CAUNG: KHIN" 116
Shidgyan Nogyan Mae" Khyad' Yu: Ru Qhug' Yaug Mao"So Re Caung:khin" Ru
1 Asang wa ngore gyo: byid: mung:- yao: rere: ngo jhid'de; ra".
Yao: wa nga" akyu" mho' thoe re tae" gyo: byid' ra".
2 Yao: re ngo khai: yao khao: ngo" ngore
yao: tae" gyo: byid' ra".
3 Shidgyan nogyan wa nga" avai: ayae mae gam: sho' lhang" kham" jo; ra".
Lab bug mae" gyaug: din ja: wa- ngore kham" lhaung" to" ako". Ngo wa gyai gyaug mung: sang: kho" lai: lo va".
4 Ailao" ngo wa Asang we"- ngore khyad' yu la,
Ngo mho' yao: ra"- ein: Asang re khai: yao va".
5 Asang wa nhag' khyag' myid bo mung: gai yaug ngad: ra".
Ngonhaung" Mao"So wa- jhid'de; sho: no: ru bo: ra".
6 Asang wa bao" yu nae" maqo" mo, re gug: gam byid' ra".
Ngo gyaug ci" ca" au: re yao: ngore bao" yu: ra".
7 Asang wa- nga" dao mae
gai mung: nga" alo zo: we"-
Gug: gug: myid: lam: na wa,
8 Asang wa ngore shid: rumae" khyad' yu: ra".
Yao: wa nga" ngug byid re tam" pye' byid: mung:-
ngore jeim: nae" rumae"jhui" yu: ra".
9 Aimung: ngo wa- daui: na mo; mug: myid: dao mae-
Asang: qhid' kheim: khyo" qo" su: va".
10-11 Ngo wa phyi yao: ngad: byaug va" ein: ta" na: au: re lhao" re:-
Ngo wa gyaug yang: khag' rere: magai: lam ein: ta" na: au: re lhao" re: ngo wa xo' yang: khug ngha: na:.
12 Asang ngore byid' ra" yao" gai: ru alhab' qhid' mae"
Asang re ngo pe" qo" qhaug' byid: nae" laug i?
13 Ngo re khyad' yu: ra" mathao mae jeju beim: so" ra"
khyo" sabyi qang: Asang re ngaui" byid: nae".
14 Yao" byumyu" qe- alhab' mo; ham phaung mae
yao: re ngo byid' to" ra" dao:so: qhid' mae" qhaug' byid: nae".
15 Yao" byu qemae" dayaug shid: lo" re
Asang khoqhi" sho: no: i?
16 Asang we"- ngo wa ni" daui daui yaug ngad:.
Nga" myhi" caung da" byid' lai: lo: ru we' dakhyo:- ngo nao re caung da" byid' ra". Nao wa ngore shid: rumae" khyad' yu va".
17 Ngo wa nao re jeju beim" ra" xeim: ngaui" byid: mung:
akyu" mho' thoe kyo" ke' nae".
18-19 Ni" byumyu" qe: hamphaung mae- Yerusalem mae" ni" gyang" lho" ra" Caung:pa" Yham mo" mae nao re ngo byid' to" ra" dao:so: qhid' mae" ngo qhaug' byid: nae".
Asang re caung:khin" byid: ge, wo".