27
Yesu Re Pilad Qhid' Kheim: Khyo Jhui" Ye: Ko" Ru
(Mrk 15.1; Luk 23.1-2; Yhn 18.28-32)
1 Ne,seim no' mae" khinjaung qi: qe we' lau: de, au: jhaung qe wa Yesu re se' pye' nae" qhid' mae" byin phyo: jho" zin" ako".
2 Ai: thao re yao: bam wa Yesu re taung" yu mung: Roma mang: zug: pho" Pilad' re yeshe: ab, byid' ako".
Yuda Iskarud Shid: Ra" Khyo
(Lgy 1.18-19)
3 Yesu re ab: pye' ra" Yuda wa Yesu shid nae" dao: phyid' ru qhug' ra" khyo re ba lao"- Yuda wa myid tha" mung:- ai: ngaui sam xe kye' re khinjaung qi: qe we' lau: de, au: jhaung qejhao" dam: citug' ye: mung:-
4 ngo wa qobo maqo" ra" yaug re shid nae" qhid' mae" ab byid' pye' ra" qobo qo" va"- ga: yeta" ra".
Ngadqere: yao: bam wa Yuda re- Airu wa ngonhaung" we' pe" sin" i? Aiwa ni" mau" angad:- ga tau" ako".
5 Alao" Yuda wa ai: ngaui sam xe kye' re Caung:pa" Yham mae shapye' to: co' yang: ai:tau mae" thug' lo" mung:- yao: yao: za: ye: jui" shid: pye' ra".
6 Khinjaung yin" qe wa- ai: ngaui re gaug: yu mung: ce wa sa: phug' ngaui ngad: ra". Airumung:- Caung:pa" Yham mae" Alu: ban" mae ke' to: nae" magai- ga: ta" ako".
7 Yao: bam bin: jho" phyo" nyang thao re ai: ngaui: yang zhogam: ug' kad' yaug: myid gaung re taung bug qe: lab bug kad' nae" qhid' mae" vai: yu: ako".
8 Aimung: ai: myid gaung re ana" ba joe" sho' Sa: Myid Gaung ga: mhang" ako".
9 Amung: yao: bam wa aiyaug: gaung phug' khyo" Israel byumyu" qe gau jho ta" phyid' to: byid' ra" ai: ngaui sam xe kye' re yu: yu mung:-
10 Asang ngore pyang: to: co' ru we' dakhyo:- ai: ngaui: yang zhogam: kad' yaug: nho: myid gaung re vai yu: ako"- ga: lapa Yeremia ta" to" ru jab byang" li" ra".
Yesu Re Pilad Myid' Ca: Qu" Ra" Khyo
(Mrk 15.2-5; Luk 23.3-5; Yhn 18.33-38)
11 Yesu wa Roma mang: zug: pho" qhid' kheim: mae ye; jo; ra". Mang: zug: pho" wa Yesu re- Nao wa Yuda qe: kho:kham ngad i? ga: myid' ra".
Yesu wa yao: re- Aiwa nao ta" ru ngad: ra" ga: phaug' tau" ra".
12 Ngadqere: khinjaung qi: qe we' lau: de, au: jhaung qeyang qobo zhaug' ko" ra" khyo jham re yao: wa pe" dakheim: re: maphaug' tau: ngad: ra".
13 Alao" Pilad' wa Yesu re- yao: bam nao re khoqhi" sho' qobo zhaug' na ko" rure nao mathe' gyo: i? ga: myid' ra".
14 Ngadqere: Yesu wa yao: re dakheim: re: maphaug' tau: ngad: ra". Airumung: mang: zug: pho" wa gyai mug' ra".
Yesu Re Se' Pye' Nae" Qhid' Mae" Dao: Phyid' Ko" Ru
(Mrk 15.6-15; Luk 23.13-25; Yhn 18.39-19.16)
15 Roma mang: zug: pho" wa- Lai co' Poe khao: ngo" mae mo, byu qe mho' ra" kyam: byu dayaug yaug re yao: bam: qhid' mae" lhaung" nhao: thug' ke' byid' ra".
