kham: mo" ngore
phung" byid: gela,- ngo vao ye: mung: Asang re jeju beim: so: nae".
20 Ceru wa Asang: kham: mo" ngad: ra".
Din:man" ra" mo, za: aimae qo" vao ye" ako".
21 Asang we"- nao ngore gyo: byid: yang:- nao re ngo caung:khin" ra".
pe"mung:ga"re nao ngore aung doe; ru byid: va".
22 Yham zhaug' mo; yang aphug' made, ga: shalhaui" pye' ra" laug baui wa alhab' tho' mae
je: akhyag: thao" ru boe" lo: ra".
23 Ceru wa Asang: yang kad' ke' ru ngad: ra".
Aiwa khoqhi" mug' pho: myao jao: ngad: ra" i?
24 Ce: ba na wa Asang: aung doe; ra" ba na ngad:.
Ngonhaung" ngaui bau: taung" poe: na: bam gelang:.
25 Ngonhaung" re khyad' yu la,- Asang we"-
ngonhaung" re khyad' yu la, wo". Asang we"- ngonhaung" re aung doe; ru byid: la,.
26 Asang: mang a khyo" joe" li" yaug re
Mao"So: yang shaman" byid: vashao:. Asang: Caung:pa" Yham mae" ngonhaung" nao re shaman" byid' ra".
27 Asang wa Mao"So ngad: ra". Yao: wa ngonhaung" dao mae gai: lai: lo va".
Naonhaung" lo, mae sag' kaung jham ci mung: poe kad' qhid ge,- aimung: phan lhang" gam: mae yan" lhau ge,.
28 Nao wa nga" Mao"So ngad mung: nao re ngo jeju beim: so" ra".
Nao qi" qhang: rure ngo ta" hau: nae".
29 Asang wa gai yaug ngad mung: yao: re jeju beim: so: ge,-
Yao" jhid'de; myid re: apyad ato ngad: ra".