22
Moba Kho:kham Wa Balam Re Khai Nhao: Ke' Ru
1 Israel byumyu" qe wa xo' ye" lo" mung: Yerikho thoeshad' mae" Yodan gyaung: nho: ba thug' shad' Moba jao: gyu" mae jamu te: yang yejoe" na: ako".
2 Zippo nho: yauggai zo: Moba kho:kham Balag wa Amori byumyu" qere Israel byumyu" qeyang khoru: kad' pye' ru we' yao: bam khonho" myo" rure the' gyo: lao"-
3 Yao: we' yao" mung" byu qe gyaug: din: ako".
4 Moba byumyu" au: jhaung qe wa Midian byumyu" au: jhaung qere- ce: byupaug' thau mo, wa- mhin: gyo, jao: mae" vahau: re nung: jaung lo" yang zo" pye' ru we' dakhyo: ngonhaung" nho: avai: ayae mae jo; ra" ja: alhab' re phyo' qheim" pye' genaeva" myao: ga: ta" ako". Aimung: kho:kham Balag wa-
5 Arumung: Uphrad qid gyaung: nhae mae" Petho vogaung: mae na: ra" Beo nho: yauggai zo: Balam re khai: yu nae" lagyo: qere nhao: ke' ra". Yao: bam wa yao: jhao" Balag mae" lau dao: cili" ako"- nao re ngo ba nhao nug: ru wa Egutu mae" byumyu" damyu" geim" joe" li" na: avako". Aimung" mae" byu jham wa ngonhaung" mug: myid mae byang" na: jo; bam gemung: aire lhad' yu: pye' byid: nae"- ga: kyaug' nhin" na: ako".
6 Yao: bam wa ngonhaung" tho' je: myo" ako". Aimung: yao: bam re jeju khyo" nga" qhid' mae" nhang: kheim: li" ke' byid: la,- airu: ngad: re ngonhaung" yang aibam re ce: mug: mae" qo" khe' thug' pye' maba- nao: yang shaman" byid' re byu jham shaman" jeju qo" mung: nao: yang nhang: kheim: ke' lao" byu jham mae nhang: kheim: zao" ko" rure ngo ba: ra"- ga: pyang: ke' ra".
7 Aimung: Moba we' Midian byumyu" qenho: zug: ade, au: jhaung qe wa nhang: kheim: qhid' mae" aphug' jhaung qhu" vin mung: Balam re Balag nho: mungdao: yebyid' ako".
8 Balam wa yao: bam re- cemae damyi yab co' ge,- Asang ngore pe" ta" kyo" ru naonhaung" re ne, mo" ba ta" kyo: nae" ga: lham: ta" ra". Aimung: Moba au: jhaung qe wa Balam we' daga" thang: na: ako".
9 Mao"So wa Balam jhao" joe" li" mung:- nao jhao" thang: na: ra" ce: byu qe wa khag' ngad: ako" ga: myid' ra".
10 Yao: wa Moba kho:kham Balag yang yao: bam re ngojhao" nhao: ke' mung:-
11 Egutu mung" mae" loko" ra" byu damyu" wa ce: ngonhaung" mang: damang: geim" mae na: byang" jo; ako". Yao: wa yao: bam re qo" khe' thug' pye' nae" qhid' mae" ngoyang yao: bam re nhang: kheim: ke' nhao nug: ra" ga: li" ta" mo, ngad: ako"- ga: tau" ra".
12 Mao"So wa Balam re- ce: byu qe we' dacao: lo" wa,- Israel qere re: nhang: kheim: dake'. Pe"mung:ga"re yao: bam wa nga" nho: shaman" jeju qo" mo, ngad: ako"- ga: ta" ra".
13 Thao: ba ne, seim re Balam wa Balag nho: lagyo: qejhao" ye: mung:- yham dam: phao gese, Asang wa ngore naonhaung" jhao" cao nae" rure tam" ra"- ga: ta" ra".
14 Aimung: yao: bam wa Balag jhao" dam: lo" yang: yao: bam we' daga" Balam manug: cao: lo: rure lota" kyo" ako".
15 Ailao" Balag wa sao qhid' mae" mo, tho' je: akhyag: ru we' je: myo" ra" au: jhaung qere nhao: ke' ra".
16-17 Yao: bam wa yao: jhao" ye: mung: Balag pyang: ke' ra" lau dao: re ta" kyo" ako". Ngo jhao" maqo" li" naekhyo: jeju khyo" nao re pe" yang re: matam" to: vashao:. Nao re ngo aphug' jhaung qhu" myo: sho' byid: mung: nao ta" ru pe" ngadqere: ngo kad' byid: nae". Jeju mae" li" mung: ce: byumyu" qere nga" qhid' mae" nhang: kheim: li" ke' byid: la,- ga: ta" ako".
18 Ngadqere: Balam wa- Balag yang ngore yao" kho:kham kho" mae" qhang we' ngaui alhab' byid: ngadqere: nga" Asang Mao"So: amyin" dao: mae" ngai: thao" ra" rure lhao" re: maqo" ngag: lhaui" pye' nae".
19 Ngadqere: azhao: mae" mo, we' dakhyo: damyi wa jeju khyo" athang shige, airulao" Asang gatau pe" ta" shinae" laug ein: rure ngo qo" ba: yu nae"- ga: tau" ra".