16 Ai: yo, mae makhyang: yang: su hau: qi" ra" Baraba ga: mang: ra" kyam: byu dayaug na: ra".
17 Mo, byu qe zang" ham: li" gelao"- Pilad wa yao: bam re- Naonhaung" qhid' mae" khag' re lhoe' ke' nae" o ko" i? Yesu Baraba re i? Mangad: lao" Meshia ga" ra" Yesu i? ga: myid' ra".
18 Pe"mung:ga"re yao: bam myid nug: geyang:- Yesu re yao" lo, khyo li" ab byid: ko" rure Pilad ba: ra".
19 Pilad wa dao: kho' zaung tao" mae zaung: jo, shi" au:- yao" yham sang myhi" wa byu dayaug re nhao: ke' mung:- ai: qobo maqo" ra" yaug re pe" dakad' wa,- pe"mung:ga"re amyi ngo wa yab mo, mae yao" mathao: yang nhag' lam: dayin dayo: qhug' va"- ga: ta" nhao: ke' ra".
20 Khinjaung qi: qe we' lau: de, au: jhaung qe wa Baraba re lhoe' ke' byid: mung: Yesu re se' pye' wa,- ga: Pilad re mho' genae" qhid' mae" mo, byu qere poe: ako".
21 Ngadqere: Pilad wa mo, byu qere- ce shid' yaug mae" khoyaug re lam: naonhaung" qhid' mae" lhoe' ke' byid: nae" naonhaung" o ko" i? ga: myid' ra". Yao: bam wa Baraba re lhoe' ke' byid: la, ga: phaug' tau" ako".
22 Alao" Pilad' wa yao: bam re- Airu: ngad lao" wa- Meshia ga" ra" Yesu re ngo khoru: kad' zai i? ga: ta" ra".
Yao: bam alhab' mo, wa- yao: re wa- pyao: zang mae jin" se' pye' wa,- ga: phaug' tau" ako".
23 Alao" Pilad wa- yao: pe" ja" qobo shad' lhoe" ra" i? ga: myid' ra".
Alao" yao: bam wa- yao: re pyao: zang mae jin" se' pye' wa,- ga: je yang: zag: hug' ako".
24 Pilad wa pe" xo' ta" ngad yang: re: pe" akyu" mabo- mo, byu qe lu" to" li" na: rure qu" myao lao"- qid yu: yu yang:- ceyaug shid: ra" xao qug: wa ngo we' pe" re: masin:- ceyaug: xao qug: naonhaung" vin ca"- ga: ta" mung: mo, byu qe: qhid' kheim: mae lo, cid' ra".
25 Mo, byu qe alhab' mo, wa Yao" xao qug: wa- ngonhaung" we' ngonhaung" myid:zo: qe: dao mae ngad vashao:- ga: ta" ako".
26 Alao" Pilad wa Baraba re yao: bam: qhid' mae" lhoe' ke' byid' ra". Yesu re wa be, mung: pyao: zang mae jin" se' pye' nae" qhid' mae" ab byid' ke' ra".
Yesu Re Gyezo: Jham Jung" Ko" Ru
(Mrk 15.16-20; Yhn 19.2-3)
27 Mang: zug: pho" nho: gyezo: jham wa Yesu re mang: zug: pho" yham mo" khug khyo jhui" vao ye" lo" ko" ra". Gyetab geim" mae" gyezo: jham Yesu lhang" gam: zang" ham: li" ako".
28 Yao: bam wa Yesu re mai bau: khyad' pye' byid: yang:- bau: qhang amo, tha" vhe' byid' ako".
29 Ai: thao re- yao: bam wa zau: kyao: yang maug dalam: nag mung: Yesu au: mae zhaung: byid: mung: yao" lo, yo lo, mae qid phaung: yao: dakhyaung: ke' byid' ako". Bin lao" yao: bam wa Yesu qhid' kheim: mae pad' thaug' thaug' yang: yao: re jung" zo" re"- Yuda qe: kho:kham we"- kao qhang so' qhang vashao: wo"- ga: ta" ako".
30 Yao: bam wa Yesu re- khata: phoe" sheim: byid' ru we' qid phaung: yao: yu: yu yang: yao" au: re be; ako".
31 Yao: bam wa yao: re bin: jung" khyoe' gelao"- ai: bau: qhang re khyad' pye' byid: mung: yao" mai bau: dam: vhe' byid: yang: pyao: zang dao mae jin" se' pye' nae" qhid' mae" Yesu re jhui" thug' lo" ako".
