26
Yesu Re Se' Pye' Nae" Khyo Qho: Ru
(Mrk 14.1-2; Luk 22.1-2; Yhn 11.45-53)
1 Yesu wa ai: gu: alhab' re bin: ta" lao"- yao: wa yao" mho"zo: qere-
2 Shid' ba lai lao"- Lai co' Poe joe" zai ngad: rure naonhaung" ba: ako". Byu: Yao: Zo: wa pyao: zang mae jin" se' pye' nae" qhid' mae" ab byid' pye' ru qhug' li" nae".
3 Alao"- khinjaung qi: qe we' lau: de, au: jhaung qe wa Khinjaung Yin" Kayapha yham mo" mae zang" phaung mung:-
4 Yesu re sae za: taung" yu yang: se' pye' nae" qhid' mae" jho" qham: ako".
5 Ngadqere: yao: bam wa mo, byu qe mabeim" li" geshao: poe ba na gyo: gu: mae makad' ge jhao" ga: jho" ta" ako".
Bethani Mae Yesu Re Xau Vhe' Sheim" Ru
(Mrk 14.3-9; Yhn 12.1-8)
6 Yesu wa Bethani mae- mao gae: boe" qu" ra" Simon: yham mae zozo" na: au:-
7 Myiqe: dayaug wa gyai phug' de; ra" Mura Nard xau laug gyang" thaug' dalam: cili" mung: Yesu au: mae ai: xau li" vhe' sheim: byid' ra".
8 Yao" mho"zo: qe wa aire myao gelao" nhag' qu" yo: gemung:- pe"mung: ai: xau re amyid: avho: kad' pye' ra" i?
9 Ai: xau wa ngaui myo: sho' kye' re aung: mung:- myaung sho" ra" mo, re qo" gae byid: zai ngad: ra"- ga: ta" ako".
10 Yesu wa aire ba lao"- yao: bam re- Naonhaung" ai: myiqe: re pe"mung: khin jang ko" ra" i? Yao: wa ngore gai: ra" mau" kad' byid' ava".
11 Pe"mung:ga"re myaung sho" ra" mo, wa khonhae" re: naonhaung" we' daga" za: na: ako". Ngadqere: naonhaung" wa ngo we' daga" khonhae" re: abang mabyid maqo" na genae".
12 Ce: myiqe: nga" gaung re xau vhe' sheim: byid' ru wa ngore nyhab' shaung: pye' nae" qhid' mae" seim" nyhang" ru ngad: ra".
13 Ngo naonhaung" re dang za: ta" ru wa Ngaui Bau" Lau Dao: re kho" kyo" lo" ra" mug: myid gye, geim" khyi" khao: ngo" mae ce: myiqe: re beim: so: nae" qhid' mae" yao: kad' ra" mau" zo" rere: ta" kyo" li" genae"- ga: ta" ra".
Yesu Re Ab: Pye' Nae" Qhid' Mae" Yuda- Myid Vang" Ru
(Mrk 14.10-11; Luk 22.3-6)
14 Ai: thao re mho"zo: daxe: shid' yaug mae bobo: ra" Yuda Iskarud ga: mang: ra" yaug wa khinjaung qi: qejhao" thug' ye" lo" mung:-
15 Yao: wa yao: bam re- ngo naonhaung" lo, khyo Yesu re ab byid: lao"- naonhaung" ngore ngaui khonho" byid: genae" i? ga: yemyid' ra"- yao: bam wa yao: re ngaui sam xe kye' nghe' byid' ako".
16 Ai: ba na mae" Yuda wa Yesu re ab: pye' nae" khoau: yo" nae" rure qho: na: ra".
Yesu Yao" Mho" Zo: Qe We' Lai Co' Poe Myi" Xeim Zo" Ru
(Mrk 14.12-21; Luk 22.7-14; Yhn 13.21-30)
17 Ai: Man" Make' ra" Mug Poe sao qhid' ba mae mho"zo: qe wa Yesu jhao" li" mung:- ni" qhid' mae" Lai co' Poe myi" xeim re khotau mae nao ngonhaung" re yenyhang" seim" to: nhao nug: i? ga: myid' ako".
