23
1 Yao: wa Balag re- nga" qhid' kheim: mae phan nhad' lam: zhaug' wa, aimung: nung: jaung lo: nhad' dau: we' yao lo: nhad' dau: cili" byid: la,- ga: ta" ra".
2 Balag wa yao: re ta" ru we' dakhyo: kad' mung: yao: we' Balam wa phan dalam: mae nung: jaung lo: dadau: we' yao lo: dadau: dau: qhaug' byid' ako".
3 Aimung: Balam wa Balag re- Asang ngore qhug' nug: laug maqhug' nug: laug ba: yu nae" qhid' mae" ngo yequ" na: au: nao wa ni" nho: phad' ngaui" xeim: nhae mae ye; jo, shi: wa,- yao" yang ngore qhu" byid' ru pe" ngadqere: nao re ngo ta" kyo: nae"- ga: ta" ra". Airumung: yao: dayaug za: bug gaung au: khyo do, lo" ra".
4 Aimung: Mao"So: yang yao: re tug: yu: ra"- Balam wa yao: re- ngo xeim: ngaui" phan nhad' lam: zhaug' mung: phan dalam: mae nung: jaung dadau: we' yao lo: dadau: dau: qhaug' to: byid: va"- ga: ta" ra".
5 Asang wa Balam re- pe" ta" ca" rure ta" shid' byid: mung: Balag jhao" yao" mungdao: lo" kyo: byid: nae" qhid' mae" nhao: ke' ra".
6 Aimung: yao: dam: tug' lo" re- yao" phad' ngaui" xeim: nhae mae Moba zug: ade, qe we' daga" ye; jo, shi" ra" Balag re lo" myao: ra".
7 Balam wa ce: lapa dao: re ta" ke' ra".
Aiwa Moba kho:kham Balag ngore jhui" li" ra"
Suri mung" mae" ba thug' shad bam jham mae
yao: wa nga" qhid' mae" li" ta" byid: la,
Israel byumyu" qenho: dao mae nhang: kheim: ke' wa,- ga: ta" ra".
8 Mao"So manhang" ra" mo, re ngo khoru: ba: nhang: nae" laug i? Asang: yang na: dam" lo" nae" khyo mata" re ngo khoru: qo" nhang: nae" i?
9 Myhao: ra" laung: mo" bam mae" yao: bam re ngo the' myao: wo"-
ngo wa yao: bam re bug gaung jham mae" qo" lhaug' qu" ra" wo"-
yao: bam wa yao: bam yao: za: na: qin" ra" byumyu" ngad: ra" wo"-
yao: bam wa gatau: byumyu" qe tho' shaman" jeju je: qo" rure ba: ako".
10 Israel byumyu" qenho: myid:zo: qe wa phalhug we' dakhyo: ngad: ako".
Yao: bam wa matho' nghe' losho' gyai myo" ako".
Nga" ba na jham re Mao"So: byumyu" dayaug khyo" thao" nhao la, wo"-
din:man" ru dayaug we' dakhyo: yaug yo za: ngore shid nhao la, wo"- ga: lapa pa: ra".
11 Ailao" Balag wa Balam re- nao ngore pe" kad' va" i? Ngo wa nga" nho: gyevo qere nhang: nhao nae" qhid' mae" nao re cemae jhui" li" ru ngad:- ngadqere: nao wa yao: bam re ashaman" byid' na nhaung i? ga: ta" ra".
12 Yao: wa ngo wa Asang: yang ta" nhao: ru za: aqo" ta" ga: phaug' tau" ra".
Balam Nho: Shid' Lhang: Ein: Lhang: Lapa Dao:
13 Aimung: Balag wa Balam re- Israel byumyu" damyo" re za: nao the' myao nae" ra" jo, qo khyo ngo we' daga" yequ" lang:- airumung: nga" qhid' mae" yao: bam re nhang: byid: la,- ga: ta" ra".
14 Balag wa Balam re Pisga bam gaung: mae" Zophim jao: dae khyo jhui" ye" ra". Yao: wa ai: jo, qo mae re: phan nhad' lam: zhaug' to: mung: phan dalam: mae nung: jaung lo: dadau: we' cad' be, lo: dadau: dau: qhaug' byid' to" ra".
