8
Pha,jhi" Re Caung" Ra" Khyo
1 Tae" gyo: ge,- Pha,jhi" wa zag: hug' na: ra"-
ba: myid ba: kho' ru wa yao" dao:so: re the' gyo: nhao: ra".
2 Hau" mo" nhae mae" bug gaung dao mae we'
khyokao: jham mae yao: ye; jo; ra".
3 Vomo" kham: mae we' kham: zang jham: nhae mae
khai: yao: na: ra".
4 Xao su byu qe we"- naonhaung" re ngo mho' yao: na:.
Myid gaung dao mae" byu yaug khao: ngo" re ngo khai: yao: na:.
5 Naonhaung" maqao" makung shiko" i?
Qao" kung: lo nae" qhid' mae" mho" zhao: yu ge,- naonhaung" wa nhag' magyang: ko" i? Nhag' gyang" bo: lo nae" qhid' mae" mho" zhao: yu ge,-
6 Gai: thao" ra" nga" mungdao: jham re gyo" yu ge,-
naonhaung" re ngo ta" ru alhab' wa dangman" ra" dao: ngad: ra".
7 Ngo ta" ru wa dangman" khyo ngad:-
mhug' rure ngo nghang" ra".
8 Ngo ta" ru ja: khao: ngo" wa dang: ra"-
shad' ru we' khyo nghung" ru pe" mabo.
9 Khug qag nyan: bo yaug: qhid' mae" wa
sho' sho' gyang: gyang: ngad: ra". Laba lajhao jab yaug: qhid' mae" wa de: de: ngad: ra".
10 Ngaui: atha" mho" shid' dao: re khyin: yu wa,-
gai: thao" ra" qhang tho' mae" laba lajhao re khyin: yu wa,.
11 Ngo wa pha,jhi" ngad:- ngo wa phug' de; ngaui qhang laug sin" tho' aphug' je: de; ra".
nao o: ru pe" we' re: qo" tau" nae" mangad:.
12 Ngo wa pha,jhi" ngad:- ngo mae khug qag nyan: bo:- ngo mae pha,jhi"
laba lajhao we' ba: myid: kho' byid' ru bo:-
13 Asang re nga: yhe' ru wa makhyang" rure nghang" ru ngad:-
ngo wa ngad beim" ru we'- nga: kad' rure makhyang" ra" khyo we' mangad: ra" dao: re nghang" ra".
14 Ngo wa no' mae" myid: yaung: to: mung: kad' ye" lo".
Ngo mae ba: gyo" ra" myid bo yang: ngo wa qam: bo:.
15 Ngo wa kho:kham qere eib khang" khyo mae bobao" byid: mung: zug: qere tarha" kad' thug' nhao: ra".
16 Myid gaung dao mae zug: Kho:kham yaug khao: ngo" ngo bobao" yang: eib: ako".
Mung" zug: qe- nhag' bo lau: de, qe wa ngo bobao" yang: eib: ako".
17 Ngo re jhid'de; mo, re ngo jhid'de; mung:-
ngore qho yaug wa qhug' myao: yu: ra".
18 Ngo wa jo,nho"- nga: ye; ru-
na: dai: ru we' aung doe; rure byid' ra".
19 Ngo mae" qo" yu: ra" ru wa gai: thao" ra"
qhang tho' je: phug' de; ra". Gyang" thao" ra" ngaui tho' re: je: phug' de; ra".
20 Ngo wa din:man: mo, su" ra" khyo khyo" su" ye" lo" ra"
tarha" dangman" ra" khyo cao" ra".
21 Ngo re jhid'de; mo, re jo,nho" byid: mung:-
Yao: bam: yham mae ngaui qhang jo,nho" byang" jo, nhao:.
22 Asang wa ngore shi" sao qhid' phan" to: va"-
ganhae" gaco' mae" yao" sao qhid' lo, mau" ngad: ra".
23 Mug: myid maqhid shimae" sao qhid' maqhid mae
ngore shi" kad' to: va".
24 Pang:lai:: nammugdara majo, shimae"-
qid zo: gyaung: jham mayug shimae" ngo shi" khau: li" va".
25 Bam jham majo, shimae"- bug gaung jham yao: bam yao"
jo, qo mae majoe" jo, shimae" ngo shi" khau: li" va".
26 Mao"So wa myid gaung we' aimae" pa: din" jham- mangad: lao" sao qhid' mae"
myid zhai: dazhab' lhao" majo, shimae" ngo khau va".
27 Yao: wa mug:gaung re yao" jo, qo mae te" to" ra" au:-
nammugdara mae mug: kin re kyae: ke' ra" au: rere: ngo na:-
28 yao: wa jham thaui: re mug:gaung mae te' to" au: rere:- nammugdara khug mae"
qid thug' jham re phung" ke' au: rere:-
29 amung: panglai: khug mae" qid thug' jham re yao: ta" to" rumae" je yang: mado, nae" qhid' mae"
amyin" byid' ra" au: rere:- aimae ngo bobo: ra". Myid gaung apan aqao: kyae: ra" au: re aimae ngo bobo: ra".
30 Ngo wa yao" nhae mae yham zhaug' lagsama we' dakhyo:
bo:na va". Ngo wa ba khao: ngo" yao" ngaui bau: khyo ajhaung boe" mung:- yao" qhid' kheim: mae khonhae" re: ngaui bau" na: ra".
31 Mug: myid we' daga" ngaui bau" na mung:-
xao su byu qe we' daga" myid: ngaui: na: ra".
32 Ana"- zolau: qe we"- ngo ta" ra" dao: re tae" gyo" yu ge,-
ngo ta" ra" khyo" kad' ge, aire naonhaung" ngaui pyo: genae".
33 Naonhaung" re mho" byid' ra" khyo re tae" gyo: ge,-
Pha,jhi" bo ge,- aire pe" shui manho dakad' ge,-
34 Ngo ta" khyo: gyo" ra" yaug wa ngaui lho" qhug' nae"- nga" yham: jao: kheim: mae lhaug' mung:-
nga" kham: dung: mae ba khao: ngo" lao" na yaug wa ngaui lho" li" nae".
35 Ngo re qhug' myao: yu yaug wa kao so' qhug' yu: ra".
Amung: Asang re: yao: re ngaui: li" nae".
36 Ngo re maqhug' myao: yu yaug wa yao" gaung yao: dae te' yu: ra". Ngo re nghang: yaug wa shid: rure jhid'de; ra".