CAUNG: KHIN" 101
Kho:kham: Nho: Dao:so:
(Davi peim: ra" nghaui"caung:)
1 Nga" nghaui" caung: wa jhaug' zaug: ru we' tarha" dangman" ra" khyo ngad:- aimung:
O" Asang we"- nao re ngo Nghaui"caung: caung: byid' ra".
2 Nga" ave, lo, mau" wa qobo made; ru ngad nae". Ngo jhao" nao khonhae" li" nae" i?
Ngo wa nga" yham mae gyang" san: ra" khyo" kao so' daui: na nae".
3 Aimung: makhyang: mashab: rure khonhae" re: zang: qhao" byid: nae" mangad:-
Mao"So mae" phaug' lo" ra" mo; ave, jham re ngo nghang" ra". Yao: bam we' ngo pe" majho" sin: nae".
4 Ngo wa madin: man" ra" khyo: makad' nae"- aimung:
makhyang: mashab mo, we' re: mazam" khug nae".
5 Su gaje dayaug yaug: khyo re magai makhyang" ra" khyo" jho" khug' so' jhau: ru khag' rere:
ngo kang" thug' pye' nae". Ngad beim: mung: nhag' lam: myhao yaug re ngo zang: kham nae" mangad:.
6 Mao"So re jhaug' zaug mo, re ngo thaug' qhao" byid: mung: yao: bam re nga" kho:kham kho" mae na nhao nae".
Jab byang" sho' dangman" ra" mo, re wa ngore caung:pa" byid: nhao nae".
7 Mhug' hab' khag' re: nga" kho:kham kho" mae-
geim kad' ru khag' re: nga" qhid' kheim: mae maqo" na: dang genae".
8 Daba: we' daba mae nga" mug: myid mae" makhyang: mashab: ra" nhag' lam: kaui mo, re phyo' qheim" pye' nae"-
Makhyang: mashab: ra" byu alhab' re Asang: vogaung: mo" mae" ngo khe' thug' pye' nae".