9
Pha,jhi" We' Nhag' Magyang: Myid
1 Pha,jhi" wa yao" yham re zhaug' mung:- zang baung: nhad' lam: zhaug' to" ava".
2 Yao: wa zo: shaug' poe kad' nae" qhid' mae" gug'nyhug' dadau: se'- sabyi qang: mocid' lhag' mung: zozo: jaung: nyhang" jaung: to" ava".
3 Yao" daui nhao zomyi: nau" qere byu khai nae" vogaung: mae" myhao: thao" jo, qo khyo nhao: ke' mung:-
4 maba mabeim: mo, we"- Li" lo ge, ga: hug' yao nhao: ra". Nhag' magyang: mo, rere:
5 Li" geri:- ngo nyhang" to" ra" zo: shaug' we' ngo phaung: to" ra" sabyi qang: re li" zo: shaug' ge,-
6 maba mabeim: mo; phaung re to: co' mung: kao so' daui: na ge,- laba lajhao khyo re cao" ye: ge,- ga: ta" nhao: ra".
7 Ba beim: yaug re nao khyo" yeta" peim" re maphug' makhyad' qhug' zo: nae"- makhyang: mashab yaug re mho" shid' kyo" re nao yaug: lam: dae no: li" nae".
8 Ba beim: yaug re khonhae" damho" shid'- yao: wa nao re nghang" byaug: li" nae"- Pha,jhi" bo yaug re mho" shid' re kam" wa yao: nao re phug' myao" li" nae".
9 Pha,jhi" bo yaug re pe" yeta" kyo: ngadqere: ai wa yao: re pha,jhi" je: laung" li" nhao nae". Din:man: yaug re pe" yeta" kyo: ngadqere: yao: mae laba lajhao ba: laung" li" nae".
10 Pha,jhi" bo nae" qhid' mae" nao wa Mao"So re shi" sao qhid' gyaug phug' ca" ra". Gyang" lho" yaug re nao ba: re nao wa ba: gyo" ra" myid qo" yu: li" nae".
11 Pha,jhi" myid wa ni" kao so' re qhang nhao: li" nae".
12 Nao pha,jhi" bo: re nao yao: akyu" qo" khae zo: nae"- aire to" pye' re nao za: dae no: jeim: nae".
13 Nhag' magyang" ra" khyo wa maba: qho' lo: zag: hug' qin" ra" myiqe: we' dau: ra".
14 Yao: wa yao" kham: dung: mae mangad: lao" vogaung: khug mae" myhao: thao" ra" jo, qo mae zaung: jo, mung:-
15 yao: yao" mau" we' yao: yao: su" lai: lo" mo, re-
16 maba mabeim: mo, we"- Vao li" geri: ga: hug' khai: na: ra". Nhag' magyang" byu qere re:
17 khug' yu: ra" qid wa je: cug; ra"- khug' zo" ra" mug re: je: myho' ga: ta" ra".
18 Ai: myiqe" nho: zoshao qe wa yao" yham khyo ye: mo, shid mung: ai: khyo vao ye" ra" mo, ana" movo: mug: mae joe" na: bam va" rure yao: bam maba mabeim: ko" ngad: ra".