18 Yesu wa yao: bam re- Vogaung: mae" byu dayaug jhao" ye: mung: aiyaug re- Mho" Pho" ta" ke' ra"- nga" ayo, joe" li" na va"- amung: ni" yham mae nga" mho"zo: qe we' ai: Lai co' Poe re kad' nug: ra" ga"- ein: yao: re yeta" ge,- ga: ta" ra".
19 Alao" mho"zo: qe wa Yesu yao: bam re ta" ke' ru we' dakhyo: kad' mung:- ai: Lai co' Poe re yeseim" nyhang" to" ako".
20 Myi" thao cad' sham" zo" joe" lao"- Yesu wa mho"zo: daxe: shid' yaug we' daga" zaung: jo, mung: myi" xeim zo" ra".
21 Yao: bam myi" xeim zo" na ko" au:- Yesu wa ngo naonhaung" re dang za: ta" ru wa naonhaung" mae" dayaug wa ngore ab byid' pye' li" nae"- ga: ta" ra".
22 Alao"- mho"zo: qe wa gyai nhag' gyo" kaug' ru we' Yesu re dayaug: thao dayaug aiyaug wa Ngo ngad nae" i? ga: myid' ako".
23 Yesu wa tau: mung:- ngo we' daga" dakhug' mae" za: mug jam zo" ra" yaug wa ngore ab byid' pye' li" nae".
24 Byu: Yao: Zo: wa jham: mugsug' mae tung" to" ru we' dakhyo: shid kham: nae" qhid' mae" ye" li" nae". Ngadqere: Byu: Yao: Zo: re ab byid' pye' ra" yaug wa byuxa: vaqoe, qhug' ra"- aiyaug wa makhau: li" ngad: re yao" qhid' mae" je: gai zai ngad: ra"- ga: ta" ra".
25 Alao"- Yesu re ab byid' pye' nae" yaug Yuda wa Mho" Pho" we"- aiyaug wa ngo ngad nae" laug i? ga: Yesu re myid' ra". Yesu wa tau: mung:- nao ta" ru we' dakhyo: ngad: ra"- ga: ta" ra".
Asang: Myi" Xeim Zo: Poe
(Mrk 14.22-26; Luk 22.14-20; 1Ko 11.23-25)
26 Yao: bam zozo" na ko" au: Yesu wa mug re yu mung: jeju caung: akyu" mho' ra". Ai: thao re ai: mug re cug' phai" yang: Ce wa nga" gaung ngad:- yu mung: zo: ge,- ga: ta" mung: yao" mho"zo: qere gae byid' ra".
27 Keim rere: yu mung: Mao"So re jeju bin: caung: byid: lao"- yao: bam re- Naonhaung" alhab' mo, aimae" shaug' ge,-
28 Ce wa qobo khyad' byid' ru qhug' geshao:- byu myo: sho' qhid' mae" sheim: pye' ra" Mao"So: dao: thang" re dazid thaung" te' to" ra" nga" sa: ngad: ra".
29 Ngo naonhaung" re ta" geli"- nga" Pho" mung"dan: mae ngo wa naonhaung" we' daga" sabyi qang: asag' re mashaug' shaug' wa sabyi qang: re ana" mae" ngo khonhae" re: mashaug' lo nae"- ga: ta" ra".
30 Ai: thao re yao: bam wa caung: nghaui" dalam: bin: caung: lao"- Zhan:lun: Bam khyo thug' ye" lo" ko" ra".
Yesu Re Petru Ha: Pye' Nae" Rure Gau: Qhid' Khae" Yang: Ta" Ru
(Mrk 14.27-31; Luk 22.31-34; Yhn 13.36-38)
31 Yesu wa yao: bam re- Ana" myi yao: naonhaung" alhab' mo, ngore to: co' mung: tao" phao: lo" byaug: li" genae". Pe"mung:ga"re jham: mugsug' mae- ngo wa yao zaung" yaug re be, mung: yao jham wa byo: sin" lo" byaug: li" genae"- ga: tung" to" ra".
