GYAUNG: SU:
(NUMBERS)
Dao: Phung"
Gyaung: su: tung" Paug' wa Israel byu qe Sina bam mae" to" lo" mung:- yao: bam re byid: nae" ga: Mao"So: yang dao: so:byid' to" ra" mung"dan: ba thug' shad' mug: kyo: khyo joe" ye: sho' alaug byid xe zin ko: ayo, gyo: mae" Israel byumyu" qenho: mhomyi: re ta" ra" jham: paug' ngad: ra". Jham: paug' nho: mang wa Israel byumyu" qenho: mhomyi: mae" ze: myao: ra" agaung myo, nho re ceim" shid' byid' ra". Aiwa yao: bam mato" lo" shire Sina bam mae Moshe gaug: yu: ra" Israel byu qenho: byu japhin: we' byu daxag' ko kyo thao Yodan gyaung: ba thug' shad' mae" byu japhin: ngad: ra". Ai: byu japhin: shid' lhang gaug: yu: ra" ayo, gyo: mae Israel byu qe wa Khanan mung" mug thao shad' mug: kyo: ngad: ra" Kade Barne khyo ye" ako". Ngadqere: ai: jo, qo mae" dao:so: byid' to" ra" mung" khyo maqo" vao ye: ko" ngad: ra". Ai: jo, qo khaung: mae myo: sho' zin na: pye' thao re yao: bam wa Yodan gyaung: ba thug' shad' tau mae yethang: na mung: dang: ra" gu: wa aimae" Khanan mung" khyo Yodan gaung: re gau" de; ye: nae" seim" jin" ako".
Ce: paug' wa mo, byu qe dazab zab qam: shan qam: gyug: boe" ko" ra" khyo qug: khai: thaung" qhug' ko" rumae gyaug ko" ra" khyo- Mao"So re gye kad' ko" ra" mo; khyo- re we' yao: bam re jhui" au: she nae" qhid' mae" Mao"So: yang san: to: yaug Moshe re gye kad' ko" ra" mo; khyo re tung" to" ra" mugsug' paug' ngad: ra". Ce: mhomyi: paug' wa Mao"So: jhaug' zaug; ru Israel byu qe qam: nhang" ru we' mho dao: matae" gyo: gesho' ngadqere: Mao"So wa yao" byumyu" qere qam: zaug thag gun caung byid' ra" khyo- dalhang lhang nhag' lam: maqhang ngadqere: Mao"So we' yao" byumyu" qe: dao mae Moshe nho: gang" tang: ra" jhid'de; myid khyo tung" to" ra" mhomyi: ngad: ra".
1
Israel Byu Qenho: Byu Japhin:
1 Israel byu qe Egutu mung" mae" to" lo" thao shid' zin ein: zin- lho" shid' khye' ein: khye' sao qhid' ba mae Asang wa Sina Din" Pyad' yo mae" yao" qhid' kheim: jamu mae Moshe re dao: jhau: ra".
2 Yao: wa- nao we' Arun wa byumyu" kaung we' yham byu qere kho' yang: Israel byu qenho: byu japhin: re gaug: yu nae" ngad: ako".
3 Gye mau" qo" vin ko" ra" yauggai qe shid' xe zin we' ai: tho' qi" ra" yauggai qe alhab' mo; mang jham re tung" xam" yu ge,.
4 Ni" shid' tao re bao" thaug' byid: nae" qhid' mae" amyu" khao: ngo" mae" amyu" kaung au: jhaung dayaug yaug re mho' yu ge,.
5-16 Cebam wa- ce: gye mau" qhid' mae" byuphung: mae" khyin: san: yu qhug' ko" ra" yao: bam: amyu" qere au: she nae" mo, ngad: ako".
17-18 Moshe we' Arun tao wa ce: yauggai daxe: shid' yaug: yang bao" thaug' byid' ru we' lho" shid' khye' ein: khye'- sao qhid' ba mae byu phung: geim" re khai: zhang" yu mung:- mo, byu alhab' mo, re amyu" kaung we' yham byu qere kho' yang: tung" xam" to" ako". Asang: yang amyin" byid' to" ru we' dakhyo: shid' xe zin byang" va" mo, we' aitho' qi" ra" yauggai alhab' mo; mang jham re nghe' mung: tung" xam" to" ako".
19 Sina din"pyad' yo mae mo, byu qere mang gaug: yu: ra".
20-46 Yaku nho: zoqhid' yauggai zo: ngad: ra" Rubin amyu" mae" qhid yang: gye mau" qo" vin: ra" yauggai shid' xe zin byang" mo, we' aitho' qi" ra" mo, yauggai alhab' mo; re amyu" kaung we' ug' khug' dinkhu: kho' yang: mang lao: yang: mang gaug: yu: ako". Alhab' geim" o mae tung" to" ru we' dakhyo: ngad: ako".
47 Levi amyu" qe wa gatau: amyu" we' daga" mang gaug: yu: ru maqhug' ngad: ako".
48 Pe"mung:ga"re Asang wa Moshe re-
49 Gye mau" qo" vin: ra" yauggai qere nao mang japhin: gaug: yu: ra" au:- Levi amyu" qere daboke' wa,-
50 Ai: atha"- Levi amyu" qere nga" qhid' kheim: jamu mae we' aimae" zai kug jham re qu" caung zaui: so: genae" qhid' mae" san: to: byid: wa,- yao: bam wa ai: jamu re we' yao" zai kug re dao mung:- aimae caung da" byid: mung:- ai: lhang" gam: mae yao: bam thang: na: ra" Zaung kad' genae" ngad: ra".
51 Naonhaung" thang: na: ra" jamu mae" phao: qui: khao: ngo"- Levi amyu" qe wa ai: Zaung re phyo' mung:- thang: na nae" ra" jo, qo asag' khao: ngo" mae ai: Zaung re dam: tau: zhaug' genae" ngad: ra". Ai: jamu khyo te' li" ra" yaug gaje khag' ngadqere: se' pye' ru qhug' nae" ngad: ra".
52 Dang: ra" Israel byu qe wa phung: we' phung: yaug khao: ngo" wa yao: yao" phung: we' daga" yao: yao" khyi qao: mae thang: na nae" jamu kad' genae" ngad: ra".
53 Ngadqere: ai: jamu khyo khag' re: maqo" te' li" yang: Israel byumyu" phung: geim" re nga" nhag' yo" ru mazao" nhao nae" qhid' mae"- Levi byu qe wa aire gug: gam nae" ai: jamu lhang" gam: mae thang: na ca" genae" ngad: ra"- ga: ta" ra".
54 Airumung: Israel byu qe wa Moshe re Asang: yang amyin" byid' to" ra" gu: ja: khao: ngo" re kad' ako".