25
Peora Mae" Israel Byumyu" Qe
1 Israel byumyu" qe Akakia lao: khaung: mae jamu kad' mung: na ko" au: re yauggai qe wa ai: jo, qo mae" Moba myiqe: qe we' gaung sho: jho" zam" ako".
2 Ce: myiqe: qe wa yao: bam re Moba qenho: so re xeim: phad' ngaui" ra" poe khyo khai: jhui" ye" ako". Israel qe wa ai: so xeim: re zo: mung: Peora mae" Bala so re caung:pa" ako".
3 Aimung: Asang wa yao: bam re nhag' yo" ru we' Moshe re-
4 Israel au: jhaung alhab' mo, re jhui" yu mung: nga" mho dao: tae" gyo" ra" khyo" yao: bam re na" dao: gaung de: de: mae se' pye' wa,- ailao" ai: byumyu" qere ngo nhag' mayo: lo: nae"- ga: ta" ra".
5 Moshe wa zug: ade, qere- naonhaung" mae" yaug khao: ngo" wa yao: yao" byumyu" kaung mae" Bala- so re caung:pa" mo, re se' pye' ca" genae"- ga: ta" ra".
6 Moshe we' Israel byumyu" qe Asang: qhid' kheim: mae" Zaung mae kaug' ngug: na ko" au: re- Israel dayaug wa yao: bam: qhid' kheim: khyo" Midian myiqe: dayaug re jamu khyo jhui" lo" ra".
7 Ceru re khinjaung Arun nho: yao: myid: Eleaza nho: yauggai zo: Phineha myao lao" ai: phaung ham mae" to" phao: lo" ra".
8 Yao: wa lhae tad' yu: ci mung: ai: yauggai we' myiqe: tao re Zaung khug khyo cao" khe' vao ye: yang shid' zo" geim" re thug' kyao" se' pye' ra". Ce: khyo" yang Israel qere phyo' qheim" na: ra" qam" re qo" tam" pye' ako".
9 Ngadqere: ai: qam" yang byu shid' tug: byid taung bin: shid: avako".
10 Asang wa Moshe re-
11 Phineha kad' ra" mau" zo" mathao mae Israel byumyu" qere ngo manhag' yo: lo: yao: wa ngo mae" lai yang gatau: so re macaung:pa" nug ngad: ra". Aimung: yao: bam re nga" nhag' yo" ruyang maphyo' qheim" pye' lo nae"- ga: ta" ra".
12 Aimung: ngo wa joe" lo nae" ayo, alhab' mae gai: ci: ra" dao: thang" re yao: we' to: nae" ein: yao: re ta" kyo: wa,-
13 Yao: we' yao" myid:zo: qere khonhae" mae" re: khinjaung boe" na nhao va". Pe"mung:ga"re ngo we' qam: qhi" ru pe" rere: yao: mazang" to: mung: ai: byumyu" qe: qhid' mae" qobo khyad' nae" khyo kad' byid' ru ngad: ra".
14 Ai: Midian myiqe: myhi" we' daga" se' pye' ru qhug' ra" Israel byu: nho: mang wa Simon kaung mae" yham khaung au: jhaung Salu nho: yauggai zo: Zimri ngad: ra".
15 Myiqe: myhi" nho: mang wa Kozbi ngad: ra". Yao: pho" Zura wa Midian byu mae" zug: agyi ngad: ra".
16 Asang wa Moshe re-
17-18 Peora mae naonhaung" re mhug' pyag' ru we' Peora mae qam" joe" ra" ayo, re se' pye' ru qhug' ra" Kozbi nho: mathao mae Midian byumyu" qere mang: zin: mung: se' tam" pye' ge,- ga: amyin" byid' ra".