15 Balam wa Balag re- ce: phad' ngaui" xeim: nhae mae ye; jo, lao: shi: wa,- ngo thoe" mae Asang we' yeqhug' shive- ga: ta" ra".
16 Asang wa Balam re qhug' mung: pe" ta" nae" rure ta" kyo" ra". Aimung: Balag jhao" yao" mungdao: lo" ta" kyo: nae" qhid' mae" dam: tug' nhao: ke' ra".
17 Aimung: Balam dam: tug' phao: lo" re yao" phad' ngaui" xeim: nhae mae Moba zug: ade, qe we' daga" ye; jo, shi" ra" Balag re lo" myao: ra". Balag wa Asang pe" ta" ke' rure lham: myid' ra".
18 Aimung: Balam wa ce: lapa dao: re peim: ke' ra".
Zippo nho: yao: zo: Balag we"- li" lo wa,
aimung: ngo ta" kyo: nae" rure tae" gyo: wa,-
19 Mao"So wa mhug' ta" ba: ra" byu qeru: mangad:-
yao: wa myid lai: ba: ra" byu xao su mangad:-
yao: dao:so: byid' to" ru pe" ngadqere: yao: kad' lhoe" ra".
Yao: ta" ke' re boe" lo: ra".
20 Shaman" nae" qhid' mae" ngore mho" shid' to: va"
Mao"So shaman" byid' re- ngo maqo" dam: tug' pye'-
21 Israel nho: joe" lo nae" ayo, mae magai: ra" au: pa lo, kyo' re:- qug: khai: jham jau re:-
yao: mae maboe" nae" rure ngo gau: qhid' khae" yang: ngo myao: ra".
Yao" bam: Asang Mao"So wa yao: bam we' daga" ngad: ra".
Yao: wa yao: bam: kho:kham ngad: ga: ta" ako".
22 Mao"So wa yao: bam re Egutu mae" jhui" thug' lo: ra"-
yao: wa yao: bam: qhid' mae" Kyao: ra" nung: jaung lo: we' dakhyo: gyekhe' byid' ra".
23 Israel byumyu" re vha" pye' nae" mandan: khan" pha majo,- jan: majo,-
ana" kam" wa Israel byumyu" qenho: khyo re Mao"So kad' ke' rure qu" shige,-
ga: sape" ceim" ta" genaeva".
24 Israel byumyu" wa qam: mo" bo: ra" khangkhyi we' dau: ra".
Aiwa maqo" phyo' zo: zo:- yao" yang se' pye' ra" mo; nho: sa: za:
maqo" shaug' shaug' wa mathang ngad: ra"- ga: lapa pa: ra".
25 Ailao" Balag wa Balam re- nao wa Israel byumyu" qere nhang: nae" rure ha: pye' ra". Ngadqere: nhang: thao yao: bam re dashaman" byid: wa,- ga: ta" ra".
26 Balam wa- Asang ngore ta" kyo: nhao: ru ja: khao: ngo" re za: ngo ta" ca" ein: nao re ngo ta" va" mangad: i? ga: phaug' tau" ra".
Balam Nho: Sam Lhang Ein: Lhang Mae" Lapa Dao:
27 Balag wa ngojhao" cao" li" wa, nao re gajo, qo khyo jhui" ye: li"- nga" qhid' mae" yao: bam re ai: jo, qo mae nao: yang nhang: nae" akhang" nao re Mao"So byid: shi: maba -ga: ta" ra".
28 Aimung: yao: wa Balam re din"pyad' yo khyo the' myao: khyo" ke' ra" Peora bam au: khyo jhui" ye" ra".
29 Balam wa yao: re- nga" qhid' mae" phan nhad' lam: zhaug' mung: nung: jaung lo: nhad' dau: we' yao lo: nhad' dau: cili" byid: la,- ga: ta" ra".
30 Balag wa yao: re ta" ru we' dakhyo: kad' mung: phan dalam: mae nung: jaung lo: dadau: we' yao lo: dadau: dau: qhaug' byid' ra".