Yesu Re Pyao: Zang Mae Jin" Se' Ru
(Mrk 15:21-32; Luk 23:36-43; Yhn 19:17-27)
32 Yao: bam thug' ye" lo" na ko" au: Kureni mung" byu- Simon ga: mang: ra" yaug re the' myao gelao"- gyezo: jham wa Yesu pyao: zang re vo, nae" qhid' mae" yao: re deim" zag: nhao: ako".
33 Golgotha ga: mang: ra" au: gao: gye, jo, qo khyo joe" ye: gelao"-
34 yao: bam wa mocid' kho: we' phaung: to" ra" sabyi qang: Yesu re byid: jhaug' ako". Yesu wa aire lham: yo; tau" qu" mung:- mashaug' ngad: ra".
35 Yao: bam Yesu re- pyao: zang mae bin: jin" te' pye' gelao"- yao: bam wa pha" be, mung: Yesu mai bau: jham re yao: bam yao: cao: jho" gae: yu: ako".
36 Ai: thao re- yao: bam wa aitau mae zaung: jo, mung: Yesu re lhaug' na: ako".
37 Yao" au: tho' mae- ceyaug wa Yuda qe: kho:kham Yesu ngad: ra"- ga: yao: re qobo zhaug' ra" mugsug' tung" te' to" ako".
38 Alao" yao: we' daga" damya, shid' yaug re- lo, yo shad' mae dayaug- lo, kaung: shad' mae dayaug pyao: zang dao mae jin" te' to" ako".
39 Khyo mae su" lai: lo" mo, re:- Yesu re jung" ru we' au: nghoe" nghoe" mung:- Caung:pa" Yham re phyo' pye' yang; sam ba gyo: mae dam: kad' nae" ga: yaug we"-
40 nao Mao"So: Yao: zo: ngad: re wa- ni" gaung re naoyao: khyad' yu wa,- Amung: pyao: zang dao mae" gyo" lo ri:- ga: nyhe' ako".
41 Khinjaung qi: qe- tung" pho" qe we' lau: de, au: jhaung qere:- ai we' dakhyo:- Yesu re jung" khyoe' ako".
42 Su gaje qere wa yao: khyad' yu: ra"- ngadqere: yao: yao" gaung re wa maqo" khyad' yu nhaung. Yao: wa Israel qe: kho:kham mangad: i? Pyao: zang dao mae" ana" gyo" lo:ngad: re wa- ngonhaung" yao: re lam" zai ngad:-
43 yao: wa Mao"So re khug ngha: ra". Aimung: Ngo wa Mao"So: Yao: Zo: ga: ta" yaug ngad: ra". Airu: ngad; re Mao"So yao: re ana" khyad' yu nug: laug ceim" qu" gelang: ga: ta" ako".
44 Yao: we' daga" pyao: zang mae jin" te' to" ra" damya, shid' zo: lhao" re:- ai we' dakhyo: Yesu re jung" ako".
Yesu Kao Gyo" Ru
(Mrk 15.33-41; Luk 23.44-49; Yhn 19.28-30)
45 Amung:- ba khaung tau yo, mae" myi" thao sam yo, qug joe" sho' damung" geim" no, sang: kyid mug: cad' cad' lo" byaug: ra".
46 Myi" thao sam yo, qug mae Yesu wa- thoe qi: we'- Eli- Eli Lema Sabagthani?- ga: hug' ta" ra". Aiwa- Nga" Mao"So- Nga" Mao"So Nao ngore pe"mung: yang: shapye' co' i? ga" ru ngad: ra".
47 Ai: nhae mae ye; jo; ra" mo, damyo" aire the' gyo: gelao"- yao: Elia re khai: na: ra"- ga: ta" ako".
48 Ailao" jao" yao: bam mae" dayaug wa tao" ye" lo" mung:- qid mug sad' yu: yu yang: yhid jhin qang dag sho' jam: yu mung: gyang: yao: au: mae thug' ze: ci yang: Yesu re byid: jhaug' nae" seim" ra".
