27
Zelophehad Nho: Myiqe: Zo: Qe: Khyo
1 Mahla- Noa- Hogla- Milkha we' Tiza qe wa Zelophehad nho: myiqe: zo: qe ngad: ako". Zelophehad wa Hephera nho: yauggai zo:- Hephera wa Gilead nho: yauggai zo:- Gilead wa Makira nho: yauggai zo:- Makira wa Manashe nho: yauggai zo:- Manashe wa Yoseb nho: yauggai zo: ngad: ra".
2 Ai: myiqe: wa Moshe Khinjaung Eleaza Israel zug: ade, qe we' mo, phaung geim" qhid' kheim: mae" Asang: qhid' kheim: Zaung mae ye, mung:-
3 Ngonhae ho' yao: pho" wa yauggai zo: mamyhung lo: seyo mae shid' lo" co' va". Yao: wa Asang re tau: lhan" ra" Kora nho: thao cao" mo, mae mabo: bo ngad: ra". Yao: wa yao" qobo: ra" mathao mae shid' lo" ru ngad: ra".
4 Yao: mae yauggai zo: maqo" lo: shid: lo" ra" mathao mae za: Israel byumyu" qemae" yao" mang pe"mung: gai: byaug: lo" nae" i? Ngonhae ho' nho: amyu" ba nam qe we' daga" ngonhae ho' re jo,nho" bogae byid: la,- ga: ta" ako".
5 Moshe wa ainhae ho' nho: mau" zo" re Asang jhao" kai" qhu" ke' ra".
6 Aimung: Asang wa yao: re-
7 Zelophehad nho: myiqe: zo: qe mho' ra" khyo wa jo: ra". Yao: nhae ho' nho: yao: pho" nho: amyu" ba nam qere jo,nho" gae byid: wa, yao" ma re yao: nhae ho' re kai" sang: yu nhao ge,.
8 Yauggai dayaug wa yauggai zo: mamyhung lo: shid: lo" ngad: re yao" myiqe: zo: wa yao" jo,nho" re- ma khyo" qo" sang genae" ngad: ra". Israel byumyu" qere ta" kyo: wa,- ga: ta" ra".
9 Yao: wa myiqe: zo: re: mamyhung yang: ngad: re yao: mao: yao: nhaung: qe wa ai: ma re sang: yu nae" ngad: ako".
10 Yao: mae yao: mao: yao: nhaung: re: mana ngad: re yao: pho" nho: yao: mao: yao: nhaung: qe wa ai: ma re sang: yu nae" ngad: ako".
11 Yao: mae yao: mao: yao: nhaung: re: mana yao: pho" nho: yao: mao: yao: nhaung: qere: mana ngad: re wa- yao" we' jhao" thao" ra" amyu" ba nam yaug wa ai: ma re sang: yu mung: yao" jo,nho" khyo" qo" zam" to: nae" ngad: ra". Asang ngo nao re amyin" byid' to: va" ru we' dakhyo: Israel byumyu" qe wa ceru re tarha" vao kad' nae" mau" khyo" phug' cao" nae" ngad: ako".
Yoshu Re Moshe Khu Mae Zaui: Nae" Khyin: Ru
(Mpm 31.1-8)
12 Asang wa Moshe re- Abarim bam khyo do, ye: mung: ngoyang Israel byumyu" re byid: nae" mug: myid re yebyu: ke' wa,-
13 Aire nao bin: myao thao re ni" mao: Arun we' dakhyo: nao shid: lo" li" nae".
14 Pe"mung:ga"re- ni" shid' tao geim" zin din"pyad' yo mae nga" amyin" dao: re tau: lhan: geyang: ngad: ra". Meriba mae mo, byu phung: geim" ngore qobo vhin nyhung: na ko" au: yao: bam: phaung gaung: mae nga" nho: gyang" lho" ra" qam: so' re ni" shid' tao manug: so" yu ko" ngad: ra"- ga: ta" ra". (Meriba wa Zin din"pyad' yo mae" Kade qid baug: ngad: ra".)
15 Moshe wa-
16 Asang Mao"So kao so' apan we"- ce: byumyu" qere qo" jhui" au: she mung:-
17 Ni" mo,byu phung: wa yao zaung" yaug maqo" ra" yao jham we' dakhyo: maboe" vageshao: gyekhe' jao: mae amyin" qo" byid: ra" byu dayaug san: to: byid: la, ein: ngo mho' yao: ra" ga: akyu" mho' ra".
18 Asang wa Moshe re- boe" doe; ra" Nun nho: yauggai zo: Yoshu re jhui" yu mung: yao" au: dao mae ni" lo, kai: byid: wa,-
19 Yao: re khinjaung Eleaza we' mo, byu phung: geim" ra" qhid' au: mae ye, nhao mung: yao: bam alhab' mo; qhid' kheim: mae yao: re ni" khu xo' nae" yaug khyo" ta" hau: wa,
20 Israel byu phung: geim" yao" mho dao: gyo: vageshao: ni" kheim: so' myho" byid: wa,-
21 Yao: wa khinjaung Eleaza re khug ngha mung: Eleaza wa Urim we' Thummim ci yhung: yang: ngo myid: o: rure mho" yu: li" nae". Ce: khyo" yang Eleaza wa Yoshu we' Israel mo, byu phung: geim" re yao: bam: mau" zo" alhab' mae khyo shid' byid' li" nae"- ga: ta" ra".
22 Moshe wa Asang: yang yao: re amyin" byid' to" ru we' dakhyo: kad' ra" yao: wa Yoshu re khinjaung Eleaza we' mo,byu phung: geim" qhid' kheim: mae ye; jo, nhao: ra".
23 Moshe wa Asang amyin" byid' ru we' dakhyo: yao" lo, re Yoshu nho: au: dao mae kai: mung: yao: re yao" khu mae mau" xo' zaui: nae" yaug khyo" ta" hau" ke' ra".