32 Ngadqere:- ngo dam: daui: to" li" thao re ngo wa naonhaung" qhid' au: mae Galile khyo ye" lo" na: li" nae"- ga: ta" ra".
33 Alao" Petru wa Yao: bam alhab' mo, nao re phao: cug' to: co' gengadqere: ngo wa nao re khonhae" re: maphao: cug' to: co' nae"- ga: Yesu re ta" ra".
34 Yesu wa Petru re- ngo nao re dang dang ta" li"- ana" myi yao: qo, mateim shi: re nao ngore sam lhang ha: pye' li" nae"- ga: ta" ra".
35 Petru wa Ngo nao we' daga" shid qo: li" ngadqere: ngo wa nao re maha: pye' nae"- ga: Yesu re tau" ra". Mho"zo: gaje alhab' mo, re: ai we' dakhyo: ta" ako".
Getseman Khyae Mae Yesu Akyu" Mho' Ru
(Mrk 14.32-42; Luk 22.39-46)
36 Ai: thao re Yesu wa mho"zo: qe we' daga" Getseman ga: mang: ra" jo, qo khyo joe" ye" lo" ra". Alao" Yesu wa yao" mho"zo: qere- ngo thoetau khyo ye: mung: akyu" yemho' na: ra" au:- naonhaung" wa cetau mae zaung: jo, lao: shi ge,- ga: ta" ra".
37 Yesu wa Petru we' Zebede yao: zo: tao re yao: we' daga" jhui" ye" lo" ra". Yesu wa qi: sho' nhag' kaug' nhag' qhui: ru we' myid: qug: myid: ci" qhug' ra".
38 Yesu wa Nga" nhag' lam: shid nae" qhi" yao: gyai kaug' qhui: ra"- naonhaung" cetau mae ngo we' daga" lha" yang: lhaug' na ge,- ga: yao: bam re ta" ra".
39 Yesu wa aimae" dazab zo: lai: ye: mung: myid gaung mae ye:goe; jo, yang:- nga" Pho" we"- gai: boe" ngad: re wa- ce: keim re ngo mae" lhai: ke' byid: la,- ngadqere: ngo o: ra" khyo" mangad:- nao o: ra" khyo" za: boe" lo vashao:- ga: akyu" yemho' ra".
40 Ai: thao Yesu mho"zo: sam yaug jhao" dam: tug' lo: re yao: bam wa yab: pyo" jo, ko" rure lomyao: ra". Yesu wa naonhaung" sam yaug wa dayo, qug za: lhao" re: ngo we' daga" maqo" lhaug' na ge i?
41 Naonhaung" wa ju" phyo' ru khyo magyo" lo" genae" qhid' mae" lha" mung: akyu" mho' na ge,- Byo wa nug kao bau ngadqere: gaung sho: wa qam: nang" ra"- ga: Petru re ta" ra".
42 Yesu wa shid' lhang ein: lhang dam: ye" lo" mung: Nga" Pho" we"- ce: keim re ngo mae" magai: lhai: ke' lao" wa nao myid: o: ra" khyo" boe" lo vashao:- ga: akyu" mho' ra".
43 Yesu dam: tug' lo: re mho"zo: qe wa myo, qid gyai la: geyang: yab: myhid' jo, ko" rure lodam: myao: ra".
44 Yesu wa yao: bam re nha co' mung: dam: ye: yang: azhao: mae" dao: we' dakhyo: sam lhang ein: lhang akyu" yedam: mho' ra".
45 Ai: thao Yesu wa mho"zo: qejhao" dam: tug' lo mung: yao: bam re- naonhaung" ana" joe" sho' yab: myhid' jo, mung: no" na genhaung i? Qu" ge,- Byu: Yao: Zo: re qobo kad' ra" mo, khyo ab byid' pye' nae" yo, qug joe" li" va" ra".