49 Ngadqere: gaje qe wa na: jo, vashao:- Elia yao: re li" khyad' yu: ra" la,- mali" khyad' yu: ra" la,- ngonhaung" qu" na gelang:- ga: ta" ako".
50 Yesu wa thoe qi: zang hug' mung: kao gyo" lo" ra".
51 Ailao"- Caung:pa" Yham mae" qe, kyo pin: lung: wa aau: mae" akhyid joe" sho' shid' gao go; lo" byaug: ra". Mug: myid nan" li" ru we' laug thin jham go; sin" lo" byaug ko" ra".
52 Lab jham re: bung" go; lo" mung:- shid: jo; ra" Mao"So: byu myo: sho' mo, re dam: daui: to" li" nhao: ra".
53 Yesu shid: rumae" dam: daui: to" li" thao re yao: bam wa lab jham mae" thug' li" mung: gyang" lho" ra" vogaung: khug khyo vao ye" ako". Byu myo: sho' mo, wa yao: bam re the' myao: ako".
54 Gyezug: pho" we' daga" Yesu re lhaug' na: ra" gyezo: qe wa myid lab: lab' ru we' gatau boe" ra" gu: jham re the' myao gelao"- yao: bam wa gyaug: nin" mung:- ceyaug wa gaigai: yao: Mao"So: yao: zo: ngad nhaung ga: ta" ako".
55 Galile mung" mae" yao" thao cao" mung:- yao: re caung da" byid: ko" ra" myiqe: myo: sho' mo, re: ai:tau mae va: va: mae" qu" ye; jo; bam: ako".
56 Ai bam: phaung mae Magadala Mari- Yaku we' Yoseb tao: yao: myhi" Mari- Zebede yao: zo: tao ho' yao: myhi" bam bobo: ako".
Yesu Re Nyhab' Shaung: Ru
(Mrk 15.42-47; Luk 23.50-56; Yhn 19.38-42)
57 Myi" thao joe" lao"- Arimathe vo byu Yoseb ga: mang: ra"- jo,nho" qo" ra" byu dayaug joe" li" ra". Yao: re: Yesu mho"zo: dayaug ngad: ra".
58 Yao: wa Pilad jhao" ye: mung: Yesu mao gaung re yemho" ra". Alao" Pilad wa Yoseb re mao gaung byid' ke' nae" qhid' mae" amyin" byid' ke' ra".
59 Yoseb wa mao gaung re yu mung: jid: mo" pin: sag' yang mao gaung re thab' yang:-
60 Laug thin re kyaung" to" ra" yao" laug khyaung lab asag' khug mae ye:ke' to" ra". Amung: lab kham: re laug zang qi: dazang: yang lhang" jhid' to: co' yang: phao: lo" ra".
61 Aitau mae- Magadala Mari we' gatau Mari tao wa ai: lab tau" te' mae zaung: jo; ako".
Lab Re Zaung" Nae" Gye Zo: Nha: To" Ru
62 Ai: thao- Dugno: Ba mae khinjaung qi: qe we' Pharishe qe wa Pilad jhao" zang" ye: mung:
63 Asang we"- ai: mhug' pyag' yaug wa- yao: daui shi" au:- ngo wa sam ba kyo thao re dam: daui: to" li" nae" ga: ta" rure- ngonhaung" dam: myid: beim: va"-
64 Airumung:- yao" mho"zo: qe wa mao gaung re maye: qo" khug' yu genae" khyo: sam ba ein: ba joe" sho' yao" lab re nyang" za: zaung" nae" qhid' mae" amyin" byid: wa,- airu: mangad' re yao" mho"zo: qe wa- yao: wa shid: rumae" dam: daui: to" li" va" ra"- ga: mo, byu qere ta" li" genae"- ce: lo" thao" re mhug' pyag' ra" ru wa- sao qhid' mhug' pyag' ra" tho' je: xo: li" nae"- ga: ta" ako".
65 Pilad wa yao: bam re gug: gam gyezo: daphung: re khai: yu yang:- lab re qo" gug' qhi" gug: sho' yezaung" nhao ge,- ga: ta" ke' ra".
66 Alao" yao: bam wa- lab khyo ye: mung: laug baui re dazid thaung" te' yang: lab re gyai gug: sho' kad' ako".