20 Ai: myi Mao"So wa Balam jhao" li" mung:- ce: byu qe nao jhao" joe" li" mung: nao re yao: bam we' daga" cao: li" nae" mho' ko" ngad: re byin seim" mung: cao" ye: wa, ngadqere: ngo ta" ru za: akad' wa,- ga: ta" ra".
21 Aimung: thao: ba ne, seim Balam wa yao" loze do: seim" mung: Moba au: jhaung qe we' daga" cao" ye" lo" ra".
Balam We' Yao" Loze
22 Balam ye" lo" rure Mao"So nhag' qu" yo" ra". Aimung: Balam wa yao" daui nhao byu shid' yaug jhui: yang: loze dao mae zaung: ye" lo" ra" au: re Asang: mug: lagyo: wa khyogaung: mae lham: ye; xug' to: byid' ra".
23 Ai: jo, qo mae mug: lagyo: shae pyang: ci mung: ye; xug' jo; rure loze myao lao" hau" mo" khyo mae" thug' mung: yothaung: khug khyo jao" ye" lo" ra". Balam wa loze re be, mung: hau" mo" khyo shad' khyo dam: keim" yu: ra".
24 Ai: thao mug: lagyo: wa sabyi khyae shid' khyae: agyo: mae" laug zao khyae shid' lam: thoe shad' ceshad' laug zao agyo: khyojhe' mae ye; xug' to" ra".
25 Loze wa ai: mug: lagyo: re myao lao" laug zao khyo do, lo" mung: laug zao mae Balam nho: khyid re nyhae" ce' pye' byid' ra". Balam wa loze re dam: be; ra".
26 Mug: lagyo: wa dam: qui" lo" mung: khoshad' khyo re: magai: jao" pye' nae" ra" khyo jhe' mae lo" ye; xug' jo; ra".
27 Celhang mug: lagyo: re loze the' myao lao"- ab' lo" ra". Balam nhag' yo" li" mung: loze re yao" zaung: bao" yang be; ra".
28 Ailao" Asang wa loze re dao: ba: jhau nae" qam: o: byid: mung: ai: loze wa Balam re- nao re ngo pe" kad' va" i? Nao ngore pe"mung: sam lhang be; i? ga: ta" ra".
29 Balam wa- nao ngore kopyad' khyo" jung" mung: be; ru ngad- ngo shae pyang: qe vin: re nao re se' pye' zai va"- ga: tau" ra".
30 Loze wa ngo wa nao dapyad geim" zaung: lo: ra" loze mangad: i? Qhid' phyao: ngoyang nao re ceru: lhaung" kad' qu" ra" i? ga: myid' ra".
Balam wa makad' qu" ga: tau" ra".
31 Ailao" Asang wa Balam re ai: mae shae pyang: ci mung: ye; jo; ra" mug: lagyo: re the' myao nhao: ra". Aimung: Balam wa myid gaung khyo goe; gam" gyo" lo" ra".
32 Mug: lagyo: wa- pe"mung: ni" loze re ceru: sam lang be; i? Nao ce: gyaung: masu: ang: rumung: ni" khyo re jhid' byid: nae" qhid' mae" ngo li" ru ngad lhe"-
33 Ngadqere: ni" nho loze wa ngore myao mung: khyoyae khyo sam lhang thug' lo" ra". Airu: maphao: thug' re ngoyang nao re se' pye' mung: loze re tang" to: nae" za: angad lo"- ga: qobo zhaug' dao: ta" ra".
34 Balam wa ngo qobo shad' va"- Ngore lham: tam" pye' nae" qhid' mae" khyogaung: mae nao ye; jo; rure ngo maba: pye' ngadqere: ana" ngo ye" lo" ra" khyo majo, ein: nao: yang myid: re kam" wa ngo yham dam: phao naeva"- ga: ta" ra".
35 Ngadqere: mug: lagyo: wa ce: byu qe we' daga" xo' yang: cao" ye: wa,- ngadqere: ngo nao re ta" nhao: ru za: ata" wa,- ga: ta: ra". Aimung: Balam wa yao: bam we' cao: ye" lo" ra".
Balam Re Balag Lham: Tug Ru
36 Balam li" na: rure Balag the' gyo: lao" Moba mug: kyo: mae Arnon qid gyaung: mae te" to" ra" Ara vomo" mae yao: re yeqhug' ra".
37 Balag wa yao: re- nao re sao qhid' lhang yejhui: nhao: ra" au: mae" pe"mung: macao: lo i? Nao re ngoyang aphug' jhaung qhu" maqo" byid nae" ein: jho: i? ga: ta" ra".
38 Balam wa- ngo li" lo va" mangad: i? Ngadqere: ana" ngo pe" kheim: so' qo" ra" i? Ngo wa Mao"So: yang ta" nhao: ru za: aqo" ta"- ga: ta" ra".
39 Aimung: Balam wa Balag we' daga" Huzod vogaung: khyo cao: lo" ra".
40 Ai: vogaung: mae Balag wa nung: jham- yao jham re se' mung: Balam re damyo" yao: we' daga" joe" li" ra" zug: ade, qere damyo" byid' ra".
Balam Nho: Sao Qhid' Mae" Lapa Dao:
41 Thao: ba: ne, kao mae Balag wa Balam re Israel byumyu" damyo" re the' qu" myao nae" Bamod Bala bam khyo jhui" do, lo" ra".