46 To" ge,- ngonhaung" ye" lo" gelang: se, Qu" ge,- ngore ab byid' pye' nae" yaug wa joe" li" na: ava"- ga: ta" ra".
Yesu Re Taung: Ko" Ru
(Mrk 14.43-50; Luk 22.47-53; Yhn 18.3-12)
47 Yesu airu: jhau: na shi" au: re yao" mho"zo: daxe: shid' yaug mae bobo: ra" Yuda wa khinjaung qi: qe tung" pho" qe we' lau: de, au: jhaung qeyang nhao: ke' ra" shae tam" thaung kang ci: ra" byu phung: we' daga" joe" li" ra".
48 Yesu re ab byid' pye' yaug wa- ngo bobaug baug: ra" yaug wa naonhaung" o: ra" yaug ngad: ra" Yao: re taung" yu ge, ga:- ave, byid' to" ra".
49 Yuda wa Yesu jhao" din: za: li" mung: Mho" Pho" we"- qao" na: i? ga: ta" yang:- bobaug baug: ra".
50 Yesu wa yao: re- Ba nam pho" we"- nao kad' nae" mau" re phyad za: kad' wa,- ga: tau" ra".
Alao" yao: bam wa Yesu re taung" yu mung: tang za: zaui" zag: ci: ako".
51 Alao" qu" ge, Yesu we' daga" na: ra" mo, mae" dayaug wa yao" shae pyang: she: yu yang: Khinjaung Yin" nho: jeim dayaug re qam" ke' mung: yao" nokhye' byid: lo" ra".
52 Yesu wa yao: re- Ni" shae pyang: re shae byao khug mae dam: ke' to: wa,- Shae pyang: ci yang: gye kad' yaug khag' ngadqere: shae pyang" yang shid nae".
53 Ngo wa Nga" Pho" re bao" thaug' nae" mho' lao"- yao: wa gyetab daxe: shid' tab mae" gyezo: tho' myo" ra" mug: lagyo: jham re ngojhao" nhao: ke' byid: zai ngad: rure nao maba i?
54 Ngadqere: airu: kad' ngad: re wa- ceru wa boe" lo ca" nae"- ga: tung" to" ra" jham: dao: wa khoru: qo" jab byang" lo zai i? ga: ta" ra".
55 Ai: thao re Yesu wa mo, byu qere- Naonhaung" wa damya, re taung" ruru: ngore taung: nae" qhid' mae" shae we' thaung kang we' li" ko" i? Ngo wa ba khao: ba ngo" Caung:pa" Yham mae zaung: jo, mung: mho" byid' na ngadqere: naonhaung" ngore mataung: ko" ngad: ra".
56 Ngadqere: lapa qe tung" to" ra" jham: dao: jham jab byang" li" nae" qhid' mae" cegu: alhab' boe" li" ru ngad: ra"- ga: ta" ra".
Alao" mho"zo: qe alhab' wa Yesu re to: co' mung: tao" phao" lo" ko" ra".
Yesu Re Yuda Tarha" Qe, Do, Mae Myid' Ca: Qu" Ru
(Mrk 14.53-65; Luk 22.54-55; 53-71; Yhn 18.13-14, 19-24)
57 Yesu re taung" yu: ra" mo, wa yao: re Khinjaung Yin" Kayapha yham khyo jhui" ye" ako". Tung" pho" qe we' lau: de, au: jhaung qe wa ai: mae zang" phaung: na: bam: ako".
58 Petru wa Khinjaung Yin" nho: yham vang" khyo joe" sho' va: va: mae" Yesu thao cao" ye" ra". Yao: wa yham vang" khug khyo vao ye: mung: Yesu khoru: boe" lo" ra" rure ba nae" qhid' mae" gug: gam qe we' daga" ye:zaung: jo; ra".
59 Khinjaung qi: qe we' Tarha" Qe, Do, geim" mae" mo, wa Yesu re qo" se' pye' nae" qhid' mae" madang: ra" sagse: qho: ako".
60 Mhug' mung: sagse: kham: ra" mo, myo: sho' thug' li" mung:- yao" khyo re madang: ra" khyo" sagse: mhug' kham gengad yang: re:- yao: bam pe" sagse: mamyao ko" ngad: ra".
61 Lo" thao" mae byu shid' yaug thug' li" mung: Byu ceyaug wa Ngo wa Caung:pa" Yham re phyo' pye' mung: sam ba gyo: mae qo" dam: kad' nae" ga: ta" ra"- ga: sagse: kham: ako".
62 Alao" Khinjaung Yin" wa to" ye; li" mung: Yesu re- Nao dakheim: re: mata" i? Yao: bam ni" khyo re sagse: kham: na ko" ru wa khoru: i? ga: myid' ra".
63 Ngadqere: Yesu wa sae za: na: ra". Khinjaung Yin" wa Yesu re Nao Mao"So: Yao: Zo: ngad lao" wa ngonhaung" re ta" la,- ngo wa daui: na: ra" Mao"So: mang re lao: mung: ngo nao re myid' ra"- ga: dam: ta" ra".
64 Yesu wa Yao: re- Aiwa nao ta" ru ngad: ra". Ngadqere: ngo naonhaung" alhab' re ta" geli"- ana" mae" thao phyao: Byu: Yao: Zo: wa phung qam: so' nho: lo, yo shad' mae zaung: jo; ru we' mug:gaung: jham thaui: dao mae jui: mung: li" rure naonhaung" qhug' myao: li" genae"- ga: ta" ra".
65 Alao" Khinjaung Yin" wa yao: yao" bau: qhang lao" cad' pye' mung:- yao: wa Mao"So re jung" gaui: ra" dao: jhau: ava"- ngonhaung" gatau pe" sagse: qo shilo" i? Yao: Mao"So re jung" gaui: rure naonhaung" yao: the' gyo" yu: avako".
66 Naonhaung" khoru: myid ko" i? ga: ta" ra".
Alao" yao: bam wa tau: mung:- yao: wa qobo qo" yaug ngad mung: shid man" ra"- ga: ta" ako".
67 Ai: thao re yao: bam wa Yesu myo,khung: re khota: phoe" sheim" ru we' zhab' thaung" ako".
68 Daqhae: wa Yesu re bo:pyo' pyo' mung:- Asang Meshia we"- nao re khag' be; rure ngonhaung" re lapa pa: kyo: la,- ga: ta" ako".
Yesu Re Petru Ha: Pye' Ru
(Mrk 14.66-72; Luk 22.56-62; Yhn 18.15-18, 25-27)
69 Petru wa taung gaung shad' ai: vang" khug mae zaung: jo; ra" au:- Khinjaung Yin" nho: okaung myiqe: nau" dayaug yao: jhao" li" mung:- Petru re- Nao re: Galile mae" Yesu we' daga" na yaug ngad: ra"- ga: ta" ra".
70 Ngadqere: Petru wa alhab' mo; qhid' kheim: mae ha: pye' mung:- nao ta" ra" khyo re ngo maba- ga: phaug' tau: yang: vang" kham: nhad' khyo thug' ye" lo" ra".
71 Okaung myiqe: nau" gatau dayaug re: dam: the' myao lao" aitau mae na: ra" mo, re ceyaug re: Nazared mae" Yesu we' daga" na yaug ngad: ra"- ga: ta" ra".
72 Petru wa Ai: yaug re ngo maba- ga: nhang: myan" nhang: thoe we' dam: ha: pye' ra".
73 Ai: thao dazab gai re ayae mae ye; jo; ra" mo, wa Petru jhao" qui" li" mung:- yao: re gaigai: yao: nao re: yao: bam: phung: mae" dayaug ngad: ra". Pe"mung:ga"re ni" jhau thoe: yang yao: shid' na: ava"- ga: ta" ako".
74 Petru wa nhang: myan" nhang: thoe we' Ngo wa aiyaug re maba- ga: ta" ra". Ailao" jao" qo, teim: ra".
75 Petru wa qo, mateim shi:re nao wa ngore maba ga: sam lhang ha: pye' li" nae" ga: Yesu yao: re ta" to" ra" dao: re myid: beim" ra". Alao" Petru wa taung gaung khyo thug' ye: mung:- gyai kaug' ngug: ra".